सिन्धुलीमा कोरोना संक्रमणसँग लक्षण मिल्ने एक महिलाको मृत्यु- समाचार - कान्तिपुर समाचार
कान्तिपुर वेबसाईट
AdvertisementAdvertisement

सिन्धुलीमा कोरोना संक्रमणसँग लक्षण मिल्ने एक महिलाको मृत्यु

स्वाब परीक्षणका लागि काठमाडौं पठाइयो
राजकुमार कार्की

सिन्धुली — कोरोनाभाइरसको संक्रमणसँग मिल्दो लक्षण देखिएसँगै सिन्धुली अस्पतालमा उपचारका लागि आएकी एक महिलाको मृत्यु भएको छ । महोत्तरीको पाटु घर भएकी २१ वर्षकी ती महिलामा अत्यधिक ज्वरो र स्वासप्रस्वासको समस्या भइ सिन्धुली अस्पताल ल्याइएकोमा इमर्जेन्सी भर्ना गरी उपचार भइरहेको क्रममा नै मृत्यु भएको अस्पतालका फोकल पर्सन डा. प्रशन्न राजभण्डारीले जानकारी दिए ।

डा. राजभण्डारीका अनुसार ज्वरो अत्यधिक र स्वासप्रस्वासको समस्या भएकाले मृतकको स्वाब परीक्षणका लागि शुक्रबार नै काठमाडौं पठाइएको छ । सिन्धुली अस्पतालका व्यवस्थापक विमल श्रेष्ठका अनुसार महोत्तरी घर भए पनि उनी असार ३ गतेदेखि घ्याङलेख गाउँपालिका–१, सिम्लेस्थित माइतीमा आएर बसेकी थिइन् ।

गाउँमै झारफुकमा लागेर समयमा अस्पताल नल्याएकाले उपचार सम्भव नभएको व्यवस्थापक श्रेष्ठको भनाइ छ । चारदिन अघिदेखि मृतक महिलालाई ज्वरो आएको आफन्तले बताएका छन् ।

स्वाब परीक्षणको रिपोर्ट नआएसम्म उपचारमा खटिएका चिकित्सक, कर्मचारी र आफन्तहरु क्वारेन्टाइनमा रहने समेत श्रेष्ठले जानकारी दिए । मृतक महिलाको शव भने आफन्तले बुझेर लगेका छन् ।

प्रकाशित : असार १२, २०७७ १६:२३
प्रतिक्रिया
पठाउनुहोस्

वाणिज्य बैंकका शाखा प्रबन्धक पक्राउ

रूपा गहतराज

नेपालगन्ज — बाँकेस्थित राष्ट्रिय वाणिज्य बैंक, त्रिभुवनचोक शाखाका प्रबन्धक ललितबहादुर शाही पक्राउ परेका छन् । 

सरकारी किर्ते छाप र नक्कली कागजपत्रका आधारमा सुनचाँदी व्यवसायीलाई १ करोड २५ लाख रुपैयाँ ऋण दिएको आरोपमा उनलाई प्रहरीले पक्राउ गरेको हो । नेपालगन्जका सुनचाँदी व्यवसायी रिजवान अहमद जसगढले जग्गाको लालपूर्जा, नक्सा, कर तिरेको रसिदसहितका नक्कली कागजपत्रहरु बनाएर राष्ट्रिय वाणिज्य बैंक, नेपालगन्जको त्रिभुवन चोक शाखाबाट एक करोड २५ लाख रुपैयाँ ऋण लिएका थिए । सोही घटनाको अनुसन्धान गरेको प्रहरीले बैंकका शाखा प्रबन्धक शाहीलाई पक्राउ गरेको हो ।

‘नक्कली कागजपत्रका आधारमा ऋण प्रवाह भएको देखियो ’ जिल्ला प्रहरी कार्यालय बाँकेका डिएसपी तथा प्रवत्ता सुवास खड्काले भने, 'सरकारी छाप किर्तेको थप अनुसन्धानमा छौं,’ ऋण लिने जसगढ यसअघि जेठ २७ गते नै पक्राउ परिसकेका छन् । जसगढले नक्कली कागजपत्र र किर्ते छापका आधारमा २०७६ मंसिर २२ गते ५० लाख र २०७७ जेठ २५ गते ७५ लाख गरी १ करोड २५ लाख रकम निकालेका थिए ।

प्रहरीले अहिले शाहीलाई पक्राउ गरेर म्याद थपको प्रक्रिया अघि बढाइसकेको छ भने बैंकका अरु कर्मचारीसँग बयान लिइरहेको डिएसपी खड्काले बताए । प्रहरीले सरकारी छाप किर्तेको अनुसन्धान सकिएपछि बैंकिङ कसुरमा अनुसन्धान गर्ने जनाएको छ ।

प्रकाशित : असार १२, २०७७ १६:०२
पूरा पढ्नुहोस्
प्रतिक्रिया
पठाउनुहोस्
×