काठमाडौँ — चीनमा नोवल कोरोना भाइरसको संक्रमण व्यापक भएपछि घर फर्कन चाहने त्यहाँका नेपालीले सरकारबाट विशेष विमानको व्यवस्थासहित सहयोगको पहल नभएकामा दुःखेसो गरेका छन् । कतिपय विद्यार्थीले भने चीनमै आफूहरू सुरक्षित रहेकाले फर्कन नचाहेको जनाएका छन् ।

स्वास्थ्य मन्त्रालयका एक अधिकारी ले नेपालमा स्वास्थ्य परीक्षण, उपचारलगायतको उचित व्यवस्थापन नभऐसम्म चीनबाट आफ्ना नागरिकलाई फर्काउन सम्भव नरहेको बताए । ‘हामीकहाँ आईसीयूसहितको आइसोलेसन वार्ड निकै कम छन् । संक्रमण विस्तार भए रोक्न सकिने स्थिति छैन,’  उनले भने । चीनबाट एकैपटक विद्यार्थी ल्याएर चिकित्सकीय सहायतासहित आइसोलेसनमा राख्न सक्ने क्षमता यहाँ नरहेको ती अधिकारीको भनाइ छ । 

नोवल कोरोना भाइरसको संक्रमण सुरु भएको चीनको वुहान बाहिरका सहरहरूमा अध्ययन गर्ने नेपाली विद्यार्थीलाई त्यहाँका कलेजहरूले तत्काल घर फर्कन प्रोत्साहन गरिरहेका छन् । क्यापिटल मेडिकल कलेज, बेइजिङमा एमडी गरिरहेकी डा. नीति श्रेष्ठले भने उतै सुरक्षित अनुभव गरिरहेको बताइन् । ‘फर्के एयरपोर्ट, ट्रान्जिट, हवाईजहाज आदिमा संक्रमणको जोखिम हुन्छ,’ उनले भनिन्, ‘घर पुगे पनि दुई साता आइसोलेसनमै बस्नुपर्छ ।’ 

डा. नीतिले संक्रमणको लाक्षणिक उपचार गरिने भएकाले उच्च गुणस्तरको उपकरण र विज्ञतासहितको आधुनिक अस्पताल भएको ठाउँमा सुरक्षित भइने बताइन् । उनका अनुसार वुहानमा नेपाली विद्यार्थी क्वारेनटाइनको स्थितिमै छन् । चीनमा पढेका विद्यार्थीको संगठन अरनिको समाजका उपाध्यक्ष एवं नेपाल मेडिकल काउन्सिलका सदस्य डा. मनोजमान श्रेष्ठले आफूहरू नेपाली विद्यार्थीलगायतसँग निरन्तर सम्पर्कमा रहेको बताए ।