काठमाडौँ — बाजुराको विकटमा पर्ने स्वामीकार्तिक खापर गाउँपालिका–२ सुपाना गाउँका मअडीपाल बुढाका माइला छोरा २१ वर्षीय योजन बुढा (ओजन) काठमाडौंको पशुपति क्याम्पसमा स्नातक अध्ययनरत थिए ।

काठमाडौंमा डेरा गरी बस्ने योजन जेन–जी प्रदर्शनका क्रममा भदौ २३ मा बेखबर भएका थिए । भदौ २७ मा उनलाई बीएन्डबी अस्पतालमा आफन्तहरूले मृत अवस्थामा फेला पारेका थिए ।

योजन परिवारको आर्थिक अवस्था अत्यन्तै कमजोर थियो । मअडीपालले भारतमा मौसमी मजदुरी गरेर जहान पाल्थे । आयआर्जनका अन्य उपाय नभएकाले छोराहरूलाई उच्च शिक्षा पढाउने अवस्था थिएन । मअडीपालकै अनुरोधमा योजनलाई कक्षा ३ देखि नै कोल्टी घर भएकी शारदा सिंहले आश्रय दिएर एसईईसम्म पढाएकी थिइन् ।

प्लस टु पढ्नका लागि योजन आफैं काठमाडौं गए । काठमाडौंमा आएपछि कानुन विषय लिएर प्लस टु गरे । पढाइलाई निरन्तरता दिनका लागि उनी पाएको जुनसुकै काम गर्दै डेरा गरेर पशुपति क्याम्पसमा स्नातक अध्ययनरत थिए ।

प्रदर्शनका क्रममा बेपत्ता भएका योजनलाई टाउकामा गहिरो घाउ र एउटा हात भाँचिएको अवस्थामा अस्पतालमा शव भेटिएको स्वामीकार्तिक खापर गाउँपालिकाका अध्यक्ष भरतबहादुर रोकायाले बताए ।

योजनको मृत्युको खबर पाउनेबित्तिकै गाउँपालिकाले नै उनका बुबा मअडीपाल र आमा चौपतालाई काठमाडौं पुर्‍याउन सहजीकरण गरेको थियो । २८ भदौमा अभिभावकले शव बुझेर दाहसंस्कार गरेपछि अहिले बुबाले पशुपतिमै काजकिरिया गरिरहेका छन् ।

सम्बन्धित समाचार 

सानैदेखि निडर अनि हक्की थिए विनोद

देशको मुहार फेर्न छातीमै गोली थाप्न तयार दिलनारायण

छिनभरमै ढल्यो सहारा

प्रहरी परिवारमा चोटमाथि चोट