१८.१२°C काठमाडौं
काठमाडौंमा वायुको गुणस्तर: १२४

आलम परिवारको विरासतमा विराम

शिव पुरी

रौतहट — गौर–चन्द्रनिगाहपुर सडक खण्डको बमनहरबाट झन्डै सात किलोमिटर पश्चिम गएपछि राजपुर फरदहवा गाउँ आउँछ । यो तत्कालीन कांग्रेस नेता शेख इद्रिसको राजनीतिक उर्वर भूमि हो । इद्रिसपछि उनका भतिजा पूर्वमन्त्री मोहम्मद आफताब आलमले राजनीतिक विरासत सम्हालेका थिए । हरेक राजनीतिमा देखिने आलम परिवारको दबदबा अब टुटेको छ । आलम परिवारको लामो पारिवारिक राजनीतिक विरासत तोड्दै स्वतन्त्र उम्मेदवार किरणकुमार साह रौतहट–२ बाट प्रतिनिधिसभा सदस्य निर्वाचित भएका छन् ।

आलम परिवारको विरासतमा विराम

पहिलो संविधानसभा निर्वाचनको अघिल्लो रात २०६४ चैत २७ गते राति राजपुर–४ स्थित इद्रिसकै गोठमा बम विस्फोट हुँदा घाइतेलाई जिउँदै चिम्नी भट्टामा हालेको आरोपमा आफताब पुर्पक्षका लागि नख्खु कारागारमा छन् । प्रतिनिधिसभाको यो चुनावमा सत्य र न्यायको जित हुने भन्दै आएको आलम परिवारले जेठो छोरा फिरदोस आलमलाई चुनावी मैदानमा अघि सारेको थियो ।

बुवा जेल परेपछि नेपाल प्रहरीमा (इन्स्पेक्टर) चिकित्सकका रूपमा कार्यरत फिरदोसले राजीनामा दिई गाउँ आएर राजनीति थालेका थिए । फिरदोस त्यही क्षेत्रका अर्का नेता साहसँग ४ हजार ५ सय ९४ मतान्तरले पराजित भए । स्वतन्त्र उम्मेदवार साहले ३२ हजार ८ सय ४२ मत ल्याए भने फिरदोसले २८ हजार २ सय ४८ मत पाए । ०७४ मा किरण आफताबसँग पराजित भएका थिए ।

‘एकै परिवारमा राजनीति घुमिरहेको जनताले बर्दास गरेनन्,’ साहले भने, ‘यस पटक मुस्लिम समुदायले समेत मलाई माया गरे ।’ सामान्य परिवारका साहले तत्कालीन माओवादी नेता प्रभु साहनिकट रहेर काम गरे । ०७३ मा माओवादी छाडेका उनी ०७४ मा प्रतिनिधिसभा सदस्यमा आफताबसँग पराजित भए । त्यसपछि गाउँमै बसेर स्थानीय मुद्दा र मतदातासँगको सम्बन्ध विस्तारमा लागे । आफताबविरुद्धको मुद्दामा पनि उनले स्थानीयस्तरमा भूमिका खेले । गत स्थानीय तह निर्वाचन अगाडि प्रभु साहले किरणलाई आफूसँगै एमाले प्रवेश गराएर श्रीमती उषा कोइरालालाई राजपुर नगरपालिका प्रमुखमा उम्मेदवार बनाए । उषा आफताबका छोरा राजिकसँग पराजित भइन् ।

एमाले–जसपा गठबन्धनमा रौतहट–२ जसपाको भाग परेपछि प्रभु साहकै निर्देशनमा किरणले स्वतन्त्र उम्मेदवारी दिएका थिए । बैरियाका शेख अब्दुल काकादेखि सुरु गरेको राजनीति भतिजा हुँदै छोरासम्म आएकाले जनताले स्विकार्न नसक्ने बताउँछन् । ‘एउटै परिवारभित्रका मानिसले मात्र चुनावमा भाग लिँदै गए अरूको पालो कहिले आउने ?’ उनले भने ।

मुस्लिम बहुल यो क्षेत्रमा आफताब चुनाव लड्दा एकलौटी मत उनकै पक्षमा खस्थ्यो । शेख परिवारमा जन्मेका आलम राजपुरका रैथाने हुन् । राजपुरमा मात्र करिब १० हजार मुस्लिम मतदाता छन् । यस क्षेत्रमा २०१५ सालदेखि नै शेख परिवारको राजनीति हाबी हुँदै आएको छ ।

०१५ सालमा प्रजापरिषद्बाट चुनाव जितेका इद्रिस ०४८ को आमनिर्वाचनमा पनि निर्वाचित भएका थिए । काका इद्रिसपछि आफताब कांग्रेस नेताका रूपमा उदाए । उनले रौतहट–२ बाट ०५३ को उपनिर्वाचनमा पहिलो पटक सांसद बन्ने मौका पाए । ०५६ र ०६४ मा पनि जितेका उनी ०७० मा आफ्नै भान्जा मुस्ताक आलमसित पराजित भए । ०७४ मा आफताब पुनः निर्वाचित भए । उनी दुई पटक कांग्रेस जिल्ला सभापतिसमेत भए ।

मधेस आन्दोलनका बेला मधेसकेन्द्रित दलप्रति आक्रामक रूपमा प्रस्तुत भएका थिए । पार्टीका शीर्ष नेताहरूले उनको यो कदमलाई रुचाए । उनले चन्द्रनिगाहपुरमा सद्भाव कायम राख्न पैदल यात्रासमेत गरेका थिए ।

प्रतिनिधिसभा निर्वाचनमा जेठो छोरालाई उम्मेदवार बनाएपछि केही मुस्लिम समुदाय चिढिएको विजयी साह बताउँछन् । ‘सबैको पालो आउँछ, चुनावमा हामी मात्रै उम्मेदवार भन्ने हुँदैन,’ उनले भने, ‘जनताको चाहना र न्यायका लागि उठेको हुँ ।’ आफताबका भाइ महताब पनि दुई पटक पार्टीको जिल्ला सभापतिमा पराजित भएका हुन् । उनी पनि राजपुर घटनामा पक्राउ परेपछि पुर्पक्षका लागि गौर कारागारमा छन् ।

आफताब ०५४ मा श्रम सहायकमन्त्री भए । ०५५ मा गिरिजाप्रसाद कोइराला नेतृत्वको सरकारमा वन सहायकमन्त्री भए । कृष्णप्रसाद भट्टराई नेतृत्वको सरकारमा स्थानीय विकास राज्यमन्त्री भएका उनी फेरि कोइराला नेतृत्वको सरकारमा भूमिसुधारमन्त्री बन्ने अवसर पाए । माधवकुमार नेपाल नेतृत्वको सरकारमा उनी श्रम तथा यातायातमन्त्री बनेका थिए ।

प्रकाशित : मंसिर ११, २०७९ ०७:११
प्रतिक्रिया
पठाउनुहोस्
जनताको राय

त्रिभुवन विश्वविद्यालयमा बारम्बार परीक्षार्थीको उत्तरपुस्तिका हराउने गरेको छ। यसको समाधान कसरी हुन्छ?