बानेश्वरमा गोली लागेर निर्मलको ज्यान गुमेपछि बुबा चन्द्रबहादुर र आमा मधुको सपना अधुरो बनेको छ ।
भूमिकास्थान नगरपालिका–४ फलामखिली गाउँमा जन्मिएका १८ वर्षीय निर्मल सारु मगरले १२ कक्षा पास भएर स्नातक पढ्न काठमाडौं आए । पढाइसँगै साइकल किनेर डेलिभरी ब्वाईको काम गरेर कोठाभाडा र खाना खर्च जुटाउन उनले काम थालिसकेका थिए ।
कीर्तिपुरमा डेरा लिएर बसेका उनी जेन–जीको प्रदर्शनका क्रममा सोमबार बिहान साथीहरूसँगै बानेश्वर हिँडे । बुबा चन्द्रबहादुर सारु रोजगारीका लागि कतारमा छन् । बानेश्वरमा गोली लागेर निर्मलको ज्यान गुमेपछि बुबा चन्द्रबहादुर र आमा मधुको सपना अधुरो बनेको छ ।
स्थानीय भगवती आधारभूत विद्यालय हुँदै शान्ति मावि धारापानीबाट एसईई गरेपछि उनले बुटवलको कान्ति माविमा म्यानेजमेन्ट पढेका थिए । दुई महिनाअघि मात्र घरबाट काठमाडौंमा आएका उनी १२ कक्षामा राम्रो अंक ल्याएर यसै वर्ष उत्तीर्ण भएका थिए ।
‘पढ्दै कमाउँदै गरेर बुबालाई वैदेशिक रोजगारबाट फिर्ता बोलाउँछु भन्थे । सबै सपना चकनाचुर भयो,’ उनका छिमेकी दाइ विष्णु पुनले भने । आन्दोलनमा छोराको निधन भएको खबरले बुबा चन्द्रबहादुर काठमाडौं आइपुगेका छन् ।
दुई छोरा र एक छोरीलाई पढाउनकै लागि उनी दशकदेखि कतारमा रोजगारीमा छन् । पछिल्लो समय घरमा आएर कतार गएको आठ महिना भएको थियो । ‘मलाई छोराले मैले काम गर्न थालेपछि तपाईं विदेश जाने होइन भन्थ्यो,’ चन्द्रबहादुरले भने, ‘छोराछोरीलाई पढाउन म कतार गएको हुँ । जेठो छोरोले पढेर काममा लाग्यो भने भाइबहिनीलाई पनि बाटो देखाउँथ्यो, मलाई पनि सहज हुन्थ्यो भन्ने आशामा थिएँ, सबै सपना चकनाचुर भयो ।’
चन्द्रबहादुरका कान्छो छोरा १२ वर्ष र छोरी ९ वर्षका छन् । केही दिनअघि निर्मलले आमालाई फोनमा तलब पाएपछि दसैंमा आउँदा सबैलाई कपडा ल्याइदिन्छु भनेका थिए । ‘छोरालाई ११ र १२ कक्षा बुटवलमा पढाएँ, काठमाडौं गएर डिप्लोमा पढ्छु भनेपछि मैले हुन्छ भनेको थिएँं,’ चन्द्रबहादुरले भने, ‘काठमाडौंमा पढ्दै जागिर गरेर भविष्य राम्रो बनाउँछु बाबा, केही चिन्ता नगर्नुस् भन्थ्यो । के गर्नु सरकारको गोलीबाट मेरो छोरो गुम्यो ।’ - विवरणहरू अद्यावधिक गरी सम्पादन गरिएको ।
