काठमाडौँ — विराटनगर किंग्सविरुद्ध नेपाल प्रिमियर लिग (एनपीएल) को लिग चरणको अन्तिम खेलमा सुदूरपश्चिम रोयल्सले एकतर्फी हार बेहोरे पनि मंगलबार क्वालिफायर १ मा उत्रँदा स्थिति फरक हुने सुदूरका प्रशिक्षक जगत टमाटा बताउँछन् । 

सुदूरपश्चिम र विराटनगर मंगलबार फाइनल प्रवेश पाउन एकअर्काविरुद्ध खेल्दैछन् । सुदूरपश्चिमलाई नै लिग चरणको अन्तिम खेलमा हराएपछि विराटनगर यो स्थितिमा पुगेको हो । सुदूरपश्चिम पहिलो ६ खेल जितेर क्वालिफायर १ मा पुगेको थियो ।

विराटनगरलाई शीर्ष २ मा रहन सुदूरपश्चिमसँगको खेल जितेर मात्र पुग्दैनथ्यो, ठूलो अन्तरको जित पनि चाहिन्थ्यो । सुदूरपश्चिमलाई १ सय ४७ रनमा रोकेपछि विराटनगरले यो लक्ष्य १४ ओभरभित्र पूरा गरेमात्र टोलीको शीर्ष दुईमा पर्ने निश्चित हुन्थ्यो । तर, दक्षिण अफ्रिकी ब्याटिङ स्टार फाफ डु प्लेसिस र अस्ट्रेलियन खेलाडी साम हेजलेटको तुफानी ब्याटिङपछि विराटनगरले १२ ओभरभित्रै १ सय ५० रन बनाएर पुनः सुदूरपश्चिमसँगको भेट तय गरेको थियो ।

आफ्ना प्रमुख बलर स्कट कुग्लेइनविनै खेल्दा सुदूरपश्चिमले त्यसको मूल्य चुकाउनुपरेको थियो । पुनः विराटनगरसँग खेल्दा फरक स्थिति हुने सुदूरका प्रशिक्षक टमाटाको भनाइ छ । तर सुदूरपश्चिमका लागि क्वालिफायर एक झन कठिन हुनसक्छ । अस्ट्रेलियन ब्याटरद्वय जस ब्राउन र क्रिस लिन स्वदेश फर्किएपछि टोली थप संकटमा परेको छ । ब्राउनसँगको सम्झौता डिसेम्बर ६ सम्म मात्र रहेकाले उनी फर्किएको टमाटा बताउँछन् । त्यस्तै लिन चितवन राइनोजविरुद्धको छैटौं खेलमा घाइते भएका थिए उक्त खेलमा उनले ५६ बलमा अविजित ७५ रन बनाएका थिए । त्यसपछि उनी विराटनगरसँगको खेल खेल्न सकेनन् ।