जेन–जीले मंगलबार काठमाडौंमा गरेको प्रदर्शनका क्रममा प्रहरी वृत्त महाराजगन्जका प्रहरी सहायक निरीक्षक मिलन राय र प्रहरी जवान उत्तम थापा तथा प्रहरी प्रभाग कोटेश्वरका सहायक हवल्दार अमृत गुरुङले ज्यान गुमाएका हुन्।
What you should know
काठमाडौँ — जेन–जीले मंगलबार काठमाडौंमा गरेको प्रदर्शनका क्रममा तीन प्रहरीले ज्यान गुमाए । उनीहरूमा प्रहरी वृत्त महाराजगन्जका प्रहरी सहायक निरीक्षक मिलन राय र प्रहरी जवान उत्तम थापा तथा प्रहरी प्रभाग कोटेश्वरका सहायक हवल्दार अमृत गुरुङ छन् ।
प्रहरी सहायक निरीक्षक मिलन रायको दरबन्दी रामेछापमा हो तर उनी प्रहरी वृत्त महाराजगन्जमा अपराध अनुसन्धान तथा कारबाही शाखामा काजमा कार्यरत थिए । २४ भदौमा उनी सिभिल पोसाकमा काममै थिए ।
प्रदर्शनकारीको हूल आएर प्रहरी वृत्त महाराजगन्ज आगो लगाउने क्रममा उनीमाथि कुटपिट भयो । त्यही क्रममा उनको ज्यान गयो । मिलनलाई सडकमा घिसारेर, लात्तीले हानेर मारेको फोटो भिडियो सामाजिक सञ्जालमै छ ।
‘मैले २ बजे छोरा मिलनलाई फोन गरेको थिएँ । उसले सुरक्षित छु, सटर भित्र बसेको छु भनेको थियो,’ मिलनका काका केशव रायले भने, ‘त्यसको केहीबेरमा ऊ नै नरहेको खबर आयो ।’
सिन्धुलीको दुधौली नगरपालिका ८ का मिलन डेढ वर्षकै उमेरमा टुहुरा भएका थिए । ब्लड क्यान्सरले बुबाको मृत्यु भएपछि उनकी आमा विक्षिप्त भएकी थिइन्, केही महिनामै प्राण त्यागिन् । काका केशवले अभिभावकको जिम्मेवारी लिए । मिलनले एसएसलसी प्रथम श्रेणीमा पास गरे, व्यवस्थापनमा स्नातक सके ।
मिलन २०७४ सालमा प्रहरी सहायक निरीक्षक पदमा भर्ती भएका थिए । उनको बिहे एक वर्षअघि मात्र भएको थियो । उनकी श्रीमती अध्ययनका लागि ४ महिनाअघि मात्र जापान पुगेकी थिइन् । ३० वर्षीय मिलनलाई चिन्नेहरू उनी इमानदार प्रहरी भएको बताउँछन् ।
...
प्रहरी प्रभाग कोटेश्वरमा सेवामा रहेकै समयमा ३२ वर्षीय प्रहरी सहायक हवल्दार अमृत गुरुङ २५ भदौमा प्रदर्शनकारीको आक्रमणमा परे । उनी भाग्न खोज्दा पनि जोगिएनन् । कुटपिटबाट सख्त घाइते भएका उनलाई दिउँसो १ः३० मा बीएन्डबी अस्पताल पुर्याइएको थियो । अस्पतालले ४ः४५ मा मृत घोषणा गर्यो । कास्की रूपा गाउँपालिका ५ का अमृत परिवारको एक्लो छोरा थिए ।
उनी १५ असोज २०७० मा प्रहरी सेवामा प्रवेश गरेका थिए । सेवाकै क्रममा पाल्पा, मुगु, सुर्खेत हुँदै २ वर्षअघि उनी काठमाडौं आइपुगेका थिए । अमृतकी आमाको ९ महिना अघिमात्र ब्रेन ह्यामरेजबाट मृत्यु भएको छ । परिवारजनका अनुसार आमाको उपचार गर्दा लागेको समेत गरेर २३ लाख जति ऋणमा अमृत थिए ।
उनको गाउँमा आफ्नै घरसमेत छैन । उनी आफन्तको घरमा बस्छन् । एक दिदी र एक बहिनीको बिहे भइसकेको छ । अहिले घरमा बाजे, बुबा, श्रीमती र एक वर्षको छोरा छन् ।
...
प्रहरी वृत्त महाराजगन्जमा कार्यरत प्रहरी जवान उत्तम थापाले २४ भदौमा प्रदर्शनकारीको आक्रमणमा परी ज्यान गुमाए । उनका भाइ ७ महिनाअघि मात्र घाँसदाउरा गर्दा भीरबाट खसेर बितेका थिए ।
दुई सन्तानकी आमा अहिले गाउँमा एक्ली भएकी छन् । उत्तमका बुबाको मधुमेहका कारण पहिले नै मृत्यु भएको थियो । उत्तमकै जागिरले उनको घर चल्दै आएको थियो । दार्चुला लेकम गाउँपालिका ३, गुमाखोली घर भएको थापा परिवारमा उब्जनीले पुग्ने जमिनसमेत छैन ।
३० वर्षीय उत्तम ९ वर्षदेखि प्रहरी सेवामा थिए । ‘४ दिनपछि घर आउँछु भनेर खबर गरेका रहेछन्,’ उनको वडाका अध्यक्ष सुरेश थापाले भने, ‘आन्दोलनकै दिन पनि साथीभाइसँग आफू सुरक्षित रहेको भनेर फोन गरेका थिए रे, पछि मृत्युको खबर आयो ।’
