काठमाडौँ — गत वर्ष अक्सनमा सवैभन्दा अभाग्यशाली टोली काठमान्डु गोर्खाज थियो । टोली लक्की ‘ड्र’ मा १४ मध्ये १२ मा अनलक्की भएको थियो । पहिलो सिजनमा प्लेअफमा पुग्न नसकेपछि गोर्खाजले टिममा धेरै परिवर्तन गरेको छ ।

पहिलो परिवर्तन प्रशिक्षक मोन्टी देसाईलाई भित्र्याउनु थियो । नेपाललाई विश्वकप, एसिया कप र एकदिवसीय अन्तर्राष्ट्रियको सपना देखाएका मोन्टीको आगमनमा गोर्खाज भाग्यशाली बन्दै गएको छ ।

मिनी अक्सनबाट टोलीले आदिल आलम अन्सारी, सन्तोष यादव र आकाश त्रिपाठीलाई भित्र्याउन सफल भयो । त्यसमध्ये आदिल र सन्तोषलाई अधिकतम मूल्यपछि लक्की ‘ड्र’ बाटै पाएको थियो । यसले गोर्खाजको नेपाली खेलाडीको उपस्थिति बाक्लो बनाइदिएको छ । मैदानमा फर्किएयता आदिलले राष्ट्रिय टोलीमा पनि पुनरागमन गरिसकेका छन् । सन्तोषले यू–१९ टोलीमा प्रभावशाली प्रदर्शन देखाएका थिए ।

करण केसीको कप्तानीमा रहेका गोर्खाजमा भीम सार्की, शाहब आलम, रशिद खानसहितका खेलाडी छन् । मध्यक्रमको ब्याटिङमा प्रतीक श्रेष्ठ र तुलबहादुर थापा गोर्खाजको आधार हुन सक्छन् ।

नामिबियाका कप्तान जेहरार्ड इरसमसबाहेक अन्य सबै गोर्खाजबाट पहिलो पटक खेल्न लागेका हुन् । अमेरिकी ब्याटर मिलिन्द कुमार उत्कृष्ट लयका ब्याटर हुन् । एकदिवसीयमा देखाएको उत्कृष्ट फर्मलाई ट्वान्टी–२० मा उतानुपर्ने चुनौती उनीसामु छ । एसोसिएट क्रिकेटका उत्कृष्ट दुई खेलाडी इरसमस र मिलिन्दको साथमा गोर्खाजले यसपालि ठूलो लक्ष्य बनाएको छ । 

जोहन सिम्पसनसँग यसअघि नै नेपालमा आएर खेलेको अनुभव छ । उनले २०१८ मा चितवन टाइगर्सबाट एभरेस्ट प्रिमियर लिग (ईपीएल) खेलेका थिए । सन्नी पटेल नेपाली क्रिकेटका परिचित अनुहारमध्ये एक हुन् । उनले यसअघि नै नेपालबाट विभिन्न फ्रेन्चाइज लिग खेल्नेक्रममा ईपीएल, पोखरा प्रिमियर लिग र धनगढी प्रिमियर लिग जितिसकेका छन् । बेन चार्ल्सवर्थ इंग्लिस काउन्टीमा अहिले जमिरहेका खेलाडी हुन् ।