अर्घाखाँची — एमालेको ११ औं केन्द्रीय महाधिवेशनका लागि अर्घाखाँचीमा भएको महाधिवेशन प्रतिनिधि छनोटमा लुम्बिनी प्रदेश सांसद रामजीप्रसाद घिमिरे पराजित भएका छन् ।

घिमिरे एमाले उपाध्यक्ष विष्णु पौडेल निकट मानिन्छन् ।पछिल्लो सयम लुम्बिनी प्रदेशका मुख्यमन्त्री एवं एमाले केन्द्रीय सदस्य चेतनारायण आचार्यसँग घिमिरेको असमझदारी बढेको छ ।

अर्घाखाँचीबाट निर्वाचित र सर्वसम्मत भएका १५ जना सबै आचार्य समूह पक्षधर हुन् । आचार्य केपी शर्मा ओली निकट हुन् । लुम्बिनी प्रदेशसभा भौतिक पूर्वाधार विकास समितिका सभापतिसमेत रहेका घिमिरेले १ हजार २ सय ७ मत ल्याएर पराजित भए । उनको समूहबाट खुलामा प्रेमनारायण गैरे, श्रीकृष्ण भुसाल र महिलातर्फ शीतगंगा नगरपालिका उपप्रमुख गीता भाट क्षेत्री पनि पराजित भइन् । दुई पटकसम्म प्रदेशसभा–२ बाट निर्वाचित घिमिरे एमाले लुम्बिनी सचिवालय सदस्य हुन् ।  

खुलातर्फको प्रतिस्पर्धामा पिताम्बर भुसाल सबैभन्दा सर्वोकृष्ट मत ल्याएर विजयी भए । उनले ३ हजार १ सय ८७ मत ल्याए । संस्थापन पक्षबाट प्रतिनिधि निर्वाचित हुनेमा शम्भुप्रसाद पोखरेलले २ हजार ७ सय ४३, वसन्तकुमार श्रेष्ठले २ हजार ८ सय ४१, रेशम थापाले २ हजार ७ सय ७०, तेजप्रसाद खनालले २ हजार ५ सय ३३,  र कमलप्रसाद घिमिरेले २ हजार ४ सय ४४ मत ल्याएर विजयी भए । ६ जना खुला प्रतिनिधिमा ९ जनाको उम्मेदवारी परेको थियो ।