दिल्लीमा उपचार गराएर फर्केका थिए चितवनका संक्रमित

रमेशकुमार पौडेल

चितवन — शुक्रबार बिहान कोरोना भाइरसको संक्रमण पुष्टि भएकामध्ये चितवनका दुई जनामध्ये एक जना भारतको दिल्लीमा क्यान्सर रोगको उपचार गराएर फर्केका व्यक्ति भएको खुलेको छ ।

संक्रमण पुष्टि भएका भरतपुर महानगरपालिका–६ केशरबागका ७४ वर्षीय पुरुष राजिव गान्धी क्यान्सर अस्पतालमा उपचार गराउन भारत गएका थिए । संक्रमित अर्की ७३ वर्षीया महिला उनैकी श्रीमती हुन् । उनी पनि श्रीमान्‌को उपचारका लागि सँगै दिल्ली गएकी थिइन् ।

संक्रमित दुवै जनालाई भरतपुरको कोरोना विशेष अस्थायी अस्पतालमा राखिएको छ । सो अस्पतालको समेत व्यवस्थापन सम्हालेको भरतपुरको सरकारी अस्पतालका प्रमुख मेडिकल सुपेरिटेन्डेन्ट डा.श्रीराम तिवारीले संक्रमितको स्वास्थ्य अवस्था सामान्य रहेको बताए । शुक्रबार नै कोरोना पुष्टि भएका नवलपुरका विनयी त्रिवेणी गाउँपालिका–६ का ४५ वर्षीय पुरुषलाई पनि सोही अस्पतालमा ल्याएर राखिएको छ ।

भरतपुरका संक्रमित व्यक्तिहरु दिल्लीबाट एम्बुलेन्समा जेठ ३ गते घर आएका थिए । ‘दिल्लीबाट कृष्णनगरसम्म भारतको एम्बुलेन्स र त्यहाँबाट नेपालको एम्बुलेन्समा आएको भन्ने बुझिएको छ । यहाँ आएपछि उहाँहरु पूर्ण सावधानीका साथ होम क्वारेन्टाइनमा हुनुहुन्थ्यो,’ भरतपुर महानगरपालिका–६ का वडाध्यक्ष हरिबिलास कोइरालाले भने । उनीहरुसँग प्रत्यक्ष सम्पर्कमा रहेका व्यक्तिहरुको सोधीखोजी सुरु भएको छ ।

‘भारतबाट फर्केपछि उहाँहरु घरमै सुरक्षित तरिकाले रहेको भन्ने छ । त्यही पनि हामी आजदेखि थप कुराहरु बुझ्ने प्रक्रियामा छौं । मिहीन तरिकाले नै कन्ट्याक्ट ट्रेसिङको काम हुने छ।’ भरतपुर महानगरपालिकाको जनस्वास्थ्य शाखाका प्रमुख दीपक सुवेदीले भने । अर्का संक्रमित नवलपुरका व्यक्ति जेठ १ गते भारतको गुजरातबाट घर आएको बुझिएको छ ।

चितवनमा अहिलेसम्म एक हजार २६३ जनाको स्वाब परीक्षण भएको छ । जसमध्ये ६ जनामा कोरोना भाइरसको संक्रमण पुष्टि भएको छ । संक्रमण पुष्टि भएकामध्ये चितवनका दुईजना उपचारपछि निको भएर घर फर्केका छन् । उपचारमा रहेका चारजना मध्ये दुईजना चितवन र दुई जना नवलपरासी पूर्वका हुन् । चैत्र २३ पछि स्वाबको पीसीआर परीक्षण भरतपुरमै हुने गरेको छ ।

सम्बन्धित समाचार

सर्लाहीका १५ सहित थप ३० जनामा कोरोना, संक्रमितको संख्या ४८७ पुग्यो

प्रकाशित : जेष्ठ ९, २०७७ १०:२०
प्रतिक्रिया
पठाउनुहोस्
ADVERTISEMENT
ADVERTISEMENT

भत्तामा उमेर हद तोकेपछि एकल महिला आक्रोशित, आन्दोलनको चेतावनी

स्थानीय तहले आउँदो किस्ताबाट ६० वर्षभन्दा कम उमेरका एकल महिलाले सामाजिक सुरक्षा भत्ता नपाउने भनेर सूचना निकाल्न थालेका छन् ।
रमेशकुमार पौडेल

चितवन — एकल महिलाले सामाजिक सुरक्षा भत्ता पाउन ६० वर्ष उमेर पुग्नुपर्ने नियमका विरुद्ध महिला अधिकारकर्मीहरुले आपत्ति जनाएका छन् । सर्वोच्च अदालतको आदेशअनुसार सरकारले सबै उमेरका एकल महिलाहरुलाई सामाजिक सुरक्षा भत्ता दिन सुरु गरेका कारण अहिले आएर अन्य नियम ल्याउनु गलत भएको उनीहरुको भनाइ छ । 

स्थानीय तहले आउँदो किस्ताबाट ६० वर्षभन्दा कम उमेरका एकल महिलाले सामाजिक भत्ता नपाउने भनेर सूचना निकाल्न थालेका छन् । चितवनको कालिका नगरपालिका-५ को कार्यालयले वडावासीलाई पत्र काटेरै यो कुरा जानकारी गराएको छ । वडाध्यक्ष जीएन महतोले जेठ १ मा टोल विकास संस्थालाई सम्बोधन गरी जारी गरेको सूचनामा ६० वर्ष उमेर नपुगेका महिलाहरुले एकल महिला बापतको भत्ता नपाउने उल्लेख छ ।

‘नयाँ नियम आयो रे भन्ने कुरा हप्ता दिनअघि गाइँगुइँ सुनिएको थियो । तीन-चार दिनयता त जिल्ला जिल्लाका साथीहरुले परिपत्र नै जारी भएको भन्दै दुखेसो पोख्न थाल्नुभयो,' मानव अधिकारका लागि महिला, एकल महिला समूहकी केन्द्रीय अध्यक्ष कुन्दा शर्माले भनिन्, 'हामीलाई जानकारी नै नदिई नियम ल्याइएछ । यो हामीलाई मान्य छैन । नसच्याए आन्दोलनमा जान्छौं ।'

२०७५ असोज २ गते नयाँ सामाजिक सुरक्षा ऐन जारी भएको थियो । त्यसमा एकल महिलाले सामाजिक सुरक्षा भत्ता पाउने सम्बन्धमा नयाँ व्यवस्था गरिएको छ । ऐनको दफा ७ मा ६० वर्ष उमेर पुगेका महिलाले असाहय एकल महिला भत्ता पाउने उल्लेख छ । त्यसैमा उपदफा पनि थपेर केही एकल महिलाले ६० वर्ष नपुगे पनि भत्ता पाउने व्यवस्था छ ।

ऐनको दफा ७ को उपदफा २ मा जीवनयापन गर्ने आयस्रोत नभएको, नेपाल सरकारले तोकेको भन्दा न्यून आय भएको र श्रम गर्न नसक्नेले ६० वर्ष उमेर नपुगे पनि त्यस्ता एकल महिलाले सामाजिक सुरक्षा भत्ता पाउने उल्लेख छ । ऐन जारी भए पनि नियमावली नआउँदासम्म साबिकबमोजिम भत्ता पाउने उल्लेख थियो । नयाँ नियमावली गएको चैत्र ३ गते जारी भएको हो ।

राष्ट्रिय परिचयपत्र तथा पञ्जीकरण विभागका शाखा अधिकृत सावित्री बस्नेतले सबै स्थानीय तहलाई गएको चैत २६ गते नयाँ ऐन नियमावलीअनुसार नै सामाजिक सुरक्षा भत्ता वितरण गराउन परिपत्र गरेकी हुन् । यो परिपत्रका आधारमा स्थानीय तहले असार अन्तिममा हुने सामाजिक सुरक्षा भत्ता वितरणमा ६० वर्ष उमेर नपुगेका एकल महिलालाई भत्ता वितरण नगर्ने भएका छन् ।

सामाजिक सुरक्षा भत्ता वितरण नयाँ नियमावलीअनुसार गर्न भनेर पञ्जीकरण विभागले स्थानीय तहलाई जारी गरेको परिपत्र

सरकारले चारचार महिनामा भत्ता वितरण गरेको छ । तीन चरणको भत्ता वितरण भइसकेको छ । अब यो आर्थिक वर्षको अन्तिम चार महिनाको भत्ता असार अन्तिम या साउनको पहिलो हप्ताभित्र वितरण हुन्छ ।

‘खाइपाइ आएको भत्ता कटौती गर्नु न्यायोचित होइन। चैतसम्मको भत्ता बुझेकाहरुले असारमा भत्ता लिन जाँदा नपाइने भयो रे भन्ने जानकारी हुने तरिकाले सरकारले नियम ल्याएर लागू पर्न खोज्यो,’ अध्यक्ष शर्माले भनिन् । चुनावमा भत्ता बढाउने कुरा गरेर सरकारमा गएपछि कटौती गर्नु महिलामाथि ज्यादती भएको उनको भनाइ छ । 'सर्वोच्च अदालतमा हामीले मुद्दा हालेपछि ६६ सालमा अदालतले एकल/विधवा भएको भोलिपल्टबाटै भत्ता दिनु भन्ने आदेश भएको हो,' उनले भनिन्, 'अदालतको आदेशले आएको व्यवस्थालाई सरकारले आफूखुसी बदल्न पाउँदैन ।’

उनले प्रदेश र जिल्लाका साथीहरुसँग आन्दोलनको तयारीका लागि छलफल सुरु भएको बताइन् । ‘सरकारलाई सजिलो अवश्य हुँदैन । साथीहरु धेरै नै आक्रोशित हुनुभएको छ,' उनले भनिन् ।

वाग्गमती प्रदेशकी अध्यक्ष विष्णु पाण्डेले पनि यो नियम नसच्चिए सरकारलाई नै अप्ठेरो पर्ने बताइन्

ऐन संशोधन तयारी

राष्ट्रिय परिचयपत्र तथा पञ्जीकरण विभागका महानिर्देशक जितेन्द्र बस्नेत एकल महिलाको हकमा खाइपाइ आएकाहरुलाई भत्ता कटौती नगर्ने गरी ऐन संशोधनको प्रक्रिया सुरु भएको बताउँछन् । ‘संसदको यही अधिवेशनले नयाँ व्यवस्थासहित ऐन संशोधन गर्ने तयारी छ । खाइपाइ आएकाहरुको भत्ता कटौती नहोला,’ महानिर्देशक बस्नेतले भने ।

विभागका अनुसार सामाजिक सुरक्षा भत्ता पाउने एकल महिलाको संख्या ८ लाखभन्दा बढी छ । त्यसमा ६० वर्षभन्दा कम उमेरका महिलाको संख्या साढे ३ लाखको हाराहारीमा भएको महानिर्देशक बस्नेतले जानकारी दिए ।

मानव अधिकारका लागि महिला, एकल महिला समूहकी केन्द्रीय अध्यक्ष कुन्दा शर्माले ऐन संशोधन गर्ने हो भने चाँडै गर्नुपर्ने बताइन् । सर्वोच्च अदालतको आदेशलाई सम्मान गर्दै साबिकझैं सबै उमेर र वर्गका एकल महिलाले सामाजिक सुरक्षा भत्ता पाउनुपर्ने आफूहरुको अडान रहेको उनको भनाइ छ । सामाजिक सुरक्षा भत्ताबापत महिनाको दुई हजार रुपैयाँ पाउने व्यवस्था छ ।

सम्बन्धित समाचार

वडा कार्यालयको सूचना ‘एकल महिलालाई ६० वर्ष पुगेपछि मात्र भत्ता’

प्रकाशित : जेष्ठ ८, २०७७ १५:०४
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
×