संक्रमण दर ८.२८ प्रतिशत- समाचार - कान्तिपुर समाचार
कान्तिपुर वेबसाईट
AdvertisementAdvertisement

संक्रमण दर ८.२८ प्रतिशत

संकलित नमुनामा देखिएको भाइरस सुरूमा बेलायतमा देखिएको प्रजाति ‘बी.१.१.७’ सँग मिल्दोजुल्दो 
स्कुले बालबालिकामा पनि देखियो नयाँ प्रजातिको भाइरस
अतुल मिश्र

काठमाडौँ — कोरोनाको बेलायती भेरिएन्ट (प्रजाति) सँग मिल्दोजुल्दो भाइरसबाट संक्रमित हुनेको संख्या मुलुकभर बढिरहेको छ । संकलित नमुनाको विश्लेषण गर्दा सुरुमा बेलायतमा देखिएको प्रजाति (बी.१.१.७) सँग मिल्दोजुल्दो भाइरस बढी मात्रामा फैलिरहेको स्वास्थ्य मन्त्रालयको इपिडिमियोलोजी तथा रोग नियन्त्रण महाशाखा (ईडीसीडी) ले जनाएको छ ।

‘ब्राजिल र अफ्रिकामा देखिएका कोरोना भाइरसको नयाँ भेरिएन्टबारे पनि थाहा पाउन १५ वटा नमुना हङकङ पठाएका छौं । रिपोर्टको प्रतीक्षामा छौं,’ ईडीसीडीका निर्देशक डा. कृष्णप्रसाद पौडेलले भने ।

ईडीसीडीका अनुसार कुनै समुदायबाट संकलित नमुनामा संक्रमण पुष्टि भएकामध्ये ७० प्रतिशतसम्म नयाँ प्रजातिको भाइरस पाइएको छ । संक्रमितमा स्कुले बालबालिकाको संख्या उल्लेख्य छ । मन्टेसोरीमा पढ्ने ३ वर्षे बालकमा समेत बेलायती भेरिएन्टसँग मिल्दोजुल्दो भाइरस पाइएको छ । स्कुले बालबालिकामा नयाँ प्रजातिको भाइरस उल्लेख्य देखिएकामा महामारी विशेषज्ञले चिन्ता व्यक्त गरेका छन् । स्वास्थ्य मन्त्रालयले राष्ट्रिय जनस्वास्थ्य प्रयोगशालाबाट भइरहेको निगरानीमा काठमाडौं, पोखरालगायत ठूला सहरमा स्कुल जाने उमेर समूहमा संक्रमण बढिरहेको जनाउँदै शैक्षिक संस्थामा उच्च सतर्कता अपनाउन भनेको छ ।

बालबालिकामा संक्रमणको बढ्दो दरले जोखिम समूहका भनिएका बूढापाका, रोगी/बिरामीलाई थप संक्रमण हुने सम्भावना उच्च भएको छ । बालबालिकामा कोभिड–१९ को लक्षण एकदम कम देखिने गर्छ । लक्षण नदेखिए पनि उनीहरू संक्रमण सार्न सक्ने वाहक (एसिम्प्टोम्याटिक क्यारियर) हुन सक्छन् ।

‘बेलायतको भेरिएन्ट कम उमेरमा पनि बढी संक्रामक देखिएको छ । यसबाट हुने संक्रमण बढे हस्पिटल र आईसीयू/भेन्टिलेटरमा बस्ने दर बढ्छ,’ ईडीसीडीका निर्देशक डा. पौडेलले भने । केही दिनयता मुलुकमा कोभिड–१९ भएर सघन उपचारअन्तर्गत आईसीयूमा बस्ने ५० वर्षमाथि र ५० वर्षमुनिका उमेर समूहको संख्या उस्ताउस्तै देखिएको छ । कोरोना संक्रमणले अस्पतालका आईसीयूमा युवासमेत भर्ना हुन थालेका छन् । यसले युवाले बढी लापरबाही गरेको देखिएको चिकित्सकहरू बताउँछन् । केही महिनाअघि मुलुकमा कोभिड संक्रमण उत्कर्षमा रहेका बेला आईसीयूमा ५० वर्ष माथिका संक्रमित बढी हुन्थे । अहिले युवासमेत बढी मात्रामा संक्रमित हुन थाल्दा दैनिक संक्रमण दर ८ प्रतिशत नाघेको छ । स्वास्थ्य मन्त्रालयका अनुसार बिहीबार (चैत २६) मुलुकको दैनिक कोभिड संक्रमण दर ८.२८ प्रतिशत देखिएको छ । यो दर चैत २५ गते ७.२६, चैत २४ गते ६.१२, चैत २३ गते ५.८६, चैत २२ गते ५.०९, चेत २१ गते ४.६९ र चैत २० गते ५.०२ प्रतिशत थियो ।

स्वास्थ्य मन्त्रालयका सहप्रवक्ता डा. समीरकुमार अधिकारीका अनुसार हाल देशभरिमा कोभिड संक्रमितको संख्या २ हजार ४ सय २४ छ । वाग्मती प्रदेशमा सबैभन्दा बढी १ हजार ३ सय ३५ जना, गण्डकीमा ३ सय ८० जना, प्रदेश ५ मा २ सय ५८ जना, सुदूरपश्चिममा १ सय ११ जना, प्रदेश २ मा ८६ जना, कर्णालीमा ५० जना र प्रदेश १ मा २९ संक्रमित उपचारमा छन् । देशभरिमा ५८ जना संक्रमित सघन उपचारमा छन् । काठमाडौं उपत्यकामा ३७ जना आईसीयू र १३ जना भेन्टिलेटरमा छन् । उपत्यकाबाहिर ७ जना आईसीयू र १ जना भेन्टिलेटरमा छन् ।

बिहीबार पीसीआर परीक्षणबाट संक्रमण पुष्टि भएका ३ सय ३२ जनामध्ये प्रदेश १ का ६.६२, प्रदेश २ का ६.६२, वाग्मती प्रदेशका ५५.७२, गण्डकी प्रदेशका १८.६७, लुम्बिनी प्रदेशका ८.७३, कर्णालीका ०.९० र सुदूरपश्चिमका २.७१ प्रतिशत छन् । ‘अहिले दैनिक संक्रमण दर बढिरहेको छ,’ ईडीसीडीका निर्देशक डा.पौडेलले भने, ‘बेलैमा हामीले स्वास्थ्य सावधानी, मापदण्ड पालना गर्‍यौं भने मुलुक लकडाउनमा जानु पर्दैन ।’ उनले सामाजिक दूरी कायम गरेर भीडभाडबाट जोगिनुका साथै मास्क उपयोगमा अत्यन्त कडाइ गर्नुपर्ने बताए ।

बढी भीडभाड हुने सपिङ मल, सिनेमा हल, पार्टी प्यालेस, हेल्थ क्लब, स्विमिङ पुल, मन्दिरलगायत धार्मिक क्षेत्र जनस्वास्थ्यको मापदण्ड कडाइसाथ पालना गरेर मात्र सञ्चालन गर्नुपर्ने सुझाव विज्ञहरूले दिँदै आएका छन् । पछिल्लो समय काठमाडौंलगायतका ठूला सहरमा कोभिड संक्रमितहरूको संख्या बढ्दो छ ।

प्रकाशित : चैत्र २७, २०७७ ०८:०८
प्रतिक्रिया
पठाउनुहोस्

बेलायतस्थित म्यान्मारका राजदूतलाई दूतावास प्रवेशमा रोक

लन्डनस्थित दूतावासमा सैन्य सहचारीको नियन्त्रण, बेलायती विदेशमन्त्रीद्वारा घटनाको भर्त्सना
एजेन्सी

लन्डन/यांगुन — बेलायतका लागि म्यान्मारका राजदूतले आफूलाई दूतावासमा प्रवेश गर्न नदिइएको बताएका छन् । समाचारसंस्था रोएटर्ससँग कुरा गर्दै लन्डनस्थित म्यान्मारका राजदूत क्व ज्वार मिनले आफूलाई दूतावास प्रवेश गर्न नदिइएको जानकारी दिएका हुन् । प्रवेशमा रोक लगाइएपछि आफूले गाडीमा नै रात काटेको उनले जनाए ।

दूतावास प्रवेश गर्न नपाएपछि सञ्चारकर्मीसँग कुरा गर्दै बेलायतका लागि म्यान्मारका राजदूत क्व ज्वार मिन। तस्बिर : एपी


सैनिक सहचारीले कर्मचारीहरूलाई दूतावासबाट निस्किन निर्देशन दिएका बताउँदै आफूलाई अब देशको प्रतिनिधि नरहेको जानकारी गराएका मिनको भनाइ छ । म्यान्मारमा सेनाले माघ १९ गते देशको शासनसत्ता आफ्नो हातमा लिएपपछि लोकतन्त्र पक्षधर नेताहरूलाई नियन्त्रमा राखेको छ ।

त्यसयता म्यान्मारका प्रमुख सहरहरूमा दिनहुँ विरोध प्रदर्शन जारी छ । प्रदर्शनका क्रममा हालसम्म करिब ६ सय जनाभन्दा बढीको ज्यान गएको अधिकारवादी संस्थाहरूले जनाएका छन् । ज्यान गुमाउनेमध्ये कम्तीमा ४ दर्जन बालकालिका छन् । मिनले सैनिक नियन्त्रणमा रहेकी लोकतन्त्रवादी नेतृ आङ सान सुचीको रिहाइको माग गर्दै आएका थिए ।

बेलायती विदेशमन्त्री डोमिनिक राबले राजदूतलाई दूतावास प्रवेशमा रोक लगाइएको घटनाको ‘भर्त्सना’ गरेका बीबीसीले उल्लेख गरेको छ । ‘म्यान्मारको सैनिक शासकको यस्तो बदमासीपूर्ण कार्यको हामीले भर्त्सना गर्छौं । बेलायतले म्यान्मारको ‘कु’ र बढ्दो हिंसा अन्त्यसँगै लोकतन्त्रको पुनःस्थापनाको माग गर्छौं,’ राबले भनेका छन् ।

विदेश मन्त्रालयका एक प्रवक्ताले भने ‘कूटनीतिक मर्यादाका आधारमा म्यान्मारका राजदूतको अवस्थाबारे स्पष्टीकरण खोजिरहेको’ बताएका छन् । कूटनीतिक सम्बन्धसम्बन्धी भियना अभिसन्धिमा ‘नियुक्त गर्ने देशको सूचनाअनुसार राजदूतको जिम्मेवारी सकिने’ उल्लेख छ ।

बेलायती विदेश मन्त्रालयले म्यान्मारबाट सूचना पाएको पुष्टि गर्दै ‘म्यान्मारको सरकारको निर्णय पालना गरिने’ जनाएको छ । मन्त्रालयका अनुसार मिनलाई राजदूत हटाइएको सूचनासँगै म्यान्मारले चिट विनले कूटनीतिक नियोगको प्रमुखका रूपमा कार्य गर्नेसमेत जनाएको छ ।

म्यान्मारको सैनिक सरकारको विरोधमा बेलायतको लन्डनमा बिहीबार गरिएको प्रदर्शन तस्बिर : एपी

घटनालाई मिनले लन्डनकै बीचमा एक प्रकारको ‘कु’ भएको संज्ञा दिएका छन् । ‘गत फेब्रुअरीमा म्यान्मारमा ‘कु’ भयो । अहिले लन्डनको केन्द्रमा त्यस्तै घटना भयो,’ उनले भने । दूतावासका कर्मचारीले सैनिक सरकारको पक्षमा काम नगरे कडा दण्ड दिइने चेतावनी दिइएको बताए ।

दूतावास प्रवेश गर्न नदिइएपछि ती राजदूतले प्रहरीहरूसँग कुरा गरिरहेका एउटा तस्बिरमा देखिन्छ । त्यतिबेला दूतावास अगाडि केही प्रदर्शनकारीहरू पनि भेला भएका बीबीसीले उल्लेख गरेको छ । ‘प्रहरी र लोकतन्त्रवादीहरूको सानो समूहबीच उनले दुई–चार पटक भित्र प्रवेश गर्ने प्रयास गरेका थिए । तर हालसम्म भित्र पस्न सफल भने भएका छैनन्,’ संवाददातालाई उल्लेख गर्दै बीबीसीले जनाएको छ । यसअघि सेनाले राजदूत मिनले अनधिकृत टिप्पणी गरेको भन्दै फिर्ता बोलाइने जनाएको थियो ।

११ प्रदर्शनकारी मारिए

सैनिक ‘कु’ को विरोधमा म्यान्मारका विभिन्न सहरमा बिहीबार गरिएका प्रदर्शनका क्रममा कम्तीमा ११ जनाको मृत्यु भएको छ । कम्तीमा २० जना घाइते छन् ।

उत्तरपश्चिमी सहर तेजमा भएको सुरक्षाकर्मीसँगको झडपमा उनीहरूको ज्यान गएको हो । स्थानीय सञ्चारमाध्यमका अनुसार सुरक्षाकर्मीले गोली प्रहार गरेपछि ‘कु’ को विरोधमा उत्रेका प्रदर्शनकारीले राईफल तथा हातेबम प्रहार गरेका थिए । म्यान्मारमा गत नोभेम्बरमा भएको चुनावमा धाँधली भएको भन्दै सेनाले फेब्रुअरी १ मा सत्ता कब्जा गरेको हो । त्यसयता लोकतन्त्र पक्षधरहरूको आन्दोलन जारी छ । पछिल्ला दिनहरूमा सैनिक सरकारले प्रदर्शनकारीमाथि चरम दमन थालेको हो । जसका कारण दिनहुँ दर्जनौंको ज्यान जाने गरेको छ ।

स्वतन्त्र पर्यवेक्षकहरूले स्वतन्त्र भनेको चुनावमा सुचीको दल नेसनल लिग फर डेमोक्रेसी (एनएलडी) विजयी भएको थियो । सैनिक सरकारले हालसम्म सुचीविरुद्ध ६ वटा मुद्दा लगाइसकेको छ । तर त्यसविरुद्धका प्रमाण भने सार्वजनिक गरेको छैन । सुचीले आफूविरुद्धका आरोपहरू अस्वीकार गर्दै आएकी छन् ।

सैनिक ‘कु’ तथा दमनको संयुक्त राष्ट्रसंघ, युरोपेली संघ, अमेरिका, बेलायत, क्यानडा, अस्ट्रेलिया, जापानलगायत देशले निन्दा गरेका छन् । लोकतन्त्र पक्षधर प्रदर्शनकारीमाथि सुरक्षाकर्मीले गरेको ‘चरम दमन अस्वीकार्य’ भएको उनीहरूको भनाइ छ । ती देशहरूले सैनिक नेतृत्वमाथि प्रतिबन्धहरू घोषणा गरिसकेका भए पनि चीन र रुस भने मौन छन् ।

प्रकाशित : चैत्र २७, २०७७ ०७:५७
पूरा पढ्नुहोस्
प्रतिक्रिया
पठाउनुहोस्
×