बुटवल कोरोना अस्पतालमा थप एक संक्रमितको मृत्यु

गत असोज १२ गते स्वास्थ्यमा समस्या भई पीसीआर जाँच गराउँदा पोजिटिभ देखिएका बुटवल ८, सुख्खानगरका ८० वर्षीय पुरुषको उपचारका क्रममा बुधबार राति ११:३५ बजे मृत्यु भएको अस्पतालका फोकल पर्सन डा. सुदर्शन थापाले बताए । मृतक १२ गते पोजिटिभ देखिएपछि होम आइसोलेसनमा बसेका थिए ।

उनको स्वास्थ्यमा थप समस्या आएपछि बुधबार कोरोना अस्पतालको आईसीयूमा भर्ना गरिएको थियो । मृतकमा मुटु रोग र उच्च रक्तचापको समस्या थियो । योसँगै अस्पतालमा मृत्यु हुनेको संख्या २१ पुगेको छ । हाल अस्पतालको आईसीयूमा १५ र भेन्टिलेटरमा एक जनाको उपचार भइरहेको छ ।