कञ्चनपुर — एकातिर आफन्त बेपत्ता भएको पीडा । अर्कोतिर बिहानैदेखि दिनभरि खोजीमा दौडिनुपर्ने । बर्दिया मधुवनका हरि परियारलाई अहिले यस्तै भएको छ ।

गत बुधबार भारत उत्तराखण्ड पौडीगढवालको थैलीसैन ब्लकको बंकुरा गाउँमा गएको बाढीपहिरोमा परी परियारकी भाउजू अमृतासँगै ५ जना नेपाली कामदार बेपत्ता भएका छन् । 

‘नदी किनार र पहिरो गएको ठाउँमा खोज्दा खोज्दै थाकिसक्यौं,’ परियारले भने, ‘अब अन्तिम पटक पहिराले थुपारेको गेग्रान पन्छाएर हेर्ने प्रयास गरिरहेका छौं, हातले पन्छाउन सकिने अवस्था छैन, पानीले बगाएर पन्छाउन सकिन्छ कि भनेर प्रयार भइरहेको छ ।’ उक्त क्षेत्रमा रहेका बेपत्ताका आफन्त र अन्य नेपालीहरु शनिबार पनि बिहानैदेखि आफन्तको खोजीमा जुटेका छन् । 

उत्तराखण्ड बाढी : नेपालीको स्थिति अझै अज्ञात

पहिरोमा बेपत्ता भएकी अमृताका श्रीमान रामु पनि बंकुरामै छन् । उनीहरु दुवै सँगै सडक निर्माणको काममा मजदुरी गर्न बंकुरा पुगेका हुन् । ‘हामीहरु घरबाट सँगै आएका हौं, रामनगरबाट छुट्टियौं,’ परियारले भने, ‘दाइभाउजू काम गर्ने ठाउँभन्दा दुई सय मिटर टाढा थिए, घटनापछि बंकुरा आएको छु ।’

बेपत्ता अमृताका जेठा छोरा यूएईमा छन् । कान्छा लद्दाकमा । उनीहरु दुवै घर फर्किरहेको परियारले बताए । जेठी छोरीको विवाह भइसकेको छ । कान्छी छोरी लक्ष्मी पनि सँगै थिइन् । उनी पनि पहिरोमा परेर घाइते भएकी छिन् । उनको खुट्टा भाँचिएर हल्द्वानीमा उपचार भइरहेको छ ।