काठमाडौँ — सर्वोच्च अदालतको परमादेशपछि प्रधानमन्त्री नियुक्त भएका शेरबहादुर देउवाले मंगलबारदेखि कार्यभार सम्हालेका छन् । उनको सिफारिसमा राष्ट्रपति विद्यादेवी भण्डारीले  मंगलबार नै ५ सदस्यीय मन्त्रिपरिषद् गठन गरेकी छिन् ।

प्रधानमन्त्री देउवाले पहिलो चरणमा कांग्रेसबाट २ र माओवादीबाट २ गरी ४ जनालाई मन्त्री बनाएका छन् ।

शिक्षा, सिँचाइ र रक्षापछि गृह

^{बालकृष्ण खाँण, गृह}

खाँण चौथो पटक मन्त्री भएका हुन् । २०६६ मा शिक्षा तथा खेलकुद राज्यमन्त्री भएका उनी सिँचाइमन्त्री भए । २०७३ मा रक्षामन्त्री भए । हाल कांग्रेस संसदीय दलका प्रमुख सचेतक हुन् । रूपन्देही तिलोत्तमा–८ का उनले स्नातक गरेका छन् । २०३३ मा कांग्रेसको विद्यार्थी संगठन नेपाल विद्यार्थी संघबाट राजनीति थालेका उनी रूपन्देहीको जिल्ला अध्यक्ष हुँदै २०३९ मा नेविसंघको केन्द्रीय समिति सदस्यसमेत भए । २०४३ मा त्रिवि स्ववियु सभापति र २०४४ मा नेविसंघ अध्यक्ष पनि भए । २०५४ मा उनी नेपाल तरुण दलको अध्यक्ष भए । २०५६ देखि कांग्रेस केन्द्रीय समिति सदस्य भए । २०४८ मै प्रतिनिधिसभा सदस्य निर्वाचित भएका थिए । २०६४ र २०७० मा रूपन्देही–३ बाट निर्वाचित भएका उनलाई २०७४ मा पार्टीले प्रतिनिधिसभामा समानुपातिक सांसद बनाएको हो ।

तीन मन्त्रालयको अनुभव

^{पम्फा भुसाल, ऊर्जा, जलस्रोत तथा सिँचाइ}

माओवादी नेतृ भुसालसँग यसअघि तीन पटक मन्त्रालय सम्हालेको अनुभव छ । २०६४ मा महिला, बालबालिका तथा समाज कल्याण, २०६५ मा सामान्य प्रशासन र २०६८ मा शान्ति तथा पुनर्निर्माणमन्त्री भइसकेकी छन् । ललितपुर–१३ की उनले स्नातकोत्तर गरेकी छन् । ललितपुर–३ बाट निर्वाचित उनी २०३७ मा नेकपा (चौम) बाट पार्टीगत राजनीतिमा प्रवेश गरेकी हुन् । २०३९ मा अनेम संघको महासचिव भइन । २०४६ मा नेकपा (एकता केन्द्र) मा क्षेत्रीय ब्युरो सदस्य, संयुक्त जनमोर्चा नेपालको केन्द्रीय सचिव, महासचिव हुँदै २०५१ मा अध्यक्षसमेत भइन् । नेकपा माओवादीका लागि उनी पहिलो महिला केन्द्रीय सदस्य हुन् । २०६४ मा ललितपुर–३ बाट संविधानसभा सदस्य निर्वाचित उनी पछिल्लोपटक २०७४ मा पनि उनी प्रतिनिधिसभा सदस्यमा निर्वाचित भएकी हुन् ।

शान्ति, ऊर्जा र गृहपछि अर्थ

^{जनार्दन शर्मा, अर्थ}

शान्ति तथा पुनर्निर्माण, ऊर्जा, गृहमन्त्री भइसकेका शर्माले अब अर्थ मन्त्रालयको नेतृत्व गर्दै छन् । संविधानसभा सदस्य निर्वाचित भएपछि उनी २०६५ मा शान्ति तथा पुनर्निर्माणमन्त्री थिए । २०७३ मा ऊर्जा र २०७४ मा गृहमन्त्री भएका थिए । सेना समायोजन विशेष समिति सदस्य भएका मुसीकोट–५ रुकुम पश्चिमका उनी सोही जिल्लाबाट निर्वाचित हुन् । २०३४ मा पार्टी इकाइ कमिटी (चौम) बाट राजनीति सुरु गरेका शर्मा २०५६ मा तत्कालीन नेकपा (माओवादी) को केन्द्रीय सदस्य भए । २०५७ मा पोलिटब्युरो सदस्य जनमुक्ति सेनाको डिभिजन र २०६० मा माओवादीको स्थायी समिति सदस्य भए । २०७० मा जनवर्गीय संगठन इन्चार्ज भए । अन्तरिम व्यवस्थापिका सदस्य, संविधानसभा सदस्यसमेत भएका उनी २०७४ मा प्रतिनिधिसभा सदस्यमा निर्वाचित भएका हुन् ।

अर्थपछि कानुन, न्याय

^{ज्ञानेन्द्रबहादुर कार्की, कानुन, न्याय तथा संसदीय मामिला}

भोजपुरको देउराली गैरीगाउँका कार्की कांग्रेस सभापति शेरबहादुर देउवाका निकै विश्वासिला मान्छिन् । उनीसँग जलस्रोत र अर्थमन्त्रालय सम्हालेको अनुभव छ । उनी २०६३ मा गिरिजिाप्रसाद कोइराला सरकारमा जलस्रोत राज्यमन्त्री भएका थिए । कांग्रेसले आर्थिक विषय बुझेका नेतालाई मात्रै अर्थ मन्त्रालयको जिम्मेवारी दिँदै आएको परम्परा तोड्दै २०७४ मा शेरबहादुर देउवाले उनलाई अर्थमन्त्री बनाएका थिए । स्नातकोत्तर तहसम्म अध्ययन गरेका उनले २०२७ मा नेपाल विद्यार्थी संघमा आबद्ध भएपछि राजनीति सुरु गरेका हुन् ।

उनी नेविसंघको केन्द्रीय अध्यक्षसमेत भए । २०५८ देखि कांग्रेसमा केन्द्रीय सदस्य छन् । उनी कांग्रेसको भोजपुर सभापति पनि भए । पछिल्लो पटक उनी प्रतिनिधिसभा सदस्यमा सुनसरी क्षेत्र नम्बर ४ बाट निर्वाचित भएका हुन् ।