प्रधानमन्त्री देउवाले राजनीतिकस्तरमा छलफल भइरहेको जानकारी दिए भने माओवादी केन्द्रका अध्यक्ष दाहालले राष्ट्रिय सहमतिबाट मात्र सम्झौता अनुमोदन हुन सक्ने सन्देश दिए
काठमाडौँ — अमेरिकी मिलेनियम च्यालेन्ज कर्पोरेसन (एमसीसी) सँगको सम्झौता संसद्बाट अनुमोदन गर्ने विषयमा सत्तारूढ गठबन्धनले नै स्पष्ट धारणा दिन सकेको छैन । एमसीसी उपाध्यक्ष फातिमा सुमारको टोलीसँग गठबन्धन दलका नेताले नै अलग–अलग धारणा राखेका छन् ।
प्रधानमन्त्री शेरबहादुर देउवाले राजनीतिकस्तरमा छलफल भइरहेको जानकारी दिएका छन् भने माओवादी केन्द्रका अध्यक्ष पुष्पकमल दाहालले राष्ट्रिय सहमतिबाट मात्र एमसीसी अनुमोदन हुन सक्ने सन्देश दिएका छन् ।
एमसीसी प्रतिनिधिमण्डल शुक्रबार साँझ प्रधानमन्त्री निवास बालुवाटार पुगेको थियो, करिब एक घण्टा भएको भेटवार्तामा देउवाले सम्झौता अनुमोदन गराउन आफूले राजनीतिकस्तरमा छलफल जारी राखेको जानकारी दिए । भेटपछि उनले ट्वीट गरेका छन्, ‘नेपाल–अमेरिकाबीच एमसीसी सम्झौता र यसले नेपालको अर्थतन्त्रलाई रूपान्तरण गर्ने सम्भावनाका विषयमा विचार आदानप्रदान भयो ।’
सुमारले भने सम्झौताबारे नेपालमा गलत प्रचार भएको भन्दै चिन्ता व्यक्त गरेकी थिइन् । उनले सम्झौता संसद्बाट छिटो अनुमोदन हुने विश्वास व्यक्त गरेकी थिइन् । अर्थ मन्त्रालयद्वारा जारी विज्ञप्तिमा भनिएको छ, ‘सुमारले सम्झौताले नेपालको आर्थिक विकासमा महत्त्वपूर्ण योगदान गर्ने विश्वास व्यक्त गर्नुभयो ।’
सुमारले शुक्रबार नै माओवादी अध्यक्ष दाहाललाई उनकै निवास खुमलटारमा भेटिन् । एक घण्टा चलेको भेटवार्तामा दाहालले एमसीसी सम्झौतालाई राष्ट्रिय सहमतिबाट अघि बढाउने सन्देश दिए । भेटवार्तामा उपस्थित दाहालका प्रेस संयोजक विष्णु सापकोटाका अनुसार सुमारले सम्झौताका विवादित विषयमा प्रस्ट पार्ने कोसिस गरेकी थिइन् । सुमारले काठमाडौं आएलगत्तै सम्झौता नेपालको संविधानभन्दा माथि नरहेको, एमसीसी इन्डो प्यासिफिक रणनीति वा अन्य कुनै सैन्य गठबन्धनमा नरहेको प्रस्ट पार्ने कोसिस गर्दै आएकी छन् ।
एमसीसी : जति छलफल, उति अलमल
सुमारले सिंहदरबार पुगेर ऊर्जामन्त्री पम्फा भुसालसँग पनि भेटवार्ता गरेकी थिइन् । करिब ४५ मिनेट चलेको संवादमा भुसालले पनि माओवादी अध्यक्ष दाहालले जस्तै राष्ट्रिय सहमति र सत्ता गठबन्धनबीचको साझा धारणाअनुसार अघि बढाउने प्रतिबद्धता व्यक्त गरेको बैठकमा सहभागी एक अधिकारीले जानकारी दिए ।
त्यस्तै कांग्रेस नेता मीनेन्द्र रिजालको नेतृत्वमा रहेको ‘नेपाल–अमेरिका संसदीय मैत्री समूह’ सँग पनि एमसीसी टोलीले संवाद गरेको छ । होटल म्यारियटमा भएको छलफलमा सांसदहरू नवराज सिलवाल, पुष्पा भुसाल, प्रमिला कुमारी, विन्दा पाण्डे, शरत्सिंह भण्डारी, सत्या पहाडी तथा आमन्त्रित सदस्यका रूपमा सांसदहरू विरोध खतिवडा, गगन थापा र वर्षमान पुन उपस्थित थिए ।
झन्डै डेढ घण्टा चलेको छलफलमा सुमारले सम्झौता नेपालको गरिबी निवारण र आर्थिक समृद्धिको पक्षमा रहेको प्रस्ट पारेकी थिइन् । छलफलमा उपस्थित सांसद सिलवालले भने, ‘सुमारले यो सम्झौताले नेपालका दुई करोड जनता लाभान्वित हुने र १० हजारभन्दा बढीले रोजगार पाउने बताउनुभयो । साथै, नेपालकै अनुरोधमा अमेरिकाले अनुदान सहयोग गरेको उहाँको भनाइ थियो ।’
सांसदहरूले सुमारले राखेका धारणा एमसीसीकै मात्र हुन् कि अमेरिकी सरकारका हुन् भनेर प्रश्न गरेका थिए । जवाफमा सुमारले आफूलाई अमेरिकी राष्ट्रपतिले नियुक्त गरेको उल्लेख गर्दै यो अमेरिकी सरकारको धारणा रहेको प्रस्ट पारेकी थिइन् । सुमारले शनिबार अर्थमन्त्री जनार्दन शर्मासँग भेट गर्ने कार्यक्रम छ ।
बिहीबार काठमाडौं उत्रिएकै दिन उनले एमाले अध्यक्ष केपी शर्मा ओली, एकीकृत समाजवादीका अध्यक्ष माधव नेपाल र जनता समाजवादी पार्टीका अध्यक्ष उपेन्द्र यादव र संघीय परिषद् अध्यक्ष बाबुराम भट्टराईसँग भेटेकी थिइन् ।
