राजविराज — फागुन २१ मा हुने प्रतिनिधिसभा निर्वाचनका लागि एमालेले सप्तरी–२ बाट उम्मेदवार छनोट गरेका मधेश प्रदेशका पूर्वमुख्यमन्त्री सतीशकुमार सिंहले स्वाभिमान पार्टीबाट चुनाव लड्ने बताएका छन्।

उनले त्रुटिवश एमालेबाट आफ्नो नाम उम्मेदवारका रूपमा छनोट भएको बताए । ‘उहाँ (एमालेका नेता)हरू पार्टीमा प्रवेश गर्न भन्दै हुनुहुन्थ्यो । तर, म आफ्नै पार्टीबाट चुनाव लड्छु भनेपछि उहाँहरूले मान्नुभयो,’ पूर्वमुख्यमन्त्री सिंहले भने, ‘एमालेको समर्थन चाहिँ रहने नै हो । एमालेबाट उम्मेदवार बनाएको विषयमा थाहा पाएपछि मैले केन्द्रीय समितिमा पनि बुझेँ, त्रुटिवश सूचीमा आफ्नो नाम गएको कुरा जानकारीमा आएको छ ।’

उनले आफूले सप्तरी–२ मा स्वाभिमान पार्टीबाट उम्मेदवारी दिने बताए। त्यसका लागि सोमबार प्रदेशसभा सदस्यबाट राजीनामा दिने तयारी गरेको उनले बताए । ‘भोलि सभामुखज्यूसँग समय लिएको छु,’ उनले भने, ‘भोलि नै राजीनामा दिएर चुनावको तयारीमा लाग्छु ।’