काठमाडौँ — चर्चाको हिसाबमा हेर्ने हो भने विराटनगर किंग्सलाई विजेता मान्दा नै हुन्छ । विराटनगरले के मात्र गरेन । फाफ डु प्लेसिस, मार्टिन गप्टिल, मर्च्यान्ट डी ल्याङ्गेलाई अनुबन्धन गरेर सामाजिक सञ्जाल पूरै हल्लाएको छ । तर वास्तविक विजेता बन्न मैदानभित्र नै जित्नुपर्छ । 

विराटनगरले यसका लागि पहिलो मन्त्रस्वरुप च्याम्पियन प्रशिक्षक पुबुदु दासानायकेलाई ल्याएको छ । पुबुदुलाई जति नेपाली क्रिकेटका जानकारी अन्यलाई सायदै होला । उनैको प्रशिक्षणमा जनकपुर बोल्ट्स गत सिजन एनपीएल विजेता बनयो । विश्व क्रिकेटका ठूला नामहरूलाई जम्मा गरेको विराटनगरलाई उनले व्यवस्थापन गर्नेछन्, त्यो हेर्ने विषय बनेको छ । 

गत सिजन विराटनगरले ७ मध्ये २ खेलमात्र जित्न सकेको थियो । जसका कारण टोली प्लेअफमा पुग्न असफल रह्यो । 

आफ्नो टोलीलाई अझ सुदृढ बनाउनेक्रममा विराटनगरले सूर्य तामाङ, नारायण जोशी, शंकर राना र शाहिल पटेललाई भित्र्याएको थियो । टोलीले दिल्लीमा यस सिजनका लागि प्रशिक्षण गरेको थियो । तर अभ्यास खेलमा विराटनगरको स्थिति खासै सुध्रिएन र केही प्रमुख खेलाडीविना उत्रिएको टोली काठमान्डु गोर्खाजसँगको अभ्यास खेलमा ४३ रनमै अलआउट भएको थियो ।