नेपाल आइपुग्यो सरकारले चीनबाट किनेको र सहयोग प्राप्त स्वास्थ्य सामग्री- समाचार - कान्तिपुर समाचार

नेपाल आइपुग्यो सरकारले चीनबाट किनेको र सहयोग प्राप्त स्वास्थ्य सामग्री

कृष्ण आचार्य

काठमाडौँ — कोरोना भाइरस(कोभिड–१९) संक्रमण पहिचान, रोकथाम तथा उपचारका लागि चाहिने विभिन्न सामग्री चीनबाट आइतबार नेपाल आइपुगेको छ ।

सरकारले किनेको, ज्याक मा फाउन्डेसन, र चीनको सिचुवान प्रान्तीय सरकारले दिएको विभिन्न सामग्री आइतबार बिहान ५ बजे त्रिभुवन अन्तर्राष्ट्रिय विमानस्थलमा आइपुगेको संस्कृति पर्यटन तथा नागरिक उड्डयन मन्त्री योगेश भट्टराईले जानकारी दिए ।


सरकारले ललितपुरमा रहेको ओबीसीआई प्राइभेट लिमिटेड कम्पनीमार्फत सवा एक अर्ब रुपैयाँ बराबरको स्वास्थ्य सामग्री खरिद नेपाल मगाएको हो । मन्त्री भट्टराईका अनुसार सामान ल्याउँदा लागेको भाडा आयात गर्ने कम्पनीले नै तिर्नेछ।


सरकारले खरिद गरेका स्वास्थ्य सामग्रीमा गगल्स, गाउन, जाँच गर्ने पञ्जा, सफाइमा प्रयोग हुने पञ्जा, एन–९५ मास्क, डिस्पोजेबल जुत्ता तथा अनुहार छोप्ने सामग्री, इन्फ्रारेड थर्मोमिटर, कोरोना परीक्षण गर्ने पोर्टेबल पीसीआर मेसिन, पोर्टेबल पीसीआर रिएजेन्ट, संक्रमण परीक्षण किट, नमुना संकलन गर्ने ट्युबहरु रहेको स्रोतले जनाएको छ।


सरकार र आयातकर्तासँग भएको सम्झौतामा १ अर्ब २४ करोड बराबरका उक्त सामग्री तीन पटकमा नेपाल ल्याइसकिने उल्लेख छ।पहिलो चरणका सामग्री ल्याउन नेपाल एयरलाइन्सको ४१७१ नम्बरको जहाज शनिबार साढे बाह्र बजे चीन उडेको थियो।

यही जहाजमा चीनको सिचुवान प्रदेश, चिनियाँ दूतावास, अलिबाबा र ज्याकमा फाउन्डेशनले नेपाललाई सहयोग स्वरुप उपलब्ध गराउने भनिएका सामग्रीहरु पनि ल्याइएको हो। सिचुवान प्रदेश र चिनियाँ दूतावासबाट प्राप्त हुने सामग्री १.१ मेट्रिक टन् छन् भने दुई फाउन्डेशनले उपलब्ध गराएको समान १.४ मेट्रिक टन हो।


दुई फाउण्डेसनले कूल १९ लाख ९८ हजार ८ सय ५५ चिनियाँ यूयान (हालको विनिमय दर अनुसार ३ करोड १९ लाख १ हृजार ६ सय रुपैयाँ) बराबरको सामग्री पठाएका हुन्। सिचुवान प्रदेश र चिनियाँ दूतावासले भने ३ लाख ३ हजार १ सय चिनियाँ यूयान (हालको विनिमय दर अनुसार ५४ लाख ९ हजार ५ सय रुपैयाँ) बराबरको स्वास्थ्य सामग्री पठाएका हुन्।


सरकारले पहिलो चरणमा मगाएका सामग्री

प्रकाशित : चैत्र १६, २०७६ ०७:४४
प्रतिक्रिया
पठाउनुहोस्

रुकुम पश्चिममा लकडाउन उलंघन गर्ने १२० जना प्रहरीको नियन्त्रणमा

हरि गौतम

रुकुम पश्चिम — कोरोना भाइरस (कोभिड -१९) को सम्भावित जोखिमलाई मध्यनजर गरी सरकारले ११ गतेदेखि लागु हुनेगरी घोषणा गरेको लकडाउन उलंघन गर्नेहरूलाई प्रहरीले नियन्त्रणमा लिएको छ ।

लकडाउनलाई वेवास्ता गरी सवारी चलाउने १२० जनालाई नियन्त्रणमा लिइएको प्रहरीले जनाएको छ । गत मंगलबारदेखि शनिबार बेलुकासम्म जिल्लाका विभिन्‍न ठाउँबाट नियन्त्रणमा लिइएका उनीहरूलाई कोरोना भाइरस सम्बन्धि जानकारी र ट्राफिक नियमबारे सिकाएर पठाइएको छ ।

यस क्रममा प्रहरीले ४० मोटरसाइकल, ३ ट्र्याक्टर र २ अटो नियन्त्रणमा लिएको थियो । विशेष गरी लकडाउन उलंघन गरेर चलाइएका सवारी र हिँडिरहेका मान्छेलाई नियन्त्रणमा लिएर छाडिएको जिल्ला प्रहरी प्रमुख प्रहरी नायव उपरीक्षक ठगबहादुर केसीले जानकारी दिए । सुरुका दिनमा लकडाउन उलंघन गर्नेहरू बढी रहे पनि पछिल्लो समय घट्दै गएको केसीले जानकारी दिए ।

लकडाउन कार्यान्वयनका लागि झन्डै साढे ३ सय भन्दा बढी नेपाल प्रहरी परिचालन गरिएको छ । लकडाउन अनुगमन, माइकिङ जस्ता काम प्रहरीले गरिरहेको छ । यसको साथै जिल्लाका विभिन्न ठाउँमा नेपाल प्रहरीसँगै सशस्त्र सशस्त्र प्रहरी पनि परिचालन भएको छ ।

प्रहरीले देशबाहिरबाट आएकाहरूको तथ्यांक संकलन पनि गरिरहेको छ । हालसम्म भारत र अन्य देशबाट २५२ जना जिल्ला भित्रिएको डिएसपी केसीले जानकारी दिए । उनीहरूमध्ये २३ जना क्वारेन्टाइनमा राखिएको पनि उनले बताए ।

मुसीकोट नगरपालिकाले निर्माण गरेको क्वारेन्टाइनमा ७ र चौरजहारी नगरपालिकाले निर्माण गरेको क्वारेन्टाइनमा १६ जना छन् ।

प्रकाशित : चैत्र १६, २०७६ ०७:३८
पूरा पढ्नुहोस्
प्रतिक्रिया
पठाउनुहोस्
×