नेपालगन्ज — राष्ट्रिय स्वतन्त्र पार्टी (रास्वपा) बाट समानुपातिकतर्फ प्रतिनिधिसभा सदस्य भएकी ४३ वर्षीय सुष्मा स्वर्णकार ‘डिम्पल’ले सामाजिक अभियानमार्फत राजनीतिमा प्रवेश गरेकी थिइन् । 

दुई छोराछोरी हुर्किएपछि उनी घरधन्दाबाट बिस्तारै सामाजिक अभियानमा सक्रिय हुन थालिन् । समाजमा बिभेद र अभाव भोग्दै आएकी उनी अधिकारका लागि संचालन हुने अभियानहरुमा सक्रिय बनिन् । त्यही अभियानको सक्रियताले उनी अब कानुन निर्माण गर्ने सर्वोच्च थलो प्रतिनिधिसभामा पुगेकी हुन् ।  

‘दलितलाई खै...’ भन्ने अभियानबाट जोडिँदै उनी अभियन्ताको रुपमा अगाडि बढिन् । दलित अधिकारको अभियानमा सक्रिय बाँकेको कोहलपुर नगरपालिका–५ घर भएकी सुष्माको परिवार छोराछोरी पढाउन काठमाडौं पुगेको थियो । उनको माइती भारत हो । भारतमा जन्मिएकी उनी आठ वर्षको उमेरमा उनी परिवारसँग नेपाल फर्किइन् । १८ वर्षको उमेरमा विवाह गरिन् । श्रीमान्को मूल घर सल्यान भए पनि उनको परिवार बसाइँसरेर बाँके आयो । २०५८ सालदेखि काठमाडौं कर्मथलो बनाइरहेकी सुष्माको नेपालगन्ज र काठमाडौं दुबै ठाउँमा बसोबास छ । उनले माध्यमिक तहसम्म अध्ययन गरेकी छन् । 

आफू दलित क्लस्टरबाट समानुपातिकतर्फ सांसद भएकाले पनि अब समाजमा दबाइएका आवाज बुलन्द गर्ने उनले सुनाइन् । ‘पहिला छोराछोरी सानै थिए परिवारको जिम्मेवारीले बाहिर आउने अवस्था रहेन् । छोराछोरी हुर्किएपछि अहिले आफु पनि अगाडि बढ्नुपर्छ भन्ने लागेर सामाजिक अभियानमा जोडिएकी थिए,’ उनले भनिन्, ‘विशेषगरी दलित महिलाको अधिकारको क्षेत्रमा आवाज उठाउन मेरो पहल  रहनेछ ।’