आयोजक मेक्सिकोले पनि आफ्ना एक खेलाडी गुमाएको छ । इन्जुरी टाइमको पहिलो मिनेटमा सेजार मोन्टेजलाई विपक्षी खेलाडीले गोल गर्ने अवसरलाई बाधक बनाएको कारण सिधा रातो कार्ड दिइएको थियो । यससँगै खेलमा हालसम्म तीन वटा रातो कार्ड जारी भएका छन् ।

दक्षिण अफ्रिकाका थेम्बा ज्वाने मेक्सिकोसँगको खेलमा रातो कार्ड पाउने दोस्रो खेलाडी बनेका छन् । उनलाई भीएआरको सहयोगमा रेफ्रीले विपक्षी टोलीका खेलाडीलाई हातले प्रहार गरेको कारण ८४ औं मिनेटमा रातो कार्ड दिइएको हो ।

मेक्सिकोका लागि ३५ वर्षीय राउल हिमिनेजले दोस्रो गोल गरेका छन् । खेलको ६७ औं मिनेटमा उनले रोबर्टो अल्भारडोको उत्कृष्ट क्रसमा हेड गोल गरेका थिए ।

याया सिथोलेले रातो कार्ड पाएपछि दक्षिण अफ्रिका ५० औं मिनेटमा १० खेलाडीमा खुम्चिएको छ । मेक्सिकाका ब्रायन गुटिरेजले एक्लै अगाडि बढाएको बलमा पेनाल्टी बक्सबाहिर लास्ट म्यानको रूपमा रहेका सिथोलेले लडाएपछि उनलाई सिधै रातो कार्ड दिइएको हो ।

तस्बिर : एपी ।

मेक्सिकोका जुलियन क्विनोनेज विश्वकप २०२६ मा गोल गर्ने पहिलो खेलाडी बनेका छन् । उनले बिहीबार राति उद्घाटन खेलमा दक्षिण अफ्रिकाविरुद्ध नवौं मिनेटमा गोल गरेका हुन् ।

दक्षिण अफ्रिकाका गोलरक्षक रोनवेन विलियम्सले दिएको बललाई रक्षकले नियन्त्रण गुमाउँदा मेक्सिकोले त्यसको फाइदा उठाएको थियो र इरिक लिराले दिएको पासमा क्विनोनेजले दक्षिण अफ्रिकी गोलरक्षकको खुट्टामुनिबाट गोल गरेका थिए ।

अमेरिकी र क्यानडासँगै विश्वकप आयोजना गरिरहेको मेक्सिकोलाई घरेलु मैदानमा समर्थन गर्न ठूलो संख्यामा दर्शकहरू रंगशाला आएका छन् । 

चौथो मिनेटमा नै मेक्सिकोका राउल हिमिनेजले गरेको प्रहारलाई दक्षिण अफ्रिकाका गोलरक्षक रोनवेन विलियम्सले उत्कृष्ट बचाउ गरेका थिए ।

मेक्सिकोले विश्वकप २०२६ मा पहिलो गोल गरेको छ । मेक्सिकोका जुलियन क्विनोनेज विश्वकप २०२६ मा गोल गर्ने पहिलो खेलाडी बनेका छन् । उनले बिहीबार राति उद्घाटन खेलमा दक्षिण अफ्रिकाविरुद्ध नवौं मिनेटमा गोल गरेका हुन् ।

सन् २०१० को फुटबल विश्वकपमा पनि दक्षिण अफ्रिका र मेक्सिकोबीच पहिलो खेल भएको थियो । त्यो खेल १–१ को बराबरीमा टुंगिएको थियो । उक्त खेल दक्षिण अफ्रिकाको जोहानसबर्गमा भएको थियो ।

पहिलो पटक ४८ राष्ट्र सहभागी हुने यो प्रतियोगिता उत्तर अमेरिकाका ३ देश संयुक्त राज्य अमेरिका, क्यानडा र मेक्सिकोमा संयुक्त रूपमा आयोजना हुँदैछ । ती देशका १६ वटा सहरका रंगशालामा विश्वकप फुटबलका  १ सय ४ खेल खेलिनेछन् । बिहीबार राती पौने १ बजे सुरु हुने उद्घाटन खेलमा मेक्सिकोले दक्षिण अफ्रिकाको सामना गर्दै छ । 

विश्वकप सुरु भएसँगै काठमाडौंमा फुटबलको उत्साह बढेको छ । 

विश्वकपका खेलहरू ७ समुन्द्र पारि हुने भए पनि काठमाडौंका सडक, क्लब, रेस्टुरेन्ट, लाउन्ज र सार्वजनिक स्थलहरूमा ठूल्ठूला पर्दामा विश्वकप फुटबल हेर्नेहरूको भीड लागेको छ  । 

विश्वकपको पूर्वसन्ध्यामा काठमाडौंको कालिमाटीस्थित एक स्पोर्ट्स पसलमा जर्सी, झन्डा तथा मेडलका नमुना खरिद गर्दै खेलप्रेमी । तस्बिर : सुरज कुँवर/कान्तिपुर