अमेरिकी राष्ट्रपति ट्रम्पमा कोरोना देखिएन

एजेन्सी

वासिंङ्टन — अमेरिकी राष्ट्रपति डोनाल्ड ट्रम्पले आफूले कोरोना भाइरसको परीक्षण गराएको र नतिजा नेगेटिभ देखिएको बताएका छन् । बिहीबार वासिङ्टनबाट मिसिगनको यात्रामा निस्कने क्रममा राष्ट्रपति ट्रम्पले पत्रकारहरुसँग बिहीबार बिहान आफ्नो कोरोना भाइरसको परीक्षण भएको र त्यसको नतिजा ‘सकारात्मक रुपबाट नकारात्मक’ आएको बताए ।

उनले भने, ‘अर्को अर्थमा भन्ने हो भने एकदमै सकारात्मक रुपमा परीक्षण भयो । आज बिहान मैले पोजिटिभ तरिकाबाट गराएको परीक्षणमा नेगेटिभ रिपोर्ट देखियो । आज मेरो पूर्ण रुपमा परीक्षण भयो । परीक्षणमा मेरो नतिजा नेगेटिभ देखियो ।’

अमेरिकी राष्ट्रपति ट्रम्पले पत्रकारहरुको ‘अझै पनि हाइड्रोक्सिक्लोरोक्विन औषधि लिइरहनु भएको छ ?’ भन्ने प्रश्नमा आफूले परीक्षण गराएको र कोरोना नेगेटेभि देखिएको बताएका हुन् । यसअघि ट्रम्पले कोरोनाबाट बच्न आफूले हाइड्रोक्सिक्लोरोक्विन(मलेरियाको औषधि) खाने गरेको बताएका थिए । त्यसअघि उनले अमेरिकी नागरिकलाई पनि कोरोनाबाट बच्न यही औषधि खान सल्लाह दिएका थिए । हाइड्रोक्सिक्लोरोक्विनबाट कोरोना निको हुने कुनै वैज्ञानिक आधार नभएको भन्दै ट्रम्पको आलोचना भएको थियो ।

यसअघि ह्‍वाइटहाउसका केही कर्मचारीलाई कोरोना संक्रमण देखिएपछि राष्ट्रपति ट्रम्पलाई परीक्षण गराउन दबाब आएको थियो ।

अमेरिकाको फूड एन्ड ड्रग एडमिनिस्ट्रेसन(एफडीए) ले पनि हाइड्रोक्सिक्लोरोक्विन औषधि नखान सुझाव दिएको छ ।

कोरोना भाइरसको संक्रमणबाट सबैभन्दा बढी अमेरिका आक्रान्त छ । शुक्रबार बिहानसम्म अमेरिकामा १५ लाख ७७ हजार १ सय ७७ जनामा कोरोना संक्रमण पुष्टि भएको छ । अमेरिकामा अहिलेसम्म ९४ हजार ७ सय २ जनाको मृत्यु भएको छ । संक्रमण पुष्टि भएकामध्ये करिब २ लाख ९८ हजार निको भएका छन् ।

शुक्रबार बिहानसम्म कोरोना भाइरसबाट विश्वभर ५१ लाख २ हजारभन्दा बढी संक्रमित भएका छन् । अहिलेसम्म करिब ३ लाख ३३ हजारको मृत्यु भएको छ भने करिब १९ लाख १५ हजार निको भएका छन् ।

प्रकाशित : जेष्ठ ९, २०७७ ०९:४०
प्रतिक्रिया
पठाउनुहोस्

गौरीफन्टाबाट एकै दिन भित्रिए अढाई हजार

आएकामध्ये थोरैको मात्र स्वास्थ्य जाँच गरिएकोमा १२ जनामा आरडीटी पोजिटिभ देखिएको छ ।
अर्जुन शाह

धनगढी — धनगढीको सीमानाका गौरीफन्टाबाट बिहीबार राति अबेरसम्म अढाई हजार जना भित्रिए पनि उनीहरूमध्ये थोरैको मात्र कोरोना जाँच गरिएको छ । नाकामा भिड व्यवस्थापन गर्न मुस्किल परेपछि बाँकीलाई ज्वराे नापेका भरमा प्रवेश गराइयो ।

नेपाल भित्रिएका २ हजार ४ सय ९८ जनामध्ये ७ सय ७३ जनाको मात्रै आरडीटी गरिएको हो । अन्यमा ज्वरो भए/नभएको मात्र नापियो । आरडीटी गरिएका मध्ये १२ जनालाई पोजिटिभ देखिएको छ । उनीहरूलाई सेती प्रादेशिक अस्पतालमा राखिएको छ ।

बुधबारझैं बिहीबार पनि राति ११ बजेसम्म गौरीफन्टा आइपुगेकाहरूलाई भित्र्याउन सशस्त्र प्रहरी, जनपथ प्रहरी, कैलाली जिल्ला प्रशासनका प्रतिनिधि र स्वास्थ्यकर्मी खटिएका थिए । आएका मध्ये ८ सय ८ जनालाई धनगढीको त्रिनगरस्थित नवदुर्गा माविको भवनमा राखिएको छ । अन्यलाई प्रदेश सरकारले बस व्यवस्था गरेर सम्बन्धित जिल्ला पठाइएको सशस्त्र प्रहरीको धनगढीस्थित ३४ नम्बर गणका एसपी कमल तिमिल्सिनाले बताए ।

किट अभावले सबैको परीक्षण गर्न नसकिएको स्वास्थ्य निर्देशनालयले जनाएको छ । ‘किट छैन, थप माग गर्दै छौं,’ निर्देशनालयका स्वास्थ्य निरीक्षक हेमराज जोशीले भने, ‘अवस्था भयावह हुने देखियो ।’ सीमामा आउनेहरूको संख्या पूर्वानुमान नै गर्न नसकिने अवस्था आएको स्वास्थ्यकर्मी बताउँछन् ।

भारतबाट आउनेहरूलाई सीमामा व्यवस्थापन गर्ने हम्मे पर्ने अवस्था आएको सुरक्षाकर्मीको भनाइ छ । ‘हरेक दिन मध्यरातसम्म आउनेक्रम जारी हुन थाल्यो,’ एसपी तिमिल्सिना भन्छन्, ‘भारतीय पक्षले नेपालीहरूलाई सीमामा ल्याएर छोड्दिन थाले ।’

भारतमा रहेकाहरू नेपाल भित्रिने अनुमान हुँदाहुँदै पनि व्यवस्थापनको तयारी नहुनु स्थानीय र प्रदेश सरकारको कमजोरी भएको सरोकारवाला बताउँछन् । ‘व्यवस्थापनको तयारी गर्न यसबीचमा पर्याप्त समय थियो,’ मानवअधिकार उच्चस्तरीय अनुमन समितिका सदस्य खडकराज जोशी भन्छन्, ‘किटको जोहो गर्नुपर्ने, बोर्डरमै ठूला क्षमताको क्वारेन्टाइन बनाउन पनि सकिन्थ्यो होला ।’ भारतमा बस्दै आएका नेपालीहरू यति बेला दोहोरो दबाबमा छन् । खान–बस्नको समस्या बढेको, यसै बेला सीमा विवाद बल्झिएको र त्यहाँका नेपालीलाई भारतीय पक्षले अनेक बहानामा चेपुवामा पार्ने डर भएकाले उनीहरूलाई नेपाल फर्किन हतारो भइरहेको जोशीले बताए ।

कैलाली र कञ्चनपुरको हकमा सम्बन्धित स्थानीय तहले आफ्नो पालिकाका स्थानीयलाई सीमाबाट लिएर क्वारेन्टाइनमा राख्ने गरेको सशस्त्रका एसपी तिमिल्सिनाले बताए । बुधबार रातिसम्म साढे ८ सय जना आएका थिए । बिहीबार आएकाहरूमध्ये धेरै संख्या सुदूरपश्चिमकै छ । उनीहरूमध्ये तीन सय हाराहारी अन्य प्रदेशका छन् ।

प्रकाशित : जेष्ठ ९, २०७७ ०९:२६
पूरा पढ्नुहोस्
प्रतिक्रिया
पठाउनुहोस्
×