काठमाडौँ — डा. ओजस्वी शेरचन पेशाले बायोकेमेस्ट्री प्राध्यापक र अनुसन्धानकर्ता हुन् । चिकित्सा क्षेत्रमा लामो अनुभव बटुलेकी उनी अहिले राष्ट्रिय स्वतन्त्र पार्टी (रास्वपा) बाट समानुपातिक सांसदको रूपमा संसद् प्रवेश गरेकी छन् । 

काठमाडौंको पानीपोखरीमा जन्मिएकी उनले एमबीबीएस अध्ययन पूरा गरेपछि बायोकेमेस्ट्रीलाई आफ्नो विशेषज्ञताको क्षेत्रका रूपमा रोजिन् । यस क्षेत्रमा उनी प्राध्यापन तथा अनुसन्धानमूलक कार्यमा निरन्तर संलग्न रहिन् । राजनीतिमा आउनुअघि नेपाल मेडिकल कलेजमा बिगत दुई बर्षदेखि कार्यरत थिइन् । 

त्यसअघि बी.पी. कोइराला स्वास्थ्य विज्ञान प्रतिष्ठानमा दश बर्ष अनुसन्धान र स्वास्थ्य क्षेत्रको सुधारमै केन्द्रित रहेको उनले सुनाइन् । अनुसन्धान, शिक्षण र सेवाको यात्राबाट राजनीतिमा प्रवेश गर्नु देशप्रतिको आफ्नो दायित्व रहेको उनको भनाइ छ।

शेरचन राजनीतिमा आउनुमा भदौ २३ र २४ को जेन-जी आन्दोलन कारक हो । उक्त आन्दोलन पश्चात उनको राजनीतिप्रति चासो बढेको हो । राजनीतिमा आफ्नो आवद्धताबारे बताउँदै उनले भनिन्, 'कुनै न कुनै रूपमा योगदान गर्नुपर्छ भन्ने भावनाले सक्रिय राजनीतिमा आएँ। निति निर्माणमा सक्रिय हुन्छु भन्ने लागेको छ ।'

उनको परिवार नै चिकित्सा क्षेत्रमा जोडिएको छ । शेरचनका बुबा सुक्ष्मजीवविज्ञान (माइक्रोबायोलोजी) प्राध्यापक हुन् भने आमा त्रिभुवन शिक्षण अस्पतालमा पब्लिक हेल्थमा काम गर्थिन् । उनका श्रीमान् पनि चिकित्सक हुन्। बुबाको पथ पछ्याउँदै उनी अनुसन्धानमा सक्रिय रहिन् ।