ब्रसेल्स — युरोपेली संघ (ईयू) को औषधि नियामक निकायले कोरोना भाइरसविरुद्धको अस्ट्राजेनेका खोपका कारण ‘रगत जम्ने समस्या निकै दुर्लभ’ भएको जनाएको छ । यसअघि कतिपय देशले अस्ट्राजेनेका खोपका कारण रगत जम्ने समस्या देखिएको भन्दै खोप अभियान स्थगित गरेका थिए । 

युरोपियन मेडिसिन्स एजेन्सी (ईएमए) ले युरोपमा देखापरेका त्यस्ता ८६ वटा अवस्थाबारे अध्ययन गरेपछि जोखिमभन्दा फाइदा बढी रहेको निष्कर्ष निकालेको हो । प्रतिवेदनले करिब २ करोड ५० लाख युरोपेलीहरूलाई दिइएको खोपबारे तथ्यांकको अध्ययन गरेको हो । 

ईएमएले खोप लगाएपछिका जोखिमका खास कारणबारे भने केही उल्लखे नगरेको बीबीसीले जनाएको छ । । तर रगत जमेको अधिकांश अवस्था ६० वर्षमुनिका महिलाहरूमा देखिएको बताइएको छ । बेलायतको खोपसम्बन्धी निर्देशन समितिले रगत जम्ने समस्याका कारण ३० वर्षभन्दा मुनिका मानिसलाई अस्ट्राजेनेकाको सट्टा अन्य खोप दिनु उचित हुने जनाएको छ ।