लकडाउनमा कराते प्रशिक्षक मल्लको टिप्स– 'पसिना निस्कने गरी व्यायाम गर्नुस्'- फिचर - कान्तिपुर समाचार

लकडाउनमा कराते प्रशिक्षक मल्लको टिप्स– 'पसिना निस्कने गरी व्यायाम गर्नुस्'

नमिता दाहाल

काठमाडौँ — कोरोना भाइरस (कोभिड-१९) को संक्रमण रोकथामका लागि सम्पूर्ण खेलकुद कार्यक्रम बन्द छन्। जसका कारण खेलाडी तथा प्रशिक्षक पनि यतिबेला फुर्सदिला बनेका छन्। सधैं नियमित अभ्यास र खेलका साथै कसरतमा व्यस्त हुने खेलाडीले लकडाउनका बेला कसरी आफूलाई फिट राख्ने?


शारीरिक व्यायामका साथै खानपानमा विशेष ध्यान पुर्‍याउनुपर्ने बताउँछन्, कराते प्रशिक्षक ध्रुवविक्रम मल्ल। २०४८ सालदेखि कराते प्रशिक्षकको भूमिकामा रहेका उनले केही टिप्स फलो गर्न खेलाडीहरुलाई आग्रह गरे।


२०५२ सालमा राष्ट्रिय खेलकुद परिषद्‌बाट स्थायी प्रशिक्षकको रुपमा नियुक्त भएका उनले २०६३ सालमा अवकाश लिए। अहिले पनि खेलाडी उत्पादनमा सक्रिय देखिन्छन्। यसै वर्ष सम्पन्न सागमा उनका धेरैजसो प्रशिक्षार्थीहरु स्वर्णपदक विजेता बने।


देशव्यापी लकडाउन भएकाले उनी आफैंले पनि फिट रहन विभिन्न किसिमका व्यायामलाई निरन्तरता दिइरहेका छन्। घरभित्रै हल्का वार्मअप गर्छन्। ‘खेलाडीहरुले बिहान उठेर हल्का खालको वार्मअप गर्नुपर्छ। त्यसपछि लाइट ब्रेकफास्ट लिनु स्वास्थ्यको लागि राम्रो हुन्छ,' उनको सुझाव छ,' हेभी खाना र कोलेस्ट्रोल बढाउने खालको खाना खानु हुँदैन।’


बाहिर निस्कन नपाए पनि कराते खेलाडीका लागि घरभित्रै कसरत गर्न सक्ने विभिन्न उपाय छन्। उनका अनुसार, घरको कम्पाउन्ड नै वार्मअपका लागि उपयुक्त स्पेस हो।


शरीर फुर्तिलो बनाउन र खेलमा पनि निरन्तर लागिरहन शारीरिक कसरतले धेरै मद्दत पुर्‍याउँछ। यसका साथै मार्सल आर्ट इन्डोर गेम भएकाले खेलाडीहरु घरमा पनि प्रशस्तै अभ्यास गर्न सक्छन्। 'लकडाउन छ भनेर व्यायम नै नगरी बस्नु हुँदैन,' प्रशिक्षक मल्ल भन्छन्, 'खेलाडीले आफ्नै दैनिक खानपानलाई पनि ध्यान दिनुपर्छ। बिहानै उठ्ने, वार्मअप गर्ने, बिहानको खाजामा हल्का खानेकुरा खाने गर्नुपर्छ।'


सामान्य अवस्थामा जस्तो पूर्ण रुपमा व्यायाम र इन्डोर गेमलाई निरन्तरता दिन यो संकटका बेला गाह्रो छ। तथापि शारीरिक अभ्यासलाई चटक्कै नछाड्न उनको सुझाव छ। 'पसिना निस्कने गरी व्यायाम गर्नुस् ताकि त्यसले दिमाग पनि ताजा बनाउँछ,' उनले भने, 'घरको ठाउँअनुसार कता सहज पर्छ अभ्यास जारी राखौं।'


कराते मात्रै नभई सम्पूर्ण इन्डोर गेममा खेलाडी आफैले अनुकूलता मिलाएर घरमै समयको सदुपयोग गर्न सक्ने उनी बताउँछन्।

प्रकाशित : चैत्र २६, २०७६ १५:०७
प्रतिक्रिया
पठाउनुहोस्

संसारका विभिन्‍न ठाउँबाट देखिएको सन् २०२० कै ठूलो चन्द्रमाका दृश्य

एजेन्सी

काठमाडौँ — यस वर्षको सबैभन्दा चम्किलो र ठूलो चन्द्रमा मंगलबार राति देखिएको छ । कोरोनाभाइरसका कारण विश्वव्यापी रुपमा लकडाउनमा भइरहेको समयमा सहरका विभिन्‍‍न स्थानहरुमा सुपरमून देखिएको हो । न्युयोर्कको एम्पायर स्टेट बिल्डिङ र मंगलबार राति देखिएको पूर्ण चन्द्रमा(पहिलो तस्बिर)

क्रोएसियाको राजधानी जाग्रेबको जाग्रेब चर्चनजिकैबाट देखिएको दृश्य तस्बिर : रोयटर्स

अरुबेलाभन्दा सुपरमून केही ठूलो र चम्किलो देखिन्छ । पृथ्वीलाई परिक्रमा गर्ने क्रममा चन्द्रमा पृथ्वीको केही नजिक हुँदा सुपरमून देखिन्छ । मंगलबारको पूर्ण चन्द्रमा अन्य दिनको चन्द्रमाको तुलनामा ७ प्रतिशत ठूलो र १५ प्रतिशत चम्किलो देखिएको अनुसन्धानकर्ताहरुले बताएका छन् । यस वर्ष मार्चमा पनि सुपरमून देखिएको थियो ।

बेलायतको माउ कोप गाउँबाट देखिएको दृश्य तस्बिर : रोयटर्स

अप्रिलमा देखिने पूर्ण चन्द्रमालाई पिंक मूनले समेत चिनिन्छ । उत्तरी अमेरिकाका आदिवासी समुदायहरुले अप्रिल महिनामा देखिने चन्द्रमालाई पिंक मुन भन्ने गर्छन् । अप्रिलमा यस बेला पिङ रंगको फूल फुल्ने भएकाले उनीहरुले पूर्ण चन्द्रमाको नाम पनि पिंक राखिदिएका हुन् ।

रुसको सेन्ट पिटर्सबर्गबाट देखिएको दृश्य तस्बिर : रोयटर्स

लन्डनको ग्रिनविचस्थित रोयल अब्जर्भेटरीका अरु बेलाको तुलनामा पृथ्वीबाटको दूरीबाट १० प्रतिशतले नजिक देखिने चन्द्रमालाई सुपरमून भनिन्छ ।

लन्डनबाट देखिएको दृश्य तस्बिर : रोयटर्स

फ्रान्सको वोल्क्सिमबाट देखिएको दृश्य तस्बिर :' रोयटर्स

युक्रेनको किभबाट देखिएको दृश्य तस्बिर : रोयटर्स

क्यालिफोर्नियाको सानफ्रान्सिस्कोबाट देखिएको दृश्य तस्बिर : रोयटर्स

लन्डनबाट देखिएको दृश्य तस्बिर : रोयटर्स

दुबईको बुर्ज खलिफा टावर र पछाडि देखिको पूर्ण चन्द्रमा तस्बिर : रोयटर्स

बहराइनको मनामा ट्रेड सेन्टर पूर्ण चन्द्रमा तस्बिर : रोयटर्स

बर्लिनबाट देखिएको दृश्य तस्बिर : रोयटर्स


प्रकाशित : चैत्र २६, २०७६ १४:५९
पूरा पढ्नुहोस्
प्रतिक्रिया
पठाउनुहोस्
×