बेपत्ता ५ जनाको अवस्था भने अझै अज्ञात छ।
What you should know
बर्दिया — भारतको उत्तराखण्ड राज्यको पौडी गढवालको बाकुडामा मंगलबार 'क्लाउड बर्स्ट' का कारण घाइते भएका चार जना उपचारपछि डिस्चार्ज भएका छन्। अरु दुई जनाको उपचार भइरहेको छ। बेपत्ता ५ जनाको अवस्था भने अझै अज्ञात छ।
गाउँमा काम गर्ने मानिसलाई भारत पुर्याउन समन्वय गरेका चित्रबहादुर पौडेलका अनुसार मधुवन नगरपालिका–५ गाउँ नम्बर ८ कि लक्ष्मी परियार र सोही पालिका–७ का भुपेन्द्र खत्रीको उपचार भइरहेको छ।
'परियारको शुशिला तिवारी अस्पताल हलद्धानी र खत्रीको फाउण्डेशन अस्पताल सतफलीमा उपचार भइरहेको छ,’ उनले भने, ‘मधुवन–५ का उदय गुरुङ, मधुवन–८ का गोपाल थापा, बारबर्दिया नगरपालिका–४ का कालिग्राम चौधरी र मधुवन–५ का अशोक परियार अस्पतालबाट डिस्चार्ज भएका छन्।'
दिल्लीस्थित नेपाली दुतावासका एसएसपी प्रकाश मल्लले भारतीय प्रहरीले दिएको जानकारी अनुसार तीनजना डिस्चार्ज र एक जनाको उपचार भइरहेको जनाए। बर्दियाका ५ जना नेपाली नागरिक बेपत्ता भएका छन्। तीमध्ये एकै परिवारका तीन जना सदस्य रहेका छन्। मधुवन नगरपालिका–६ गाउँ नम्बर ४ का एकै परिवारका तीन र सोही पालिका–८ गाउॅ नम्बर ८ का एक जना रहेका छन्।
पहिरोमा परी मधुवन नगरपालिका–६ का ३९ वर्षीय नरेन्द्र खड्का, ३० वर्षीया श्रीमती सरस्वती र छोरा २ वर्षीया रोमन वेपत्ता भएको खड्काका काका उद्दवले बताए । गत असार ६ गते सडक निर्माणको काममा दैनिक ज्यालादारी गर्न नरेन्द्र परिवार सहित गढवालको जमपुरीमा गएका थिए।
मधुवन–५ का गाउॅ नम्बर ८ का ४५ वर्षिय रामु परियारका श्रीमती अमृता बेपत्ता भएकी छन्। उनकी छोरी लक्ष्मी गम्भीर घाइते भएकी छन्। ठेगाना नखुलेका सुभाष विक पनि बेपत्ता रहेका छन्।
