नेपाली खेलकुदमा लामो र समृद्ध इतिहास रहेको खेल हो, एथलेटिक्स अर्थात् दौड । विशेषतः लामो दूरीको दौडमा दक्षिण एसियाली क्षेत्रमै नेपाल अब्बल छ । म्याराथनमा त नेपाल जहिल्यै अब्बल भइरह्यो । जितबहादुर केसीदेखि वैकुण्ठ मानन्धर अनि नयाँ पुस्ताका म्याराथन धावकले जहिल्यै अन्तर्राष्ट्रिय खेल मञ्चमा नेपालको नाम उच्च राखेका छन् । नेपालमै पनि लामो समयदेखि म्याराथनका प्रतियोगिता निरन्तर आयोजना भइरहेका छन् ।
एक दशकभन्दा बढी समयदेखि नियमित आयोजना भइरहेको प्रतियोगिता हो, कान्तिपुर हाफ म्याराथन । प्रतियोगिताको १४ औं संस्करण आगामी ५ वैशाख अर्थात् शनिबार आयोजना हुँदै छ । यसपल्टको कान्तिपुर हाफ म्याराथनको नारा छ, ‘रन फर नेपाल’ । यही पृष्ठभूमिमा हामीले म्याराथन, दौड र यस विधासाग जोडिएका पात्र र घटनालाई समेटेर आजको कोसेली तयार पारेका छौं ।
