भारतबाट सोझै काठमाडौं

गृह स्रोतका अनुसार उपत्यका भित्रिने अन्य नाकाको पनि हिसाब गर्दा दैनिक उपत्यका भित्रिनेको संख्या १० हजार हाराहारी हुन आउँछ ।

कोरोना संक्रमण सुरु भएपछि गत वर्ष चैत ११ गतेदेखि पटक–पटकको लकडाउन र निषेधाज्ञासँगै अन्तरजिल्ला सार्वजनिक सवारीको यात्रामा प्रतिबन्ध थियो । गृह स्रोतबाट प्राप्त तथ्यांकअनुसार लामो दूरीको यातायात खुलेपछि थानकोट नाकाबाट बाहिरिनेको संख्या भित्रिनेको भन्दा कम अर्थात् ६२ हजार २ सय २३ छ । ९ दिनको अवधिमा यात्रु बोकेर थानकोटबाट ११ हजार ६ सय २४ सवारी भित्रिएको र १० हजार ३ सय ५४ सवारी बाहिरिएको देखिन्छ ।

यसरी उपत्यका भित्रिनेमध्ये धेरैजसो संक्रमणको तीव्र दर रहेको मधेसका जिल्ला र भारतबाट आएकासमेत छन् । पछिल्लो ९ दिनमा भारतबाट विभिन्न नाका हुँदै नेपाल भित्रिएकामध्ये कति उपत्यका आए भन्ने अद्यावधिक विवरण सरकारसँग छैन तर एक साताअघि कोभिड क्राइसिस म्यानेजमेन्ट सेन्टर (सीसीएमसी) ले भदौ ५ देखि ३२ गतेको अवधिमा भारतबाट नेपाल छिरेका २५ हजार ७ सय ३६ मध्ये ३ सय ४५ जना काठमाडौं छिरेको जनाएको थियो । सेन्टरले अन्तरजिल्ला यातायात सहज भएपछि भारतबाट विभिन्न नाका हुँदै नेपाल छिरेकामध्ये ठूलो संख्या उपत्यकामा आउने र उनीहरू समुदायमा घुलमिल भएपछि संक्रमण झनै बढ्न सक्ने निष्कर्ष निकालेको थियो ।

सीसीएमसीको अध्ययनअनुसार भदौमा झापाका नाकाबाट ४८, पर्साबाट ९, रूपन्देहीबाट २ सय ६१, कैलालीबाट ५ र कञ्चनपुरका नाकाबाट छिरेका १४ जना गरेर एक महिनामा ३ सय ३२ जना काठमाडौं आइपुगेको देखिन्छ । जबकि यही अवधिमा झापा, पर्सा र रूपन्देहीका नाकाबाट छिरेका ११ जना ललितपुरमा र झापाका नाकाबाट छिरेका २ जना भक्तपुरमा आइपुगेको देखिन्छ । एक साताअघि सीसीएमसीका एक सदस्यले रक्षामन्त्री ईश्वर पोखरेलसहितका मन्त्रीहरूलाई भारतबाट छिर्नेहरू जुन–जुन जिल्लालाई गन्तव्य बनाएर आएका छन्, त्यहाँ संक्रमणको दर उच्च रहेको र त्यो अझै बढ्न सक्ने भन्दै प्रतिवेदनको अंश सुनाएका थिए ।

उपत्यका भित्रिनेलाई क्वारेन्टाइनमा राख्ने र समयमै कोरोना परीक्षण गर्ने प्रबन्ध नहुँदा शंकास्पद संक्रमितहरू पनि समुदायको सम्पर्कमा पुग्ने जोखिम बढेको छ । सीसीएमसीका ती सदस्यले भारतबाट आएर सोझै समुदायमा गएकाहरूबाट संक्रमण बढ्ने सम्भावनाको प्रक्षेपण भदौ अन्तिम सातामै गरिएको बताए । ती सदस्यका अनुसार पछिल्लो एक सातामा उपत्यकामा बढ्दो संक्रमणका पछाडि भारतबाट आउनेहरू पनि एक हदसम्म जिम्मेवार छन् । ‘निषेधाज्ञा खुला गरिएपछि लामो दूरीका सवारीहरू चल्न थालेपछि भारतबाट उपत्यका आउनेको संख्या अझै बढेको हुन सक्छ,’ ती सदस्यले भने ।

सीसीएमसीका ती सदस्यले भनेजस्तै असोज १ गतेबाट लामो दूरीका सवारीसाधन खुला भएपछि प्रत्येक दिन उपत्यका भित्रिनेको संख्यामा उल्लेख्य वृद्धि भएको छ । जस्तो कि, ५ गतेयता थानकोट नाकाबाट औसतमा प्रत्येक दिन उपत्यका भित्रिनेको संख्या दैनिक १० हजार हाराहारी छ । कान्तिपुरलाई प्राप्त विवरणअनुसार शुक्रबार साँझसम्म मात्रै उपत्यकामा ७ हजार २ सय ४४ जना भित्रिए । जसमध्ये १ हजार ५ सय ६६ जना जिप र कारबाट भित्रिएका थिए भने ४ हजार २ सय ९५ जना बसबाट र अन्य यात्रु मोटरसाइकल, हाइसलगायतका सवारीबाट भित्रिएको देखिन्छ ।

आधा सिटमा मात्रै यात्रु राखेर चलाउन नसकिने बताए पनि सार्वजनिक सवारीहरूले आधा मात्रै यात्रु राखेर सवारी चलाएको देखिन्छ । कान्तिपुरलाई प्राप्त विवरण केलाउँदा शुक्रबार साँझसम्म उपत्यका भित्रिएका २ सय ७२ बसले औसतमा १५ र हायसले औसतमा ७ यात्रु बोकेर उपत्यका छिरेको देखिन्छ । त्यस्तै शुक्रबार साँझसम्म उपत्यकाबाट बाहिरिएका ५२ बसले औसतमा १५ यात्रु र १ सय २१ हाइसले औसतमा ७ जनाका दरले यात्रु बोकेको देखिन्छ ।