मोफसलमा पनि बढ्दै संक्रमण- समाचार - कान्तिपुर समाचार

मोफसलमा पनि बढ्दै संक्रमण

मत्थर हुँदै गएको संक्रमण पुनः बिस्तारै उकालो लाग्दा परीक्षण र उपचार गराउन स्वास्थ्य संस्थामा चाप 
प्रदेश ब्युरो

काठमाडौँ — देशभर कोरोना संक्रमण फेरि विस्तार हुन थालेको छ । जसका कारण देशका विभिन्न स्थानका अस्पतालहरूमा बिरामीको चाप बढ्न थालेको छ । प्रदेश १ मा कोभिड–१९ परीक्षण गरिएकामध्ये ३० दशमलव ६३ प्रतिशतमा संक्रमण पुष्टि भएको छ ।

जिल्ला अस्पताल ताप्लेजुङको कोभिड उपचार केन्द्रमा उपचार गराइरहेका बिरामी । १० शय्याको केन्द्रमा नअटेका बिरामीलाई जनरल वार्डमा अरू बिरामीसँगै राख्दाजोखिम बढेको छ । तस्बिर : आनन्द गौतम/कान्तिपुर

संक्रमितमध्ये विराटनगरस्थित कोसी अस्पतालको कोभिड–१९ उपचार केन्द्रका आईसीयू, भेन्टिलेटर, एचडीयू पूर्ण रूपमा भरिएका छन् । केन्द्रमा २१ आईसीयू, १५ भेन्टिलेटर, ४७ एचडीयू र २८ जेनेरल शय्या छन् । अस्पतालका अनुसार ४ संक्रमित जेनेरल शय्यामा भर्ना भएका छन् । यस्तै, कोसी अस्पतालको आईसीयूमा २० र भेन्टिलेटरमा ५ जना बिरामी भर्ना छन् ।

झापाको मेची अस्पतालको एचडीयूमा २३ र जेनेरलमा १५ गरी ३८ जना उपचाररत छन् । अस्पतालमा ५८ जेनेरल, ४ आईसीयू, ५ भेन्टिलेटर, ५० एचडीयू गरी कुल १ सय १७ शय्या छन् । विराटनगरस्थित नोबेल अस्पतालको कोभिड वार्डमा आईसीयूमा १ र एचडीयूमा २ गरी ३ जना उपचाररत छन् । अस्पतालमा ८२ आईसीयू, २९ भेन्टिलेटर, १ सय १५ एचडीयू बेड छन् । यस्तै, विराट शिक्षण अस्पतालको कोभिड वार्डअन्तर्गत ४० संक्रमित उपचाररत छन् । अस्पतालमा ३३ आईसीयू, १७ भेन्टिलेटर र ९३ एचडीयू गरी १ सय २६ शय्या छन् । न्युरो अस्पतालमा १९ संक्रमित उपचाररत छन् ।

झापाको बिर्तामोडस्थित बीएन्डसी अस्पतालका २ सय शय्यामध्ये ३३ मा बिरामी छन् । त्यस्तै, सुनसरीको धरानस्थित बीपी कोइराला स्वास्थ्य विज्ञान प्रतिष्ठानको कोभिड–१९ अस्पतालमा पनि एक सातायता उपचार गराउन आउने संक्रमितको संख्या बढेको छ । प्रतिष्ठानका सहप्रवक्ता डा. चूडामणि पोखरेलका अनुसार हाल ५९ संक्रमितको उपचार भइरहेको छ ।

प्रदेश २ मा पनि बढ्दो

स्वास्थ्य निर्देशनालयका अनुसार प्रदेश २ मा संक्रमितको संख्या सातायता थपघट भइरहेको छ । पछिल्ला दिनहरूमा पीसीआर परीक्षण गराउनेको संख्या न्यून छ । तर, भाइरसको जस्तो लक्षण देखिएका बिरामीको अस्पताल र क्लिनिकमा भने भीड बढेको छ । वीरगन्जको नारायणी अस्पताल र तराई अस्पतालमा १/१ संक्रमित उपचारत छन् । प्रदेशभर बुधबार जम्मा १८ संक्रमित थपिएका छन् ।

वाग्मतीमा दैनिक संक्रमण बढ्यो

वाग्मती प्रदेशअन्तर्गत (काठमाडौं उपत्यकाबाहेक) का जिल्लामा दैनिक रूपमा कोरोना संक्रमण बढ्दो छ । मकवानपुरमा बुधबार थप ६७ जनामा संक्रमण भएको पुष्टि भएको छ । जिल्लामा पछिल्लो २४ घण्टामा १ सय ५९ जनामा पीसीआर र ७४ जनामा एन्टिजेन परीक्षण गर्दा क्रमशः ५१ जना र १६ जना गरी थप ६७ जनामा कोरोना पुष्टि भएको स्वास्थ्य कार्यालय मकवानपुरका प्रमुख प्रणय उपाध्यायले बताए । मंगलबार ६६ संक्रमित थपिएका थिए । जिल्लामा हाल ५ सय ५२ संक्रमित छन् । तीमध्ये हेटौंडा अस्पतालमा २८ जना उपचाररत रहेका हेटौंडा अस्पतालका अध्यक्ष राजेश प्रसाईंले बताए ।

यसैगरी चितवनमा संक्रमितको संख्या असार दोस्रो सातायता निरन्तर बढ्दो छ । चितवन स्वास्थ्य कार्यालयका अनुसार १ सय १३ जना संक्रमितको भरतपुरका सरकारी र शिक्षण अस्पतालमा उपचार भइरहेको छ । भरतपुर अस्पतालका डा. प्रमोद पौडेल अस्पतालमा संक्रमितको चाप बढ्न थालेको बताउँछन् । काभ्रेमा साउन १ यता ६ सय ९९ संक्रमित थपिएका छन् । तीमध्ये ५६ जना बुधबार थपिएका हुन् । धुलिखेल अस्पतालका आकस्मिक सेवा विभाग प्रमुख डा. सानुकृष्ण श्रेष्ठले अस्पतालमा ३५ संक्रमित भर्ना भएका बताए ।

यस्तै, सिन्धुलीमा साताअघि शून्यमा झरेको संक्रमण फेरि बढ्न थालेको छ । जिल्ला स्वास्थ्य कार्यालयका अनुसार पीसीआर परीक्षणको ४० प्रतिशत हाराहारीमा नतिजा पोजिटिभ आएको छ । सिन्धुलीमाढीको कोभिड अस्पतालमा ४५ जनाको उपचार भइरहेको छ ।

गण्डकीमा अस्पताल भरिँदै

पोखरा स्वास्थ्य विज्ञान प्रतिष्ठान, पश्चिमाञ्चल क्षेत्रीय अस्पतालमा कोभिड आईसीयू खाली छैन । कोभिड बिरामीका लागि ८५ बेड छुट्याइएको छ । तीमध्ये २५ आईसीयू रहेकामा सबै भरिएका हुन् । बुधबारसम्म ३९ एचडीयू बेड पनि भरिएका छन् । आइसोलेसनका २१ मध्ये १० वटामा संक्रमित छन् । पछिल्लो दुई सातायता संक्रमितको संख्या क्रमिक रूपमा बढेको अस्पतालका कोभिड फोकल व्यक्ति डा. डेभिड श्रेष्ठले बताए ।

प्रदेश सरकारले पोखराकै सिसुवामा सञ्चालन गरेको संक्रामक तथा सरुवा रोग अस्पतालमा पनि संक्रमित भरिएका छन् । अस्पतालमा ५७ बेड छन् । तीमध्ये ७ वटै आईसीयू बेड खाली छैनन् । १५ आइसोलेसन बेड सबै भरिएका छन् । ३५ एचडीयू बेडमध्ये १० वटा मात्रै खाली रहेको अस्पतालका कार्यकारी निर्देशक डा.विकास गौचनले बताए । प्रदेश स्वास्थ्य निर्देशनालयको तथ्यांकअनुसार पोखरा निजी अस्पतालमा भर्ना हुने संक्रमितको संख्यामा समेत वृद्धि हुँदै गएको छ । प्रदेशमा सक्रिय संक्रमितको संख्या ३ हजार ८ सय ४५ छन् । तीमध्ये ३ हजार ५ सय २३ होम आइसोलेसनमा छन् ।

लुम्बिनीमा सतर्कता

संक्रमण फेरि बढ्न थालेपछि लुम्बिनी प्रदेशका जिल्लाका अस्पतालहरूमा अक्सिजन प्लान्ट र अक्सिजनसहितका बेड निर्माण सुरु गरिएको छ । बुटवलस्थित कोरोना विशेष अस्पतालका फोकल पर्सन डा. नन्दु पाठकका अनुसार विशेष अस्पतालमा अहिले ५३ बिरामी उपचाररत छन् । अस्पतालमा आईसीयूमा २० बेड क्षमता रहेकामा १७, कोभिड मेडिकल वार्डमा २३ मध्ये २० र आकस्मिकमा सबै १३ बेडमा संक्रमित छन् ।भैरहवास्थित भीम अस्पतालमा हाल १२ जनाको उपचार भइरहेको सूचना अधिकारी डा. सिद्धार्थ पाण्डेले बताए ।

दाङको बेलझुन्डी अस्पतालमा ६ जना उपचाररत रहेका छन् । जिल्लामा उपचाररत संक्रमितको संख्या २० रहेको अस्पतालका व्यवस्थापक द्रोण वलीले बताए । अस्पतालमा संक्रमितका लागि १ सय बेड छुट्याइएको छ । नेपालगन्जको भेरी अस्पतालका मेडिकल सुपरिन्टेन्डेन्ट डा. प्रकाश थापाले अस्पतालमा २२ संक्रमित रहेको जनाए ।

कर्णालीमा अधिकांश होम आइसोलेसनमा

कर्णालीका हिमाली जिल्लामा समेत संक्रमण फैलिएको छ । प्रदेश स्वास्थ्य सेवा निर्देशनालयका अनुसार अहिले कर्णालीमा सक्रिय संक्रमितको संख्या ६ सय ३४ छ । तीमध्ये अधिकांश होम आइसोलेसनमा छन् । सबैभन्दा बढी कर्णाली स्वास्थ्य विज्ञान प्रतिष्ठानको शिक्षण अस्पतालमा २७ जना र त्यसपछि सुर्खेतस्थित प्रदेश अस्पतालमा १५ संक्रमित छन् । कर्णाली प्रदेश अस्पतालका कोरोना फोकल पर्सन डा. केएन पौडेलले पछिल्लो समय संक्रमितको संख्या बढे पनि अस्पतालमा भर्ना हुने कम रहेको बताए । उनका अनुसार प्रदेश अस्पतालको कोभिड विशेष अस्पतालमा २ सय संक्रमितलाई राखेर उपचार गर्न सकिन्छ ।

सुदूरपश्चिममा अस्पताल जाने कम

सुदूरपश्चिममा पनि केही दिनयता संक्रमण बढेको छ । तर, विगतजस्तै गम्भीर खालका बिरामीको संख्या भने न्यून छ । धनगढीस्थित सेती प्रादेशिक अस्पतालमा बुधबारसम्म २० जनाको उपचार भइरहेको छ । अस्पतालका सूचना अधिकारी दिलीप श्रेष्ठका अनुसार तीमध्ये २ जना बुधबार भर्ना भएका हुन् ।

प्रदेशकै दोस्रो ठूलो अस्पताल महाकाली प्रादेशिक अस्पताल कञ्चनपुरमा २ संक्रमित उपचाररत छन् । सेती अस्पताल धनगढीमा संक्रमितका लागि ७९ बेड छन् । कञ्चनपुरको महाकाली अस्पतालमा ५० बेड छन् । महाकाली र कैलालीको टीकापुरमा ५० बेड थप्ने तयारी भइरहेको छ । बझाङ, बाजुरा, अछाम, दार्चुला, बैतडी र डोटीलगायत जिल्लामा हालसम्म कोरोनाका बिरामीका लागि प्रत्येक जिल्ला अस्पतालमा १० बेड छन् ।

-देवनारायण साह (मोरङ), प्रदीप मेन्याङ्बो (सुनसरी), अजित तिवारी (जनकपुर), प्रताप विष्ट (हेटौंडा), रमेशकुमार पौडेल (चितवन), नगेन्द्र अधिकारी (काभ्रे), राजकुमार कार्की (सिन्धुली), दीपक परियार (पोखरा), सन्जु पौडेल (लुम्बिनी), दुर्गालाल केसी (दाङ), ठाकुरसिंह थारू (नेपालगन्ज), चाँदनी कठायत (वीरेन्द्रनगर) र चित्रांग थापा (धनगढी)

प्रकाशित : श्रावण १४, २०७८ १२:०६
प्रतिक्रिया
पठाउनुहोस्

कोभिडमा अनौपचारिक कक्षा

श्यामसुन्दर शशि

जनकपुर — निर्माणाधीन पक्की घरको खुला कोठामा मंगलबार ६ वर्षीया सकिता मण्डल नेपाली विषय अभ्यास गर्दै थिइन् । सँगै थिए, १० वर्षीय अन्दारुल राइन । एउटै कक्षाकोठामा भुइँमा पलेटी कसेर अरू चार बालबालिका पनि अभ्यास गर्न व्यस्त थिए । 

धनुषाको सबैलामा पढ्दै विद्यार्थी । तस्बिर : श्यामसुन्दर/कान्तिपुर

उनीहरूलाई सहयोग गर्दै थिइन्, शिक्षिका पूजा गुप्ता । मास्क लगाएका उनीहरू भौतिक दूरी कायम गरेरै कक्षाकोठामा बसेका थिए । बरन्डामा खानेपानी र सेनिटाइजर राखिएको छ । सबैलाई हात सेनिटाइज गरेर मात्र कक्षाकोठाभित्र प्रवेश गर्ने नियम छ । धनुषाको पूर्वोत्तर सबैला नगरपालिका–८ ठिल्ला जदुवामा मध्याह्नको कक्षा सञ्चालन भइरहेको उक्त घरभन्दा १ सय ५० मिटर दक्षिणमा पनि यस्तै अनौपचारिक कक्षा सञ्चालित थियो । जसमा मुस्लिम समुदायका बालबालिका मात्र अध्ययनरत थिए । मुस्लिम बालबालिका आफ्नो धार्मिक पुस्तकसँगै नेपाली, गणित, विज्ञानजस्ता विषयको पनि अभ्यास गर्दै थिए । सहयोगीको भूमिकामा थिए, स्थानीय मदरसा दारुल होदाका मोलवी (शिक्षक) मोहम्मद सहजाद आलम ।

अनौपचारिक कक्षा सञ्चालित यी दुई स्थानभन्दा मुस्किलले १ सय मिटर दायाँ र बायाँमै छन्, सरस्वती जनता उच्च माध्यमिक विद्यालय र मदरसा दारुल होदा । यी दुईसँगै सबैलामा सञ्चालित अन्य २५ सामुदायिक विद्यालय र ९ वटा मदरसा वैशाख १० गतेदेखि बन्द छन् । तर गत वर्षको बन्दाबन्दीदेखि नै सबैला नगरपालिकाको टोलटोलमा यस्ता २ सय १० वटा अनौपचारिक कक्षा भने सञ्चालनमै छ । जसमा १ हजार ५० बालबालिका दुई सिफ्टमा नियमित अध्ययन गर्दै छन् । अनौपचारिक शिक्षा लिनेहरूमा अधिकांश विभिन्न विद्यालयका विद्यार्थी छन् भने केही नयाँ पनि छन् । अनौपचारिक शिक्षा पूरा भएपछि उनीहरूलाई क्षमताअनुसारको कक्षामा भर्ना गर्ने सहमति स्थानीय सामुदायिक विद्यालयहरूसँग भइसकेको शिक्षिका राखीकुमारी राउतले जानकारी दिए ।

पालिकामा अनौपचारिक कक्षा सञ्चालन गर्न आसमान नेपालले बालबालिकाको अध्ययन/अध्यापनमा सहजीकरण गर्न १ सय ५ स्वयंसेवक, १० जना बिग सिस्टर (ठूल्दिदी), ५ जना सामाजिक परिचालक तथा एक जना पालिका संयोजक नियुक्त गरेको छ । आसमान नेपालका कार्यकारी निर्देशक नवलकिशोर यादवले भने, ‘समाजलाई बालश्रममुक्त बनाउने हाम्रो उद्देश्य हो । यसका लागि शतप्रतिशत बालबालिका विद्यालयमा हुनुपर्छ । यही उद्देश्य लिएर सबैलासँगै धनुषाका चार पालिकामा अनौपचारिक शिक्षा प्रारम्भ गरेका हौं ।’

कोभिड–१९ को कारण सामुदायिक विद्यालय बन्द रहेको तथा कोभिड प्रोटोकलअनुसार शैक्षिक गतिविधि सञ्चालन गर्नुपर्ने अवस्थामा पनि आसमानले धनुषाका सबैला, नगराइन, गणेशमान चारनाथ नगरपालिका तथा लक्ष्मीनिया गाउँपालिकामा बालबालिकाको जन्मदर्ता, विद्यालय भर्ना, पठनपाठन, स्वास्थ्य, खानेपानी, खेलकुद गतिविधि चलाएको छ । यस्तै बालविवाह र दाइजो प्रथाविरुद्ध अभियान पनि सञ्चालन गरेको छ ।

सबैला–८ ठिल्ला जदुवास्थित जनता राष्ट्रिय आधारभूत विद्यालय व्यवस्थापन समितिका अध्यक्ष राजेन्द्रकुमार रायले बालबालिकालाई विद्यालय भर्ना गराए पनि टिकाइराख्नु ठूलो चुनौती रहेको बताए । आसमान नेपालका सामाजिक परिचालक सुशाषचन्द्र यादवका अनुसार बालबालिकालाई विद्यालय भर्ना गराउन नियमित घरदैलो कार्यक्रम गरिन्छ । पालिकामा युवा सञ्जाल, अभिभावक सञ्जाल, बालक्लब, छात्रा सञ्जाल, मदरसा समूह गठन गरिएको छ ।

‘संघीय सरकारको प्रोटोकलका कारण सामुदायिक विद्यालयहरूमा चाहेर पनि गतिविधि सञ्चालन गर्न सकिएको छैन । अन्य शैक्षिक गतिविधिहरू पनि प्रभावित हुने अवस्था छ,’ सबैलाका प्रमुख विजयशंकर साहले भने । सबैला–८ ठिल्लास्थित सरस्वती उच्च माध्यमिक विद्यालयका प्रधानाध्यापक नथुनी साहले भौतिक उपस्थितिमा पठनपाठन हुन नसके पनि विद्यालय भर्ना, अनलाइन कक्षा नियमित भइरहेको बताए ।

प्रकाशित : श्रावण १४, २०७८ १२:०३
पूरा पढ्नुहोस्
प्रतिक्रिया
पठाउनुहोस्
×