एकैदिन २ हजार चिनियाँमा कोरोना भाइरस, मृतकको संख्या २५९ पुग्यो
बेइजिङ — चीनको राष्ट्रिय स्वास्थ्य आयोगका अनुसार एकैदिन कोरोना भाइरसको संक्रमण थप दुई हजारभन्दा बढी व्यक्तिमा देखिएको छ । शनिबार बिहानसम्म चीनमा कोरोना भाइरसले मृत्यु हुनेको संख्या २५९ पुगेको छ । त्यस्तै ११ हजार ७ सय ९१ व्यक्तिमा कोरोना भाइरसको संक्रमण देखिएको छ ।
हुबेई प्रान्तको वुहानबाट सुरु भएको कोरोना भाइरसको संक्रमण नियन्त्रण हुनुभन्दा पनि झन्झन् फैलिँदैे गएको छ । चीनबाट फैलिएको नोवल कोरोना भाइरसको संक्रमण करिब दुई दर्जन मुलुकमा देखिएपछि विश्व स्वास्थ्य संगठन(डब्लूएचओ) ले ‘विश्वव्यापी स्वास्थ्य संकटकाल’ घोषणा गरेको छ । जेनेभामा बिहीबार बसेको डब्लूएचओको आपत्कालीन बैठकले असाधारण घटनाका रुपमा व्याख्या गर्दै संकटकाल घोषणा गरेको हो ।
भनिएको भन्दा धेरै संक्रमित हुन सक्ने
चीनले आधिकारिक रुपमा सार्वजनिक गरेको तथ्याङ्कभन्दा धेरै व्यक्तिमा कोरोना भाइरसको संक्रमण भएको हुन सक्ने हङकङका अनुसन्धानकर्ताले जनाएका छन् । हङकङका अनुसन्धानकर्ताले शुक्रबार प्रकाशित गरेको एउटा रिपोर्टअनुसार वुहानमा झन्डै ७५ हजार व्यक्ति कोरोना भाइरसबाट संक्रमित भएको हुन सक्ने जनाइएको छ ।
वुहानका नेपालीको पीडा : ‘बसूँ जोखिम, फर्कूं झनै जोखिम’
उनीहरुको रिपोर्टमा ३७ हजार ३ सय ४ देखि एक लाख ३० हजार ३ सय ३० जनाको बीचमा संक्रमितको संख्या हुन सक्ने बताइएको छ । सार्वजनिक गरिएको संख्याभन्दा धेरै संक्रमित हुन सक्ने सम्भावना छ । किनभने संक्रमित सबै स्वास्थ्य परीक्षणका लागि आएका छैनन्,’ अनुसन्धानकर्ता ग्याब्रियल लिउङले बताए ।
कोरोना भाइरस : वुहानका विद्यार्थी फिर्ता ल्याउन माग गर्दै नेपालले चीनलाई पठायो पत्र
यसैबीच स्पेनमा कोरोना भाइरसको पहिलो संक्रमणको पुष्टि भएको छ । शुक्रबार त्यहाँको स्वास्थ्य मन्त्रालयले जनाएअनुसार ला गोमेरामा एक जना व्यक्तिमा संक्रमण देखिएको हो ।
वुहानबाट नेपालीको उद्धार कहिले ?
कोरोना भाइरस विश्वका २४ मुलुकमा देखिएको पुष्टि भइसकेको छ । तर, चीनमा बाहेक अन्यत्र भेटिएका संक्रमितको भने मृत्यु भएको छैन ।
कहाँ कति संक्रमित ?
जापान – १४
थाइल्याण्ड – १४
सिंगापुर – १३
हङकङ – १२
दक्षिण कोरिया – ११
अस्ट्रेलिया – ९
ताइवान – ९
मलेसिया – ८
मकाउ – ७
फ्रान्स – ६
अमेरिका – ६
भियतनाम – ५
जर्मनी – ५
यूएई – ४
क्यानडा– ३
इटाली – २
बेलायत – २
क्याम्बोडिया – १
फिनल्याण्ड– १
भारत – १
नेपाल – १
फिलिपिन्स – १
श्रीलंका – १
स्पेन -१
प्रकाशित : माघ १८, २०७६ ०८:४५