सुनसरी — इटहरी (सुनसरी) का अभिषेक श्रेष्ठ परिवारको आर्थिक अवस्था सुधार गर्न संघर्ष गरिरहेका थिए । तर परिवारमा उज्यालो ल्याउने उनको सपना त्यसै चुँडियो । भदौ २४ को प्रदर्शनले रणमैदान बनेको इटहरीमा प्रहरीको गोली लागेर उनीहरू ढले ।

उनीहरूको परिवार अहिले शोकमा डुबेको मात्रै छैन, आशाको उज्यालो पनि निभेको छ ।

प्रहरीको गोली लागेर मृत्यु भएका २३ वर्षीय अभिषेक श्रेष्ठ वैदेशिक रोजागरीमा जाने अन्तिम तयारीमा थिए । सुनसरीको रामधुनी नगरपालिकाको तित्रिबना स्थायी घर भएका श्रेष्ठ साउदी अरब जान केहीअघि मात्र काठमाडौंमा कागजपत्र बुझाएर आएका थिए ।

भिसासमेत आइसकेको श्रेष्ठको परिवारले जानकारी दिएको छ । भदौ २४ को प्रदर्शनमा सहभागी श्रेष्ठलाई प्रहरीले सिधै हानेको गोली कुममा लाग्यो । उनी नगरपालिका अगाडिको सडकमा ढले । अत्यधिक रक्तस्राव भयो । उनको घटनास्थलमै ज्यान गयो ।

इटहरी–५ भाडामा बस्दै आएका श्रेष्ठ इटहरीकै एक होटलमा पार्टटाइम फोटोग्राफीको काम गर्थे । नेपालको आम्दानीले परिवार चलाउन गाह्रो भएपछि उनी वैदेशिक रोजगारीमा जाने निर्णयमा पुगेको परिवारले जानकारी दिएको छ ।

विदेश जानकै लागि उनले केही समयअघि काठमाडौंमा वारिष्टाको तालिम लिएका थिए । तालिम सकेर म्यानपावरमा कागजपत्र बुझाएर घर फर्किएका उनी साउदी उड्ने अन्तिम तयारीमा थिए । तर साउदी उड्नुअघि उनको चोला उड्यो ।

प्रहरीले ताकेरै गोली हानी हत्या गरेको श्रेष्ठकी आमा दाबी गर्छिन् । छोराले ज्यान गुमाउँदा काख रिक्तिएको भन्दै अरु कसैलाई पनि यस्तो बज्रपात नपरोस्, उनकी आमा भन्छिन् । देशका लागि ज्यान गुमाउने आफ्नो छोराको सालिक बनाएर इटहरीको मुख्य चोकमा राख्नुपर्ने श्रेष्ठको परिवारको माग छ ।

सम्बन्धित समाचार