४ सांसदको सनाखत नहुने- समाचार - कान्तिपुर समाचार
कान्तिपुर वेबसाईट
AdvertisementAdvertisement

४ सांसदको सनाखत नहुने

मकर श्रेष्ठ

काठमाडौँ — निर्वाचन आयोगले प्रस्तावित नेकपा (एकीकृत समाजवादी) मा जान चाहने चार सांसदको सनाखत नगर्ने भएको छ । एमाले परित्याग गरी नयाँ पार्टीमा जान निवेदन दिए पनि दल दर्ताको निवेदनमा नाम समावेश नभएको भन्दै आयोगले सनाखत नगर्ने निर्णय गरेको हो । 


नयाँ पार्टीको केन्द्रीय सदस्यको मान्यता पाउन सनाखत नै नभएपछि उनीहरूलाई उक्त पार्टीको सांसद र केन्द्रीय सदस्यको मान्यतासमेत नदिने आयोगले जनाएको छ । अब उनीहरू एमालेकै सांसद भएको मानिनेछ । एमालेले उनीहरूलाई दल त्यागको आरोपमा कारबाही गर्न सक्ने सम्भावना पनि उत्तिकै रहन्छ । कारबाही गरेमा उनीहरूको सांसद पद गुम्न सक्छ । प्रतिनिधिसभाका झलनाथ खनाल, सोमप्रसाद पाण्डे, माया न्यौपाने र राष्ट्रिय सभाका शारदा भट्टको सनाखत नहुने आयोगको भनाइ छ । माधवकुमार नेपाल नेतृत्वको नयाँ पार्टीमा आउन नाम समावेश भए पनि हस्ताक्षर नभएका कारण खनाल र भट्टलाई आयोगले सनाखत नगर्ने भएको हो । यस्तै, नयाँ पार्टीमा जाने भन्दै आयोगमा मंगलबार निवेदन दिएका पाण्डे र न्यौपानेको पनि सनाखत नहुने आयोगले जनाएको छ ।

दिल्लीमा उपचाररत खनालले दिल्लीस्थित नेपाली दूतावासमार्फत सनाखत गर्ने व्यवस्था गरिदिन आयोगमा मंगलबार निवेदन दिएका थिए । दल दर्ता गर्न दिएको सूची र दूतावासमार्फत सनाखत गर्न सहजीकरण गरिदिन दिएको निवेदनमा खनालको हस्ताक्षर नभएको आयोगले जनाएको छ । नयाँ दल दर्ता गर्न चाहनेले आफूसँग साविक पार्टीका २० प्रतिशत भएको दाबी गरे पनि आयोगले कार्यालयमै उपस्थित गराई हस्ताक्षर गरेर प्रमाणित गर्न लागेको हो । ‘कानुनअनुसार आयोगमा सुरुमा एकमुष्ट निवेदन दिएकालाई मात्रै सनाखत गराउँछौं,’ निर्वाचन आयोगका सचिव सुरेश अधिकारीले भने ।

राजनीतिक दलसम्बन्धी नियमावलीको नियम ५ को उपनियम ५ मा साविकको दलको केन्द्रीय समिति वा संघीय संसद्को २० प्रतिशत समर्थन रहे/नरहेको विषयमा समेत जाँचबुझ गर्न सदस्यहरूलाई आयोगमा उपस्थित गराएर सनाखत गराउन सक्ने प्रावधान छ । ‘ऐन र नियमावलीको यही प्रावधानको कारण प्रत्यक्ष उपस्थित नहुनेलाई सनाखत गराउन सकिँदैन,’ आयोगका सचिव अधिकारीले भने । एमाले छाडेर नयाँ दलमा आउन सांसद पाण्डे, न्यौपाने, भट्टसँगै केन्द्रीय सदस्य राजन राईले मंगलबार आयोगमा निवेदन दिएका हुन् ।

दल दर्ताका लागि दिएको सूचीमा नाम भएको तर हस्ताक्षर नभएकाको पनि सनाखत नहुने सचिव अधिकारीलेे बताए । एमालेमा रहेका ३१ सांसद र ५८ केन्द्रीय सदस्यसहितलाई समेटेर नेेकपा (एकीकृत समाजवादी) पार्टी दर्ता गर्न निवेदन दिइएको थियो । तर, हस्ताक्षर नभएकै कारण २९ सांसद र ५५ केन्द्रीय सदस्यको मात्रै सनाखत गराउने आयोगले जनाएको छ । संघीय संसद्का ३१ मध्ये शारदादेवी भट्ट र शान्तिकुमारी अधिकारी जीसीको हस्ताक्षर थिएन । अधिकारीको नाम दुई ठाउँमा समावेश गरिएको थियो । त्यसैले आयोगले २९ जना सांसदको मात्रै सनाखत गराउन लागेको हो ।

प्रकाशित : भाद्र ९, २०७८ ०७:५९
प्रतिक्रिया
पठाउनुहोस्

युवा खेलाडीको वर्चस्व

महिला एसियन कप २०२२ छनोट खेल्ने नेपाली महिला टिममा ७ नयाँ खेलाडीले अवसर पाएका छन्
कान्तिपुर संवाददाता

काठमाडौँ — सात नयाँ खेलाडीलाई समावेश गर्दै मुख्य प्रशिक्षक ग्यारी फिलिप्सले एएफसी महिला एसियन कप २०२२ छनोटका लागि २३ सदस्यीय नेपाली टिम मंगलबार घोषणा गरेका छन् ।

राष्ट्रिय लिगमा लागेको चोटका कारण ‘गोल मेसिन’ सावित्रा भण्डारीले सात वर्षयता पहिलोपल्ट राष्ट्रिय टिमको खेल गुमाउँदै छन् । उनी घुँडाको शल्यक्रियापछि कतारमै ‘रिह्याबिलिटेसन’ गरिरहेकी छन् । १३ औं दक्षिण एसियाली खेलकुद (साग) पछि कप्तान नीरु थापा र डिफेन्डर मनमाया लिम्बूले संन्यास लिएका थिए । नेपाली सेनाकी डिफेन्डर कविता धिमाल मिसनमा खटिएकी छन् । १३ औं सागका अरू १६ खेलाडीले प्रशिक्षक फिलिप्सको टिममा पनि निरन्तरता पाएका छन् ।

डिफेन्डर निशा थोकर, विमला विक, सिर्जना सिंह, एपीएफकी मिडफिल्डर प्रीति राई, अग्रपंक्तिका रश्मीकुमारी घिसिङ, सविता राना र रजनी थोकरले पहिलोपल्ट राष्ट्रिय टिममा स्थान बनाएका छन् । उनीहरू पछिल्लोपल्ट यू–१९ टिम र लिगमा उत्कृष्ट प्रदर्शन गर्दै राष्ट्रिय टिममा पुगेका हुन् । एन्फाका टेक्निकल डाइरेक्टरसमेत रहेका प्रशिक्षक फिलिप्सले २८ जनाबाट अमिशा कार्की, अञ्चली वाइबा, हिमा चौधरी, मनीषा राउत र शर्मिला थापालाई बाहिर राख्दै एसियन कप छनोटका लागि २३ सदस्यीय नेपाली टिम घोषणा गरेका हुन् ।

गोलकिपरमा कुनै परिवर्तन भएन । एन्जिला तुम्बापो सुब्बा, अञ्जना रानामगर र उषा नाथले निरन्तरता पाए । डिफेन्समा निशा, विमला र सिर्जनासँगै अमृता जैशी, गीता राना, हीराकुमारी भुजेल, पूजा राना र पूनम जर्घामगर छन् । सरु लिम्बु, अनिता बस्नेत, विमला चौधरी, दीपा राई, इन्दिरा राई, मन्जलीकुमारी योन्जन, रेनुका नगरकोटे र प्रीति मिडफिल्डमा छन् । सावित्राविहीन फरवार्डलाइनमा अनिता केसी, रजनी, रश्मी र सविता छनोट भएका छन् ।

पोखरा रंगशालामा १३ औं सागमा स्वर्णको प्रतिस्पर्धामा भारतसँग २–० ले हारेको (डिसेम्बर २०१९) नेपाली महिला टिम मैदानमा ओर्लिएको छैन । नेपाल एसियन कप छनोटमा हङकङ र फिलिपिन्ससँगै समूह ‘एफ’ मा रहेको छ । आयोजना गर्ने अवसर पाएर पनि कोभिड–१९ का कारण उज्वेकिस्तानको जेएआर रंगशालामा सारिएको छनोटमा नेपालले फिलिपिन्सविरुद्ध सेप्टेम्बर १८ र हङकङविरुद्ध सेप्टेम्बर २१ मा खेल्नेछ । आठ समूहका शीर्ष टिमसहित १२ देशले जनवरी–फेब्रुअरी २०२२ मा भारतमा हुने एसियन कपमा प्रतिस्पर्धा गर्नेछन् ।

अभिषेक पनि बाहिरिए

काठमाडौं– साफ च्याम्पियनसिप २०२१ को तयारीमा रहेको पुरुष टिमलाई मुख्य प्रशिक्षक अब्दुल्लाह अल्मुताइरीले तीन खेलाडीलाई हटाउँदै २५ सदस्यीय बनाएका छन् । विश्वकप २०२२/एसियन कप २०२३ छनोटको दोस्रो चरणमा टिममा रहेका फरवार्ड अभिषेक रिजाल पनि बाहिरिए । उनीसँगै पोखरामा भइरहेको बन्द प्रशिक्षणबाट गोलकिपर अर्पण कार्की र फरवार्ड शिशिर लेखीलाई प्रशिक्षक अल्मुताइरीले मंगलबार हटाएका हुन् ।

अर्पण बाहिरिएपछि गोलकिपरमा चार खेलाडी (किरण चेम्जोङ, दीप कार्की, विशाल श्रेष्ठ र विकेश कुथु) रहेका छन् । अन्य खेलाडीमा आशिष लामा, अनन्त तामाङ, अञ्जन विष्ट, आयुश घलान, विशाल राई, दिनेश राजवंशी, गौतम श्रेष्ठ, कमल थापा, मनीष डाँगी, नवयुग श्रेष्ठ, नितिन थापा, पुजन उपरकोटी, राजन गुरुङ, रोहित चन्द, सन्तोष तामाङ, सुजल श्रेष्ठ, सुमन अर्याल, सुमन लामा, सुनील बल, सुरजज्यू ठकुरी र तेज तामाङ छन् । माल्दिभ्समा अक्टोबर १–१६ मा हुने साफ च्याम्पियनसिप तयारीमा नेपाली टिमले भारतविरुद्ध दुई मैत्रीपूर्ण खेलमा प्रतिस्पर्धा गर्दै छ । खेल दशरथ रंगशालामा सेप्टेम्बर २ र ५ मा हुनेछ ।

प्रकाशित : भाद्र ९, २०७८ ०७:५७
पूरा पढ्नुहोस्
प्रतिक्रिया
पठाउनुहोस्
×