काठमाडौँ — मतगणना भएदेखि शुक्रबार साँझसम्मै कांग्रेसका सहमहामन्त्री उदयशमशेर राणाले अग्रस्थान लिइरहेको ललितपुर–१ मा अन्तिममा रास्वपाका बुद्धरत्न महर्जनले विजयी हात पारे । अग्रस्थानमा रहेकै बेला शुक्रबार साँझ कान्तिपुरसँगको कुराकानीमा राणाले भनेका थिए, ‘सहरी क्षेत्रको मत नगन्दासम्म म अगाडि थिए । तर, सहरतिर गणना भएपछि अघि लाग्छु । अरुतिरको ‘ट्रेन’ हेर्दा भन्न सकिने स्थिति छैन ।’ 

नभन्दै  भनेजस्तै परिणाम आयो । सहरी क्षेत्रको गणना सकिदा महर्जनले उनलाई पछि पारे । त्यसपछि उनीमाथि आउन सकेनन् । काठमाडौं उपत्याकामा धेरै कांग्रेस नेता तथा कार्यकर्ताहरूले राणाको एक्लो उपस्थित हुनसक्ने आशा राखिरहेका थिए । तर,  त्यो आशा लामो समय रहन सकेन ।  शनिबार बिहान ८ हजार ८ सय ५३ मतान्तरमा राणा पराजित भए । 

महर्जनले २३ हजार ३ सय ७३ मत ल्याउँदा राणाले १३ हजार ५ सय २० मत पाएका थिए । पार्टीको १४औं महाधिवेशनबाट केन्द्रीय सदस्य भएका राणा विशेष महाधिवेशनबाट एकैचोटि सहमहामन्त्री भएका थिए । 

राणाले बिहान फेसबुकमा स्टाटस लेख्दै महर्जनलाई जनताको विश्वासलाई केन्द्रमा राखेर जिम्मेवारी प्रभावकारी रुपमा निर्वाह गर्न आग्रहसहित सफलताको शुभकामना दिएका छन् । 

उनले जित र हार दुवै लोकतान्त्रिक प्रकृया रहेको भन्दै जनताको म्यानडेटलाई सम्मान गर्ने र ललितपुर-१ का नागरिकहरूको सुख दुःखमा निरन्तर साथ रहने प्रतिबद्धता जनाएका छन् । 

३ जेठ २०३५ मा ललितपुर महालक्ष्मी नगरपालिमा जन्मिएका महर्जन रत्नराज्य क्याम्पसाबट बिएसम्म अध्ययन गरेका छन् । २०७९ सालको प्रतिनिधिसभा निर्वाचनमा पनि उनी प्रत्यासी थिए ललितपुर–२ बाट । यस क्षेत्रबाट रास्वपाका सचिनकुमार घिमिरे उम्मेदवार थिए र उनले ३ हजार २ सय ७७ मत ल्याएर तेस्रो स्थान प्राप्त गरेका थिए ।

त्यतिबेला यस क्षेत्रबाट कांग्रेसका राणा नै निर्वाचित भएका थिए । उनले एमालेका नवराज सिलवाललाई पराजित गरेका थिए ।  म ०७९ को निर्वाचनमा उदयशमसेर राणाले एमालेका नवराज सिलवाललाई पराजित गरेका थिए ।

४७ वर्षीय महर्जनले आफू बिशुद्ध सेवाका लागि राजनीतिमा आएको बताएका छन् । ‘पैसा आफ्नो व्यवसायबाट कमाई सके । मलाई राजनीतिमा गएर पैसा कमाउनु छैन । समाजसेवा गर्नका लागि म राजनीतिमा आएको हो,’ मतदातामाँझ उनले भन्दै आएका थिए, ‘३५ वर्षसम्म अरुलाई भोट दिनुभयो । यसपटक मलाई जितेर पठाउनुहोस् । ललितपुरको विकास र सेवा गर्छु, निराशालाई आशामा परिणत गर्छु ।’