विराटनगर — कोरोना भाइरस संक्रमित बसेको उदयपुरको त्रियुगा नगरपालिकास्थित भुल्केको मस्जिद आसपासका बासिन्दाको स्वाबको नमुना परीक्षण विराटनगरस्थित कोसी अस्पतालमा भइरहेको छ । मस्जिद आसपास बस्तीका बासिन्दामा संक्रमण फैलिएको हुन सक्ने आशंकामा त्यहाँबाट स्वाब नमुना संकलन गरेर ल्याइएको थियो ।

कोसी अस्पतालको प्रयोगशालामा ल्याइएका ६९ जनाको नमुना परीक्षणको काम भइरहेको छ । प्रारम्भिक रुपमा प्रयोगशाला परीक्षण गरिएका नमुनाहरुका आधारमा संक्रमण नदेखिएको जनाइएको छ । पीसीआर विधिबाट ती नमुनाको परीक्षण भइरहेको अस्पतालले् जनाएको छ ।

उदयपुरको मस्जिदमा रहेका १३ जनामा कोरोना संक्रमण भएको पुष्टि भइसकेको छ । उनीहरुलाई विराटनगरस्थित कोभिड १९ उपचार केन्द्रमा ल्याएर हेरचाह गरिँदैछ । मस्जिदमै बसेका अरु तीनजनालाई मोरङको टाँडीस्थित क्वारेन्टाइनमा राखिएको छ ।

मस्जिदमा बसेकाहरु घुमिफिर गर्दै त्यहाँ पुगेको र आसपासका बस्तीमा संक्रमण सरेको हुन सक्ने आशंका गरिएको छ । यहीकारण त्यहाँको बस्तीका बासिन्दाको स्वाब नमुना संकलन गर्दै परीक्षणका लागि विराटनगर ल्याइएको हो ।