काठमाडौँ — एउटा इतिहास कहिल्यै मेटिने छैन । जनकपुर बोल्ट्स पहिलो संस्करणको एनपीएल विजेताको रूपमा सधैं रहनेछ । गत वर्ष जनकपुरले मैदानमा त्यो च्याम्पियन शैली देखाएको थियो । जनकपुरको व्यवस्थापकीय क्षमता यस्तो छ, जो सधैं च्याम्पियनका लागि खेल्छ । 

यसपटक दृश्य फरक बनेको छ । टोलीका च्याम्पियन प्रशिक्षक पुबुदु दासानायके जनकपुर लागेका छन् । टेस्ट खेलाडीको कोटा नपाएपछि न्युजिल्यान्डका अलराउन्डर जिम्मी निसम शुक्रबारमात्र पोखरा एभेन्जर्स लागेका छन् । जनकपुरले यी दुईको खाडल कसरी पुर्नेछ, त्यो नै च्याम्पियन टोलीको व्यवस्थापनसामु प्रमुख चुनौती बनेको छ ।

पुबुदुको स्थानमा जनकपुरले वेस्ट इन्डिजका ब्याटिङ हस्ती शिवनारायण चन्द्रपाललाई प्रशिक्षकको जिम्मेवारी दिइसकेको छ । सीपीएलको फ्रेन्चाइज टोली जमैका तलवाहजको प्रशिक्षक रहिसकेका चन्द्रपालले नेपाली खेलाडीबारे आफूले स्थानीय प्रशिक्षकसँग सल्लाह लिने जनाइसकेका छन् । यस्तोमा टोलीका नेपाली प्रशिक्षक मनोज कटुवालको भूमिका विशेष बन्न सक्छ ।

निसम लिन नपाउने बाध्यताबीच जनकपुरले वायन पार्नेल, इमरान ताहिरजस्ता अनुभवी खेलाडीलाई लिइसकेको छ । टोलीले उत्कृष्ट ब्याटिङ लयमा रहेका सञ्जय कृष्णमूर्तिलाई समावेश गरेर टिम मजबुत बनाउने प्रयास गरेको छ । अर्का विदेशी खेलाडी नामिबियाका जान निकोल लफ्टी इटन छन्, जसले २२ महिनाअघि त्रिवि क्रिकेट मैदानमै त्यतिखेरको 

ट्वान्टी–२० अन्तर्राष्ट्रियमा सवैभन्दा छिटो शतक बनाएका थिए । लाहिरू मिलान्थाबाहेक अन्य सबै जनकपुरले नयाँ भित्र्याएका विदेशी खेलाडी हुन् । लफ्टी इटनले भने गत वर्ष चितवनबाट खेलेका थिए ।

कप्तान अनिल साह र मार्की आसिफ शेखका कारण जनकपुरको सुरुआती ब्याटिङ मजबुत रहेको छ । त्यसमा पहिलो सिजनको सर्वाधिक रनकर्ता मिलान्था भने आसिफको ओपनिङ जोडी हुन् । मायन यादव र शुभ कंसाकार त्यसपछिका ब्याटर हुन् । गत सिजन सर्वाधिक १७ विकेट लिने ललित राजवंशीसहित किशोर महतो, रुपेश सिंहलाई बलिङमा पार्नेल र ताहिरले साथ दिनेछन् ।