पहिलो कार्यकालमै संसदमा सक्रिय उपस्थिति देखाएकी डाँगी युवा पुस्ताको आवाज उठाउने नेतृका रूपमा परिचित थिइन् । उनले संसदमा बारम्बार ‘जेनजी’ पुस्ताका मुद्दा उठाउँदै सरकारको ध्यानाकर्षण गराएकी थिइन् । २०७९ को संसदमा उनी ‘कान्छी माननीय’ का रूपमा समेत चिनिएकी थिइन् । नीति निर्माणका बहसमा सक्रिय रहदै रास्वपाको सचेतकको जिम्मेवारीसमेत सम्हालिन् । 

उनले काठमाडौंस्थित जया मल्टिपल क्याम्पसबाट सामाजिक कार्य विषयमा स्नातक तथा त्रिभुवन विश्वविद्यालयबाट पत्रकारितामा स्नातकोत्तर अध्ययन पूरा गरेकी छन् । राजनीतिमा प्रवेश गर्नुअघि उनी करिब पाँच वर्ष पत्रकारितामा सत्रिय थिइन् । पत्रकारिताबाटै सार्वजनिक बहस र नीति निर्माणप्रतिको रुचि बढेपछि उनी राजनीतिमा होमिएकी हुन् ।

स्थानीय समस्या, जनचाहना र विकासका प्राथमिकताबारे नजिकबाट परिचित रहेको बताउँदै उनले क्षेत्रको विकास निर्माणलाई गति दिने प्रतिबद्धता जनाएकी छन् । प्रत्यक्ष निर्वाचनबाट संसद् पुग्दै दोस्रो कार्यकाल सुरु गरेकी डाँगीलाई युवा पुस्ताको आशासहित नयाँ पुस्ताको नेतृत्वका रूपमा हेरिएको छ ।