कान्तिपुर वेबसाईट
AdvertisementAdvertisement
१५.१२°C काठमाडौं
काठमाडौंमा वायुको गुणस्तर: ४२०

भारतमा हरेक दिन संक्रमणको नयाँ कीर्तिमान

गएको दुई दिनमा थपिए एक लाखभन्दा बढी नयाँ संक्रमित, ३१ अगस्टसम्म अन्तर्राष्ट्रिय उडान बन्द
सुरेशराज न्यौपाने

नयाँदिल्ली — भारतमा बुधबारदेखि कोरोना भाइरसको संक्रमण नियन्त्रण र रोकथामका लागि गरिएको कडाइलाई थप खुकुलो पारियो । जसअनुसार जोखिममुक्त क्षेत्रमा रात्रिकालीन कर्फ्यु हटाउनेदेखि जिमखाना र योगा सेन्टरहरुलाई पनि खोल्न अनुमति दिइएको छ । भारतमा जुन पहिलो सातादेखि संक्रमण फैलिन नदिन लगाइएको लकडाउन र अन्य नियमहरुलाई खुकुलो पार्दै लगिएको छ । तर, कोरोना संक्रमण भने घट्नुका साटो दिनहुँ तीव्र गतिमा बढ्दै गएको छ ।

भारतमा हरेक दिन संक्रमणको नयाँ कीर्तिमान

संक्रमणले हरेक दिन नयाँ कीर्तिमान बनाउन थालेको छ । भारतको स्वास्थ्य तथा परिवार कल्याण मन्त्रालयका अनुसार गएको दुई दिनमै एक लाखभन्दा बढी नयाँ संक्रमित थपिएका छन् । शुक्रबारमात्र एकैदिन थप ५५ हजारभन्दा बढी व्यक्तिमा संक्रमण पुष्टि भएको थियो । जुन अहिलेसम्मकै सबैभन्दा बढी संख्या हो । र, पचास हजारभन्दा बढी नयाँ संक्रमित थपिएको यो लगातार दोस्रो दिन हो । योसँगै भारतमा कुल संक्रमितको संख्याले सोह्र लाख नाघेको छ । साथै पछिल्लो एक दिनमा मात्र थप ७७९ जनाको मृत्यु भएको छ । योसमेत गरी भारतमा अहिलेसम्म कोरोना संक्रमणका कारण मृत्यु हुनेको सख्या ३५ हजार ७४७ पुगेको छ । विश्वका कोरोना भाइरसले संक्रमित मुलुकहरुमध्ये भारत अमेरिका र ब्राजिलपछि तेस्रो स्थानमा छ भने संक्रमणबाट मृत्यु हुने संख्याका हिसाबले इटालीलाई समेत उछिन्दै पाँचौ स्थानमा पुगेको छ ।

भारतमा पहिलो संक्रमण ३० जनवरीमा केरलामा पुष्टि भएको थियो । तर, करिब ६ महिनाभित्रै संक्रमितको संख्याले १६ लाख नाघेको छ । भारतमा संक्रमित संख्या पहिलो एक लाख पुग्न साढे तीन महिना लागेकोमा थप पन्ध्र लाखका लागि तीन महिना पनि लागेन । समुदायमा फैलिएका कारण संक्रमण यसरी तीव्र गतिमा बढेको आशंका गरिएको छ । यद्यपि भारत सरकारले केही स्थानमा स्थानीय स्तरमा फैलिए पनि समुदायमै फैलिएको कुरालाई भने अझैसम्म पनि स्वीकार गरेको छैन । हालसम्म भएको मृत्युमध्ये आधाभन्दा बढी त यही जुलाई महिनामै भएको हो ।

विगत केही दिनयता महाराष्ट्र, कर्नाटक, तमिलनाडु, आन्ध्रप्रदेशलगायतका राज्यमा संक्रमणको फैलावट उच्च देखिएको छ । यी राज्यहरुमा नेपाली कामदारहरुको समेत बाक्लो उपस्थिति रहेको छ । महाराष्ट्रमा मात्रै गएको चौबीस घन्टामा ११ हजारभन्दा बढी नयाँ संक्रमित पहिचान भएका छन् । र, त्यहाँ कुल संक्रमितको संख्या ४ लाख ११ हजार नाघेको छ । महाराष्ट्रमा त ठूलो संख्यामा सुरक्षाकर्मीहरु समेत संक्रमित भएका छन् । त्यहाँ नौ हजार दुई सयभन्दा बढी संक्रमित भएको बताइएको छ । त्यसैगरी दक्षिण भारतीय राज्य तमिलनाडुमा पनि गएको एक दिनमा करिब ६ हजार संक्रमित बढेका छन् ।

यसअघि संक्रमण खासै नदेखिएका राज्यहरुमा पनि पछिल्लो समय संक्रमण तीव्र गतिले बढिरहेको छ । सिक्किममा कुल संक्रमितको संख्या ६१० नाघेको छ । संक्रमण बढेपछि राज्य सरकारले ३ अगस्टसम्मका लागि लडकडाउन लम्बाउने निर्णय गरिसकेको छ । त्यसैगरी अर्को उत्तरपूर्वी राज्य असाममा पनि संक्रमितको संख्या बढेर ३८ हजार नाघेको छ । संक्रमण बढ्दै गएपछि आसाम राज्य सरकारले अझ दुई हप्ता संक्रमण नियन्त्रणका लागि गरिएको कडाइलाई खुकुलो नपार्ने बताएको छ ।

संक्रमणको जोखिम नहटेका कारण अन्तर्राष्ट्रिय उडानलाई ३१ अगस्टसम्म स्थगित गरिएको छ । साथै कतिपय राज्यहरुले लकडाउनलाई क्रमश: थप्दै गएका छन् । तमिलनाडुले लकडाउनलाई ३१ अगस्टसम्म र बिहारले १५ अगष्टसम्म कायम राख्ने निर्णय गरिसकेका छन् । संक्रमण बढ्ने क्रमसँगै परीक्षणको दायरालाई भने फराकिलो बनाइएको छ । इन्डियन काउन्सिल अफ मेडिकल रिसर्च(आईसीएमआर)का अनुसार हालसम्म एक करोड ८८ लाख ३२ हजारभन्दा बढीको कोरोना परीक्षण भएको छ । पछिल्लो समय परीक्षणको दायरालाई थप फराकिलो गर्दै लगिएको छ । बिहीबार मात्र ६ लाख ४२ हजारभन्दा बढीको परीक्षण गरिएको आईसीएमआरले उल्लेख गरेको छ ।

यसैगरी नेपालसँग सीमा जोडिएका उत्तरप्रदेश र बिहारमा पनि संक्रमणमा बढ्ने क्रममा छ । उत्तरप्रदेश (यूपी) गएको एक दिनमा अहिलेसम्मकै सबैभन्दा धेरै जनामा संक्रमण पुष्टि भएको छ । यूपीमा गएको एक दिनमा करिब साढे हजार जना नयाँ संक्रमित थपिएका छन् । योसँगै त्यहाँ कुल संक्रमितको संख्या पचासी हजार नाघेको छ । त्यसैगरी अर्को छिमेकी राज्य बिहारमा संक्रमितको संख्यामा विष्फोटक ढंगले बृद्धि देखिएको छ । गएको एक दिनमा मात्रै बिहारमा करिब तीन हजार नयाँ बिरामी थपिएका छन् । योसँगै त्यहाँ कुल संक्रमितको संख्या एक्काउन्न हजार पुगेको छ । भारतका अत्यधिक जनसंख्या भएका यूपी र बिहार स्वास्थ्य पूर्वाधार र जनशक्तिका हिसाबले अन्य राज्यहरुको तुलनामा निकै कमजोर मानिन्छन् । त्यसैले यी राज्यहरुमा कोरोनाको संक्रमण बढ्दै जाँदा सीमा जोडिएका कारण त्यसको जोखिम नेपालमा पनि स्वत: बढेर जान्छ ।

महाराष्ट्र, तमिलनाडु, कर्नाटकलगायतका राज्यमा संक्रमण बढ्दै जाँदा ती राज्यहरुमा बाक्लो संख्यामा रहेका नेपालीहरु पनि संक्रमणको जोखिम बढ्दै गएको छ । भारतमा रोजगारी, अध्ययन र अन्य प्रयोजन गरी करिब बीस लाखको हाराहारीमा नेपालीहरु रहेको अनुमान छ । दिल्लीस्थित नेपाली दूतावासका अनुसार हालसम्म ८९ नेपालीहरु संक्रमित भएका छन् भने १४ जनाको मृत्यु भएको छ । तर, भारतमा रहेका प्रवासी नेपाली संगठनहरुले भने संक्रमित र मृत्यु हुने नेपालीहरुको संख्या दूतावासले बताएभन्दा धेरै रहेको दाबी गरेका छन् ।

प्रकाशित : श्रावण १७, २०७७ १०:०४
प्रतिक्रिया
पठाउनुहोस्
जनताको राय

पूर्वउपराष्ट्रपतिका छोरा तथा अखिल क्रान्तिकारीका महासचिव दिपेश पुनपछि सत्तारूढ माओवादीका उपाध्यक्ष तथा पूर्वसभामुख कृष्णबहादुर महरा सुन तस्करी अनुसन्धानमा पक्राउ परेका छन् । के सरकारले भ्रष्टाचारविरुद्ध शून्य सहनशीलता अपनाएकै हो त ?