विराटनगर — अन्ततः सधैं मत बदलिरहने मोरङ–६ का मतदाताले यसपटक पनि त्यो प्रवृतिलाई निरन्तरता दिए । मोरङको राजनीतिक मैदानमा यसपटक नयाँ पुस्ताकी रुविना आचार्य उदाएकी छन् ।  लामो समयदेखि स्थापित नेताहरूको प्रभाव रहेको क्षेत्रमा युवापुस्ताकी प्रतिनिधि रुविनाले कांग्रेसका प्रभावशाली नेता शेखर कोइरालालाई भारी मतान्तरले पराजित गर्दै नयाँ इतिहास रचेकी छन् । 

आचार्य ५५ हजार ५ सय १३ मतका साथ विजयी भइन् । उनका प्रतिस्पर्धी कोइरालाले १२ हजार ८ सय ५० मत मात्र पाए । एमालेका विनोद ढकालले ८ हजार ३ सय १७ मतमा चित्त बुझाए । सामाजिक अभियान र नागरिक मुद्दामा सक्रिय रहेकी रुविना विराटनगरकै हुन् । यो जितलाई धेरैले नयाँ पुस्ताको आकांक्षा र वैकल्पिक राजनीतिक धारको उदयका रूपमा व्याख्या गरेका छन् ।

स्थापित दल र अनुभवी नेतासँग प्रतिस्पर्धा गर्दै उनले निकालेको जितले मोरङको राजनीतिक समीकरणमा नयाँ सन्देश दिएको विश्लेषक दिनेश श्रेष्ठ बताउँछन् । विराटनगर–४ को आयल निगम क्षेत्रमा जन्मिएकी रुविनाको बाल्यकाल विराटनगरमै बितेको हो । प्रारम्भिक शिक्षा उनले इडेन नेसनल सेकेन्डरी बोर्डिङ स्कुलबाट लिएकी थिइन् । प्लस–टुसम्मको अध्ययन मेरिल्यान्ड कलेज विराटनगरबाट पूरा गरेकी उनले त्यसपछि काठमाडौं विश्वविद्यालय बाट एमबीए अध्ययन गरेकी छन् ।