काठमाडौँ — कोभिड–१९ संकट व्यवस्थापन केन्द्र (सीसीएमसी) ले तत्कालका लागि अस्पतालबाहेक अन्य कुनै पनि उद्योग वा क्षेत्रमा अक्सिजन प्रयोग गर्न नपाइने निर्णय गर्न मन्त्रिपरिषद्लाई सिफारिस गरेको छ ।

संक्रमितहरूका लागि अक्सिजन अभाव हुन थालेपछि शुक्रबार बसेको सीसीएमसी निर्देशक समितिको बैठकले यस्तो निर्णय गरेको हो । 

‘अक्सिजन अन्य क्षेत्र र उद्योगमा प्रयोग भएको छ भने त्यसलाई रोक्ने, अस्पताललाई अक्सिजन चाहिने हिसाबमा प्रयोग गर्ने, अस्पताल वा नागरिकले आफ्नो घरमा वा अस्पतालमा सिलिन्डरहरू छन् भने तुरुन्तै रिफिलका लागि उद्योगमा पठाउने,’ सीसीएमसीका सचिवालयका संयोजक एवं प्रधानमन्त्री तथा मन्त्रिपरिषद् कार्यालयका सचिव खगराज बरालले बैठकका निर्णयबारे कान्तिपुरसँग भने, ‘उद्योगहरूले सिलिन्डर फिर्ता नभएकाले भर्न पाइएन भनेका छन् ।’

सीसीएमसीले निषधाज्ञालाई थप कडाइ गर्न, संक्रमण बढेका मुलुकबाट भइरहेका अन्तर्राष्ट्रिय उडान रोक्न, आन्तरिक उडानलाई पनि केही कटौती गर्न र भारततर्फका नाकामा थप कडाइ गर्न सिफारिस गरेको छ । बैठकमा भारततर्फ खुला सिमानाका कारण कोरोनाको जोखिम बढेकाले स्वास्थ्य मापदण्ड पूर्ण रूपमा पालना गरेर १३ वटा नाका मात्रै सञ्चालन गर्ने निर्णय सीसीएमसीले गरेको सचिव बरालले बताए । उनले अहिले धेरै नाका सञ्चालन हुँदा कोभिड–१९ संक्रमणको जोखिम बढी भएकोबारे बैठकमा छलफल भएको जानकारी दिए ।