लकडाउन प्रभावकारी बनाउन सम्पूर्ण राष्ट्रसेवकलाई सरकारको ‘सर्कुलर’

बलराम बानियाँ

काठमाडौँ — सरकारले कोरोना भाइरसको संक्रमण फैलिन नदिनका लागि घोषित देशव्यापी ‘लकडाउन’ लाई प्रभावकारी बनाउनका लागि बिदामा रहेका आफ्ना सम्पूर्ण निजामती तथा राष्ट्रसेवक कर्मचारीहरूलाई परिचालित हुन सर्कुलर जारी गरेको छ ।

सरकारका तर्फबाट संघीय मामिला तथा सामान्य प्रशासन मन्त्रालयले सम्पूर्ण राष्ट्रसेवक कर्मचारीहरूलाई बिहीबार सर्कुलर जारी गरी कोभिड–१९ को रोकथाम तथा नियन्त्रणका लागि आवश्यक सक्रियता अपनाउन निर्देशन दिएको हो ।


संक्रमण फैलन नदिन सरकारद्वारा घोषित लकडाउन अपेक्षाकृत रूपमा प्रभावकारी नभएको जनगुनासो आइरहेकाले सरकारले आफ्ना सम्पूर्ण राष्ट्रसेवक कर्मचारीहरूलाई लकडाउन सफल बनाउनका लागि क्रियाशील हुन सर्कुलर जारी गरेको स‌ंघीय मामिला मन्त्रालयका सहसचिव बाबुराम अधिकारीले जानकारी दिए ।


लकडाउनसँगै अत्यावश्यक सेवा प्रदान गर्नेबाहेक सबै कर्मचारीलाई सरकारले बिदा दिएको छ । सरकारले लकडाउनलाई प्रभावकारी बनाउन तिनै बिदामा रहेका कर्मचारीलाई आ–आफ्नो घर वा डेरा रहेको स्थानमा क्रियाशील हुन निर्देश गरेको हो ।


९ बुँदे निर्देशनमा सरकारले कर्मचारीहरूलाई आफू बसेको स्थानमा सामाजिक दुरी कायम गर्न लगाउनु पर्ने र विदेशबाट आएका व्यक्तिलाई वडा कार्यालय र स्थानीय प्रशासनसित समन्वय गरी क्वारेन्टाइनमा राख्ने जिम्मा दिएको छ ।


कोरोना भाइरस संक्रमणसित मिल्दोजुल्दो लक्षण देखिएका व्यक्तिलाई अस्पताल पुर्‍याउन, दैनिक उपभोग्य वस्तुको अभाव र कालो बजारी हुन नदिन तथा भएको पाइएमा वाणिज्य तथा आपूर्ति विभाग र जिल्ला प्रशासन कार्यालयलाई तत्काल सूचित गर्नसमेत कर्मचारीहरूलाई सर्कुलर जारी गरिएको छ ।


सरकारले दैनिक उपभोग्य वस्तु बिक्रीवितरण गर्ने बजार, किराना पसल तथा तरकारी तथा फलफूल बजारमा सामाजिक दुरीको नियम पालना भए/नभएको अनुगमन गर्न, नभएको पाइएमा पालना गराउनसमेत कर्मचारीलाई निर्देशन दिएको छ ।


सरकारले कर्मचारीहरूलाई आ–आफ्नो घर या डेरा रहेको स्थानमा कुनै पनि व्यक्तिलाई अनावश्यक रूपमा बाहिर निस्कन नदिन, अनिवार्य रूपमा मास्क र स्यानिटाइजरको प्रयोग गर्न लगाउनसमेत निर्देश गरेको छ । आफू बसेको वडा कार्यालयमा हुने अति विपन्न नागरिकको लगत संकलन र राहत वितरण कार्यमा सहयोग र समन्वय गनसमेत कर्मचारीहरूलाई सर्कुलरमा निर्देशन दिइएको छ ।

प्रकाशित : चैत्र २७, २०७६ १६:५०
ADVERTISEMENT
प्रतिक्रिया
पठाउनुहोस्
ADVERTISEMENT

पाँचौदिनसम्म नयाँ कोरोना संक्रमित भेटिएनन् 

कान्तिपुर संवाददाता

काठमाडौँ — विश्वका विभिन्न देशमा कोरोना भाइरसको संक्रमण बढिरहँदा नेपालमा भने विगत ५ दिनदेखि नयाँ संक्रमण देखिएको छैन ।

बिहीबार मन्त्रालयले आयोजना गरेको मिडिया ब्रिफिङकका क्रममा प्रवक्ता डा. विकास देवकोटाले नेपालमा कोरोना भाइरस संक्रमित नयाँ बिरामी नभेटिएको जानकारी दिएका हुन् ।

नेपालमा हालसम्म २ हजार ८ सय ९५ जनाको कोरोना भाइरसको परीक्षण गरिएको छ। टेकुस्थित राष्ट्रिय जनस्वास्थ्य प्रयोगशाला हालसम्म २ हजार ३ सय ८२ नमुना परीक्षण भएको छ भने उपत्यका बाहिर ५ सय १३ नमुना परीक्षण गरिएको छ । साथै १ सय ९३ जनाको परीक्षण जारी छ । पछिल्लो ५ दिनमा नयाँ संक्रमित नदेखिएका हुन् ।

चैत २२ गते ३ जना कोरोना संक्रमित फेला परेपछि संक्रमितको संख्या ९ पुगेको थियो । एक जना निको भएर घर फर्किसकेका छन् । बिहीबारको अपडेटमा आइसोलेसनमा देशभरी ११७ जना रहेका छन् भने क्वारेन्टाइनमा ७ हजार ९४० जना रहेका छन् ।

प्रवक्ता देवकोटाले प्रत्येक प्रदेशमा क्वारेन्टाइनमा रहेकाको परीक्षणका लागि ५ हजार प्रति प्रदेशको दरले आरडिटी उपलब्ध गराएको र प्राविधिकहरुलाई तालिम दिएको जानकारी दिए । कैलालीमा ६६ जनामा आरडिटी परीक्षण गरिएकोमा रिपोर्ट नेगेटिभ आएको बताए।

साथै मन्त्रालयले बिहीबारदेखि कोरोना भाइरसको नियमित अपडेट साङ्केतिक भाषामा समेत गराउन थालेको छ ।

प्रकाशित : चैत्र २७, २०७६ १६:५०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
×