काठमाडौँ — प्रधानमन्त्री सुशीला कार्कीले पूर्वप्रधानन्यायाधीश र पूर्वन्यायाधीश प्रधानमन्त्री तथा मन्त्री हुँदा उठेका प्रश्नप्रति असन्तुष्टि जनाएकी छन् ।

कार्कीले भारतमा पूर्वप्रधानन्यायाधीश र पूर्वन्यायाधीश मन्त्री र सांसद बनेको उदाहरण उल्लेख गर्दै नेपालमा असामान्य परिस्थितिमा प्रधानमन्त्री र मन्त्री बन्दा किन प्रश्न उठेको भन्दै प्रतिप्रश्न गरेकी छन् । 

प्रधानमन्त्री निवास बालुवाटारमा राजनीतिक दलका नेता र जेन–जी प्रतिनिधिसँगै आफ्नो मन्त्रिपरिषद्का सदस्यलाई राखेर प्रधानमन्त्री कार्कीले उक्त प्रश्न गरेकी हुन् । कार्की पूर्वप्रधानन्यायाधीश हुन् भने सर्वोच्च अदालतका पूर्वन्यायाधीश अनिलकुमार सिन्हा मन्त्री छन् । सर्वोच्च अदालतमा पनि पूर्वप्रधानन्यायाधीश र पूर्वन्यायाधीश प्रधानमन्त्री तथा मन्त्री बन्न नपाउने संवैधानिक व्यवस्था उल्लेख गर्दै कार्कीमाथि प्रश्न उठेको छ । बुधबारबाटै कार्की नेतृत्वको सरकार गठन र प्रतिनिधिसभा विघटनविरुद्धका रिटमा सर्वोच्चको संवैधानिक इजलासमा बहस सुरु भएको छ । 

बालुवाटार बैठकमा एमालेले सरकार संविधानको व्यवस्था विरुद्धमा भएको कुरा उठाएको थियो । एमालेका महेश बर्तौलाले असंवैधानिक सरकारले संसद् विघटन गरेको कुरा उठाएका थिए । असंवैधानिक सरकारले विघटन गरेको प्रतिनिधिसभा पुनःस्थापना गरेर वर्तमान राजनीतिक संकट समाधान गर्नुपर्ने बर्तौलाको भनाइ थियो । जवाफमा प्रधानमन्त्री कार्कीले भारतको उदारण दिएको हुन् । नेपालको संविधानले भने पूर्वप्रधानन्यायाधीश र पूर्वन्यायाधीशलाई प्रधानमन्त्री र मन्त्री लगायतका पदमा जान रोक लगाएको छ । 

प्रधानमन्त्री कार्कीले आफ्नो सरकारमाथि संवैधानिक प्रश्न उठेपछि भनेकी थिइन्, 'यहाँ न्यायाधीशका कुरा पनि उठे । संसद् विघटनमा भएका निर्णयका पनि कुरा आए । के न्यायाधीशलाई सांसद, मन्त्री, प्रधानमन्त्री, राष्ट्रपति बन्न संविधानले रोकेको छ ? न्यायाधीश भइसकेको व्यक्ति चुनाव लड्न पाउँदैन भनेर संविधानमा लेखेको छ ? भारतमा न्यायाधीशहरू सांसद, मन्त्री भएका छन् । यहाँ यो असामान्य परिस्थितिमा हुँदा किन प्रश्न ? अचम्म छ ।'

प्रधानमन्त्री कार्कीको सचिवालयले दिएको जानकारी अनुसार पूर्वन्यायाधीश सिन्हाको प्रसंग पनि उठाएकी थिइन् । 'अनिलजी (अनिलकुमार सिन्हा) लाई अनुरोध गरेर ल्याएको (मन्त्री बनाएको) हुँ । उहाँजस्तो इमानदार र बझेको मान्छे हुँदा धेरै काम सहज भएको छ,' उनले भनेकी थिइन् ।

कार्कीले सरकारले राम्रो काम गरिरहेको र आगामी दिनमा पनि त्यस्ता काम गर्ने प्रतिबद्धता जनाएकी थिइन् । 'हेर्दै जानुहोस्, हामीले केके गर्दै छौँ ? हिजो थन्क्याएका फाइल खुलाउँदै छौँ । कति त समातिसकेका छन् । कतिलाई समात्दै छौँ । यदि भ्रष्टाचार गरेको भेटिए मेरै स्वर्गीय बुबालाई पनि लगेर खोरमा थुन्न तयार छु । त्यो दृढताका साथ हामी अघि बढेका छौँ,' कार्कीको भनाइ थियो । 

सरकारमा चुनाव केन्द्रित रहेको पनि कार्कीको भनाइ थियो । 'हामी चुनावमा केन्द्रित छौँ । प्रत्येक दिन यसैगरी छलफल र गृहकार्य गर्छौँ । कामको प्रगति विवरण लिन्छौँ । समस्याहरु फुकाउन लागिपरेका छौँ । अविश्वासहरू चिर्दै विश्वासको वातावरण बनाउँदै छौँ, आत्मविश्वास उठाउँदै छौँ,' कार्कीले राजनीतिक दलका नेताहरूलाई भनेकी थिइन्, 'प्रहरीको मनोबल पनि बढ्छ । भागेका कैदीबन्दीहरू पनि समातिन्छन् । ३५ वर्षसम्म मनोबल गिराउन लागिपरेकाहरू अहिले मनोबलको कुरा गरिरहेको पनि देख्छु । भ्रष्टाचार, शोषण र विभेदले खस्काइएको मनोबल एकै महिनामा हामी कसरी उठाउँछौँ ? तर, हामी मनोबल उठाउन लागेका छौँ, उठ्छ । किनकि, हामी सपार्ने दिशामा छौँ ।'