काठमाडौँ — शुक्रबार बिहानदेखि अविरल रूपमा परेको वर्षाका कारण शनिबार मध्यान्हसम्म विभिन्न राजमार्गका ६८ स्थानमा पहिरो खसेर सडक अवरुद्ध बनेका छन् । काठमाडौं जोड्ने अधिकांश सडक ठप्प छन् ।

 भौतिक पूर्वाधार तथा यातायात मन्त्रालयका सहसचिव एवं प्रवक्ता सुशीलबाबु ढकालका अनुसार काठमाडौं जोड्ने नागढुंगा–नौबिसे, दक्षिणकाली–सिस्नेरी–भिमफेदी, अरनिको राजमार्गको विभिन्न खण्डमा पहिरो खसेर यातायात ठप्प बनेको छ ।

त्यस्तै, बीपी राजमार्ग, मध्यपहाडी, पृथ्वी राजमार्गको विभिन्न खण्डमा पहिरो खसेर सवारी साधन र यात्रु सडकमै रोकिएका छन् ।

‘पहिरोको जोखिम रहेको र पहिरो खसेको ठाउ‍ँमा मेसिन उपकरणसहित प्राविधिक टोली तैनाथ अवस्थामा राखेका छौं,’ प्रवक्ता ढकालले भने, ‘कतिपय ठाउँमा पहिरोले ठप्प बनेको सडकलाई एकतर्फी र कतै पहिरो पन्छाएर दुईतर्फी रूपमा सञ्चालनमा ल्याएका छौं ।’ पानी परिरहेकाले ठूलो पहिरो खसेको ठाउँमा भने पन्छाउन समस्या भइरहेको उनको भनाइ छ ।