कोशी प्रदेशमा पार्टी संगठन विस्तारमा सक्रिय भूमिका खेलेका ४३ वर्षीय थापा रास्वपाका प्रदेश महामन्त्री समेत हुन् । सिभिल इन्जिनियरिङमा स्नातक उनी लामो समयदेखि सामाजिक तथा राजनीतिक गतिविधिमा समेत सक्रिय थिए । वैकल्पिक राजनीति, सुशासन र पारदर्शिताको मुद्दा उठाउँदै उनले भ्रष्टाचारविरुद्ध जनचेतना फैलाउने अभियान चलाएका थिए । 

निर्वाचन अभियानका क्रममा थापाले कृषि, स्वास्थ्य, शिक्षा, पूर्वाधार र पर्यटनलाई प्राथमिकतामा राख्दै चुनावी प्रतिबद्धता सार्वजनिक गरेका थिए । स्थानीय आवश्यकता र दीर्घकालीन विकासलाई केन्द्रमा राखेर तयार गरिएको प्रतिबद्धतापत्रमार्फत उनले क्षेत्रीय समृद्धिको खाका प्रस्तुत गरेका थिए । कृषि क्षेत्रलाई विकासको मेरुदण्ड मान्दै आधुनिक खेती प्रणाली विस्तार, किसानलाई उचित मूल्य सुनिश्चित गर्ने बजार व्यवस्था, भण्डारण केन्द्र निर्माण तथा प्रत्येक स्थानीय तहमा कृषि प्रयोगशाला स्थापना गर्ने योजना अघि सारेका छन् । उम्मेदवारी दर्तापछि इटहरीस्थित एक विद्यालयको जग्गा भाडासम्बन्धी विषयलाई लिएर थापाविरुद्ध निर्वाचन अधिकृतको कार्यालयमा उजुरी समेत परेको थियो । तर, छानबिनपछि उजुरी खारेज भएको थियो ।

उनका प्रतिस्पर्धी उम्मेदवार राजीव कोइराला र सुजन लामाले थापालाई बधाई दिँदै कार्यकाल सफलताको कामना गरेका छन् । थापाले भने, ‘सुशासनसहितको समृद्धि र उत्तरदायी नेतृत्व’मार्फत सुनसरी–२ लाई नमुना निर्वाचन क्षेत्रका रूपमा विकास गर्ने प्रतिबद्धता जनाएका छन् । स्थापित दलका उम्मेदवारलाई पराजित गर्दै प्रतिनिधिसभामा पुगेका थापा नयाँ राजनीतिक शक्ति र वैकल्पिक नेतृत्वको प्रतीकका रूपमा उभिएका छन् । आगामी दिनमा उनको कामले नै राजनीतिक यात्राको दिशा तय गर्ने अपेक्षा समर्थकहरूले गरेका छन् ।