कोरोनाबाट जोगिन काठमाडौं- समाचार - कान्तिपुर समाचार
कान्तिपुर वेबसाईट
AdvertisementAdvertisement

कोरोनाबाट जोगिन काठमाडौं

संक्रमित धेरै पाइएको क्षेत्रबाट यात्रु उपत्यका भित्रिए संक्रमण नियन्त्रणमा चुनौती बढ्ने अवस्था भए पनि बिचल्ली परेकाको उद्धारका लागि भनेर आउने बसले यात्रु भित्र्याउन छाडेका छैनन्
सोमबार बिहान ६ देखि ११ बजेसम्म मात्रै ५५ वटा बस भित्रिए
मकर श्रेष्ठ

काठमाडौँ — लकडाउनले काठमाडौंको बसाइ कठिन भएको भन्दै गाउँ जानेको लर्को लागेका बेला प्रदेश १, २ र सुदूरपश्चिम प्रदेशका सर्वसाधारण कोरोनाबाट सुरक्षित ठानेर उपत्यकामा आउन थालेका छन् । काठमाडौं प्रवेश गर्ने नाकाबाट सोमबार बिहानसम्म निर्बाध रूपमा आए । सञ्चारमाध्यमले निगरानी गर्न थालेपछि भने प्रहरीले बाहिरबाट आउने यात्रुको विवरण टिप्न थालेको छ ।

एक सातायता उपत्यकामा अलपत्र सर्वसाधारण लिन भन्दै आउने बसहरूले बाहिरबाट समेत यात्रु ल्याइरहेका हुन् । कहिले कुन समय कति बस भित्रिए भन्ने विवरण प्रहरीसँग छ, तर कसले कहाँ बस्ने यात्रु उपत्यका भित्र्याए भन्ने छैन । आइतबार साँझसम्म प्रहरीले काठमाडौं प्रवेश गर्ने बसको नम्बर र यात्रु संख्यामात्रै राख्ने गरेको थियो । सोमबार बिहानदेखि मात्रै नाम, ठेगाना, मोबाइल नम्बर टिप्न थालेको छ ।

काठमाडौंको नागढुंगा, फर्पिङ, भक्तपुरको जगाती नाका हुँदै आउने यात्रुबाहक सवारीले बाहिरबाट यात्रु ल्याउने गरेको पाइएको हो । सोमबार बिहान ७ बजेदेखि दिउँसो २ बजेसम्म नागढुंगा नाकामा कान्तिपुर संवादादाता रहँदा प्रदेश १, २ र सुदूरपश्चिमबाट आउने बसमा यात्रु ल्याउने गरेको प्रत्यक्ष देखियो । प्रहरी स्रोतका अनुसार सोमबार बिहान ६ देखि ११ बजेसम्म मात्रै ५५ वटा बस काठमाडौं भित्रिए । ‘यसमध्ये आधाभन्दा बढी प्रदेश १ को काँकडभिट्टा र विराटनगरका आएका बस छन,’ नाकामा खटिएका एक प्रहरीले भने, ‘यसमा रित्तो आउने बस कमै छन् ।’ कोभिड–१९ संक्रमित धेरै पाइएको प्रदेशबाट काठमाडौं आउने यात्रुको संख्या बढिरहेको प्रहरीले जनाएको छ । काठमाडौंबाट बाहिरिने मजदुर बढी छन् भने काठमाडौं आउनेहरूमा घर भएका र आफन्त यतै भएकाहरू छन् ।

नागढुंगा प्रहरीले बाहिरबाट आउने यात्रुलाई उपत्यका भित्रिनुको कारणसमेत सोधेको थियो । काठमाडौंमा घर र कोठामा आएको भन्ने कारण टिपाएका छन् । ‘हामी आफन्त भेट्न विराटनगर गएका थियौँ । लकडाउनले रोकिएका थियौं,’ सुजन राईले भने, ‘उता भन्दा काठमाडौंमा सुरक्षित पनि लाग्यो । अनि आफन्त पनि यतै भएकोले आएको हौं ।’ लकडाउनले रोकिएपछि विराटनगर महानगरपालिकाले गाडीको व्यवस्था गरेर पठाएको उनले बताए ।

केही दिनयता मात्रै १ सय ४५ वटा बस काठमाडौं भित्रिएको प्रहरी स्रोतले जनाएको छ । नागढुंगा चेकपोस्टले गाडी नम्बर र यात्रु संख्या टिपेर सवारी छाड्ने गरेको थियो । तर, सोमबार बिहान भने प्रदेश २ को राजविराजबाट आएको लालिमा यातायातका तीन वटा बस पौने ८ बजे यात्रु लिएर आएको पाइएपछि फर्काइयो । तर, बस फर्किएन । केही तल पीपलमोडमा पार्किङ गरेर यात्रु ओराल्यो । यात्रु भने हिँडेरै आए । चेकपोस्टभन्दा केही तल असईको नेतृत्वमा उनीहरुलाई रोक्न प्रहरी खटिएका थिए । केही बेर रोके पनि । २० जना जति भएपछि प्रहरीले ४/५ जनाको समूह बनाउँदै चेकपोस्टतिर पठाए । यी तीन वटा बसका यात्रुहरुमध्ये केहीको प्रहरीले नाम, ठेगाना पनि टिपोट गरे । केही त्यतिकै आए । चेकपोस्ट हुँदै यात्रुबाहक बस आउने क्रम जारी थियो । कुनै खाली हुन्थ्यो त कुनैमा यात्रु । यात्रु भएका बसलाई भने प्रहरीले फिर्ता पठाइदिन्थ्यो । तर, केही तल यात्रु छाडेर बसचाहिँ फेरि चेकपोस्टतिरै फर्किन्थ्यो । प्रहरीले ती बसलाई भने थानकोटतिर आउन रोकेको थिएन । निर्बाध रूपमा आइरह्यो ।

यही क्रममा विराटनगर महानगरपालिकाले रिजर्भ गरेर पठाएको बस पौने ८ बजेतिर नागढुंगा आइपुग्यो । ५/७ जना यात्रु लिएर आउने बस प्रहरीको रोकतोकबिनै छिरिहाल्यो । जब १५ जनाभन्दा बढी यात्रु लिएर विराटनगरबाट आएको बसचाहिँ नाकामा टिपोट गर्ने प्रहरीको निगरानीमा पर्‍यो । यात्रु ल्याउने अरू बसलाई जस्तै झापा, विराटनगरबाट आउने बसलाई प्रहरीले फिर्ता पठाए । अलि तल यात्रु झारेर फेरि चेकपोस्टमै तिरै फर्के । यात्रु भने आफ्नो झोला र बच्चा च्यापेर चेकपोस्ट आउँदा प्रहरीले रोके । केही बेरअघिसम्म नाम टिपाएर यात्रु छुटिरहेका थिए । एउटा बसमा चढेका यात्रुलाई ओरालेपछि नाम टिपाउँदा अगाडि जुन आउँथ्यो प्रहरीले त्यसमै हालेर पनि पठाए । तर, विराटनगरबाट आएको यात्रुको हुल अलि ठूलै देखेर प्रहरीले पठाउने आट गरेन । त्यो हुल देखेपछि प्रहरी पनि हच्किए । महानगरले सात वटा बसमा एक सयभन्दा बढी यात्रु काठमाडौं पठाएको थियो ।

नागढुंगा प्रहरीले रोकेको डेढ घण्टापछि १० बजे नाम र मोबाइल नम्बर टिपाएर पठाउन सुरु गर्‍यो । नागढुगा चेकपोस्टका सईले १५ मिनेटमा ५० भन्दा बढी यात्रु थानकोटतर्फ पठाइसकेका थिए । तर, इन्स्पेक्टर आएर नाम टिपाउन लाइन बसेकालाई भने अघि बढ्नै दिएनन् । उनले रोक्नुअघि नाम टिपाएर जाने गएको गएकै भए । कोही मूल सडक हुँदै कलंकीतर्फ र कोही नागढुंगाबाट कलंकी निस्कने भित्री बाटो हुँदै गए । बसले ओरालेपछि हिँडेर चेकपोस्ट आइपुगेका यात्रु प्रहरीसँग रिसाए । केहीले औंला ठड्याउँदै बाझेर आफ्ना समस्या सुनाए । तर, प्रहरीले उनीहरुलाई डेढ घण्टाभन्दा राख्नै सकेनन् ।

सुरुमा १ सयभन्दा बढी यात्रुलाई प्रहरीले रोकेर लाइन लगाएका थिए । केही छिनपछि खाजा खाने, ट्वाइलेट जाने निहुँमा बिस्तारै रोकिएको यात्रुको हूल पातलिँदै गयो । रोकिएका सबैले आफ्ना समस्या सुनाउँथे । प्रहरीले पनि केही समय बस्न थामथुम पारे । नागढुंगा इन्चार्ज थानकोटमा डीएसपीलाई भेट्न गएकै बेला नाम टिपाएर ५० भन्दा बढी छुटेका हुन् । जो रोकिए उनीहरु दिनभरि नाकामै अलपत्र परे । दिनभरि परेको पानीले रुझे । नागढुंगामा अलपत्र परेका यात्रुहरु ओत लाग्न कहिले गाडीको चेपतिर छिर्थे । कहिले चन्द्रागिरी नगरपालिकाको २ नम्बर वडा कार्यालय बाहिरको पेटीमा ओत लाग्न जान्थे । एउटै बसमा आउने कोही यात्रु नागढुंगाबाट घर पुगिसकेका थिए भने केही भने दिनभरि नागढुंगामै अड्किएपछि उनीहरु प्रहरीप्रति आक्रोशित थिए । प्रशासनले प्रहरीलाई सही निर्देशन नदिँदा कोही थानकोटतर्फ आए भने केही नागढुंगामा फसेका हुन् । प्रमुख जिल्ला अधिकारी जनकराज दाहाल दिउँसो पौने १२ बजे सुरक्षा टोलीसहित नागढुंगा अनुगमनमा गए पनि अलपत्र यात्रुसँग नभेटी फर्किए ।

नौ घण्टापछि छुटे

विराटनगरबाट आएकालाई नागढुंगामा रोकेको ९ घण्टापछि प्रहरीले छाडेको छ । बिहान पौने ८ बजे नागढुंगा आइपुगेका उनीहरुलाई प्रहरीले ६ बजे कलंकीतर्फ आउन दिएको हो । एउटै बसमा आएका कोही १० बजे छुटेर घर पुगे पनि आफू रोकिएको भन्दै उनीहरु आक्रोशित भएका थिए ।

‘हामी धादिङबाट आएका होइनौं । हामीले प्रहरीको कर्या चेकपोस्ट हुँदै नागढुंगा आइपुगेका थियौं ,’ नागढुंगामा रोकिएका पवित्रराज खत्रीले भने, ‘रोक्ने भए हामीलाई विराटनगरमै किन नरोकेको ? बाटोभरिको प्रहरीले किन नरोकेको ? यहाँ आएर हामीलाई दिनभरि अलपत्र पारेर साझमा छाड्यो ।’ दिउँसो १ बजे सीडीओ नै चेकपोस्टमा आएपछि आफूहरुलाई छाड्ने उनीहरुले आशा गरेका थिए । साँझसम्म पनि नछाडेपछि साना दूधेबालक भएका यात्रुहरु आत्तिएका थिए ।

जंगलको बाटो हुँदै थानकोट

नागढुंगा नाकामा यात्रुबाहक बसको चाप चढेपछि धादिङ प्रहरीले नौबिसेमा बाहिरबाट आएको बस रोकेको थियो । यसरी रोकिनेमा सुदूरपश्चिम र कर्णालीबाट आएको यात्रुबस बढी थियो । नागढुंगा प्रहरीले बाहिरबाट बसमा यात्रुलाई रोकेपछि नौबिसे र झयाप्ले खोला हुँदै जंगलको बाटोबाट हिँडेर यात्रुहरु थानकोट निस्कने गरेका थिए । बिहान १० बजेभन्दा अघि आउने बसका यात्रुलाई नागढुंङगा प्रहरीले रोकेपछि यात्रु लिएर आएको बसले नौबिसेमै काठमाडौं आउने यात्रु झारेका थिए । नागढुंगामा बिराटनगरबाट आएका सहित ६१ जना यात्रु दिनभरि रोकिए । उनीहरुलाई नागढुंगाबाट थानकोटतर्फ आउन दिइएको थिएन । ६ बजे मात्रै प्रहरीले छाडेको हो ।

नागढुंगामा कडाइ गरेपछि नौबिसेबाटै हिँडेर यात्रुहरु थानकोट निस्केका हुन् । ‘बसले नौबिसेमा झारेपछि तीन घण्टा हिँडेर थानकोट आइपुग्‍यौं,’ धनगढीबाट बसमा आएकी रमा भुजेलले भने, ‘अब भित्रको बाटोबाट कलंकी निस्केर साह्रेखुट्टे कोठामा जान्छौं ।’ धनगढीमा कोरोना फैलिएकोले काठमाडौं सुरक्षित लागेर आएको उनले बताइन् । नौबिसेबाट जंगलको बाटो हुँदै आएका उनीहरु नागढुंगा चेकपोस्टभन्दा अलि वर निस्केका थिए । थानकोट जाने मूलबाटो प्रहरीले रोक्ने भन्दै उनीहरु भित्री बाटो हुँदै कलंकी तर्फ लागे । उनीहरुको समूहमा हिँडेर आउने १४ जना थिए । ‘अरू पनि आइरहेका छन, हामीभन्दा अघि धेरै गए,’ उनले भनिन् ।

१ बजे हेल्थ डेस्‍कमा कर्मचारी

यात्रु रोकिएको चर्चा पछि नागढुंगा चेकपोस्टको हेल्थ डेक्समा दिउँसो १ बजे मात्रै २ जना कर्मचारी पीपीई लगाएर पुगेका थिए । प्रहरीले बिहान नाम टिपाएर पठाएका यात्रुको स्वास्थ्य परीक्षणसमेत भएन । चेकपोस्टमा स्वास्थ्य परीक्षण गर्ने हेल्थ डेक्स राखे पनि स्वास्थ्यकर्मी कोही थिएनन् । पौने १ बजे काठमाडौंका प्रमुख जिल्ला अधिकारी जनकराज दाहाल, प्रहरी प्रमुख श्याम ज्ञवालीलगायत सुरक्षाकर्मी नागढुंगा पुग्ने बेलासम्म हेल्थ डेक्समा स्वास्थ्यकर्मी पुगेका थिएनन् । स्वास्थ्यकर्मी नभएकै कारण विराटनगरबाट आएका ५० भन्दा बढी यात्रुको स्वास्थ्य परीक्षणबिना पठाउनुपरेको एक प्रहरीले बताए । ‘अरू बेला त बिहान १० देखि ४ बजेसम्म हेल्थ डेक्सका कर्मचारी हुन्थे,’ ती प्रहरीले भने, ‘आज त कोही आएकै छैन ।’

नाकामा एम्बुलेन्ससहितको स्वास्थ्यकर्मीको खाँचो रहेको महानगरीय प्रहरी वृत्त थानकोटका प्रहरी नायब उपरीक्षक घनश्याम श्रेष्ठले बताए । उनले भने ‘अहिले त स्वंयसेवकको भरमा हेल्थ डेस्क चलेको छ ।’ लकडाउन हुनुभन्दा केही दिन अघि चन्द्रागिरी नगरपालिकाले २४ घण्टा स्वास्थ्यकर्मी राखेर परीक्षण गरेको थियो । केही दिनपछि दिउँसो मात्रै भयो । अहिले योङ डक्टरर्स एसोसिएसनले गरिरहेको प्रहरीले जनाएको छ । महानगरीय प्रहरी वृत्त थानकोटका प्रहरी प्रमुख घनश्याम श्रेष्ठले नागढुंगा नाका हुँदै यात्रुबाहक बसमा यात्रु ल्याउन कडाइ गरेको बताए । ‘काठमाडौं प्रवेश गर्ने बसले यात्रु ल्याउन पाउँदैन । यात्रु ल्याएको पाइएमा फिर्ता गर्ने गरेका छौं,’ उनले भने, ‘फिर्ता गरेको बसमा आएका यात्रु अन्यत्र बाटो हुँदै यदाकदा फर्केर आउने गरेका छन् । यसतर्फ पनि निगरानी बढाएका छौँ ।’

तस्बिरहरु : अनिस रेग्मी र मकर श्रेष्ठ

प्रकाशित : वैशाख १६, २०७७ ०६:५०
प्रतिक्रिया
पठाउनुहोस्

मझधारमा माधव नेपाल

पार्टी समीकरणमा तेस्रो तर निर्णायक हैसियतमा रहेका नेपाललाई आफूतिर ल्याउन दुवै अध्यक्षले बराबर जोडबल गरिरहे पनि उनले कुन पक्षसँग कसरी मिल्ने भन्ने निर्णय गर्न सकेका छैनन् । नेपालनिकट एक नेता भन्छन्, ‘जसरी ओलीको प्रस्तावमा आँखा चिम्लेर विश्वास गर्ने ठाउँ छैन, दाहालसँग पनि विश्वस्त हुने आधार छैन ।’
बिनु सुवेदी

काठमाडौँ — तत्कालीन एमालेमा लगातार १५ वर्षसम्म नेतृत्व सम्हालेका नेता माधवकुमार नेपालको घरमा नेकपा एकीकरण हुनुअघिसम्म एकदम धेरै चहलपहल थियो । सबैतिरका नेताको आउजाउ बाक्लो हुन्थ्यो । जब एमाले र माओवादी मिलेर नेकपा बन्यो, कोटेश्वरमा नेपाल सम्झिएर जाने नेताहरूको संख्या ओरालो लाग्यो ।

अझ केपी शर्मा ओली पक्षका त नेता मात्रै होइन, कार्यकर्ताले समेत फर्किएर हेरेनन् । तर पछिल्लो समय कोटेश्वरको माहोल फेरिएको छ, नेकपा वरिष्ठ नेता नेपाललाई भेट्न नेताहरू ह्वारह्वार्ती गइरहेका छन् । ‘कोटेश्वरमा राजनीतिक माहोल संविधानसभा चुनाव अगाडिको जस्तै छ । पार्टी एकता भएपछि नआएका ओली समूहका नेता सबैभन्दा धेरै आए,’ नेपाल सचिवालयका एक सदस्यले भने ।

पार्टी एकीकरण भएपछि एक्ल्याइएका नेता नेपालको घरमा सरगर्मी बढ्नुको एउटै कारण हो, नेकपाभित्रको राजनीतिक किचलो । पार्टी समीकरणमा नेपालको स्थान तेस्रो भएपछि दुई अध्यक्षबीच किचलो हुँदा उनको मत जहिले पनि निर्णायक हुने गरेको छ । अहिले पनि नेपालसित सहकार्यको हात बढाउन प्रधानमन्त्री एवम् पार्टी अध्यक्ष ओली र अर्का अध्यक्ष पुष्पकमल दाहालले बराबरी नै जोडबल गरिरहेको पछिल्ला भेटघाट र छलफलको शृंखलाले नै पुष्टि गरेको छ । ‘तर कुन पक्षसँग कसरी मिलेर जाने भन्नेमा उहाँले ठोस निर्णय गर्न सक्नुभएको छैन,’ नेपालनिकट एक नेताले कान्तिपुरसँग भने, ‘दुवै अध्यक्षहरूको प्रस्तावबारे गम्भीर विमर्श भइरहेको छ ।’

‘पूर्वएमाले नछुट्टिऔं’

नेता नेपालले सोमबार बालुवाटार पुगेर प्रधानमन्त्री ओलीसँग करिब ४५ मिनेट छलफल गरे । छलफलमा ओलीले नेपाललाई पार्टी अध्यक्ष बन्न पुन: प्रस्ताव गरेको स्रोतहरूको भनाइ छ । अध्यादेश प्रकरणले आलसतालस परेपछि यो प्रस्ताव ओलीका तर्फबाट यसअघि पनि आएको थियो । सोमबार पनि ओलीले मुख्यमन्त्रीहरू हेरफेर गरेर प्रदेश १ र ३ या यी दुईमध्ये कुनै एकमा नेपाल समूहका नेतालाई बनाउने, केन्द्र सरकारको पनि मन्त्रिपरिषद् फेरबदल गर्ने र आफ्नै सचिवालयमा पनि जनतासँग भिजेका नेताहरूलाई ल्याएर प्रधानमन्त्री कार्यालय विवादरहित बनाउने प्रतिबद्धता जनाएका थिए । तर नेपालले यस्ता प्रस्तावहरू यसअघि पनि आएर धोका पाएको भन्दै औपचारिक फोरममै छलफल गर्नुपर्ने जवाफ प्रधानमन्त्रीलाई दिए । नेपालले अध्यादेश प्रकरणले निम्त्याएको छलफलको सिलसिला सुरु हुनुअघि नै कान्तिपुरसँग भनेका थिए, ‘ओलीसँग सहमति गर्नै परे अब उधारो हैन, नगदमै गरिन्छ ।’

ओलीले पार्टीभित्र आफू अप्ठ्यारोमा पर्दा बारम्बार बोलाएर छलफल गर्ने तर अलिकति सहज हुनेबित्तिकै वास्तै नगर्ने गरेको भन्दै नेपाल असन्तुष्ट थिए । ‘त्यसैले प्रधानमन्त्रीले एक्लाएक्लै भएको भेटमा गरेका प्रस्तावहरूलाई उहाँले पत्याइहाल्नुभएको छैन ।’ ओलीको प्रस्तावमा नेपालले अविश्वास गरेकैले तिनै प्रस्तावहरूको सेरोफेरोमा छलफल गर्ने भन्दै अनौपचारिक संयन्त्र बनेर करिब ४ घण्टा छलफल भयो तर त्यहाँ ओली समूहका तर्फबाट खास कुनै प्रस्ताव नआएको नेताहरूको भनाइ छ ।

नेपाल निवास कोटेश्वरको आडैमा रहेको नेपाल वन पैदावार उद्योग व्यवसाय महासंघको कार्यालयमा बसेको बैठकमा मन माझामाझ मात्रै भएको स्थायी कमिटी सदस्य रघुजी पन्तले बताए । ‘उत्पन्न समस्या समाधान गर्ने र पार्टीलाई एकताबद्ध ढंगले लैजाने भन्नेबारे अनौपचारिक कुरा भएको छ,’ उनले भने, ‘पार्टीमा देखा परेको गतिरोध छिटो समाधान गर्नुपर्छ र त्यसका लागि यथाशीघ्र स्थायी कमिटी बैठक बोलाउनुपर्छ भनिएको छ ।’

उक्त बैठकमा ओली पक्षीय नेताहरूले हतारमा भन्दा समस्या समाधान हुने गरी नै स्थायी कमिटी बैठक बोलाउनुपर्ने बताएका थिए । त्यहाँ ओली र नेपालबीच भएको छलफलअनुसार ओली पक्षीय नेताबाट शक्ति सन्तुलनको प्रस्ताव आउने आशा नेपाल पक्षीय नेताहरूले गरेका थिए । तर उनीहरूले ओली र नेपालका बीचमा भएको छलफलमा जस्तो कुनै पनि प्रस्ताव बैठकमा नल्याएको स्रोतको भनाइ छ । ‘त्यही भएर बन्द कोठामा ओलीजीले गरेका मीठा कुराको पछि नलाग्नुस् भनेर माधव कमरेडलाई सुझाव दिएको छु,’ बैठकमा सहभागी एक नेताले भने, ‘यस्ता चोटाकोठामा बसेर गरिएको छलफलले कुनै पार लाग्दैन, औपचारिक ढंगले निकास निस्किनुपर्छ ।’

ओली पक्षका नेताहरूसँगको छलफलमा पनि नेपाल पक्षीय नेताहरूले पार्टी र सरकारको गतिरोधको मूल कारक प्रधानमन्त्री ओली नै भएकाले त्यसको निकास उनले नै दिनुपर्ने बताएका थिए । ‘समस्याको निकास खोज्ने सन्दर्भमा ओलीजीको धारणा के छ, औपचारिक प्रस्ताव उहाँबाट आओस्,’ बैठकमा नेपाल पक्षीय नेताहरूको भनाइ थियो, ‘त्यसपछि बाँकी निर्णय औपचारिक कमिटीको बैठक बसेरै गर्छ ।’

नेताहरू मिलेर जानुपर्छ भन्नेबाहेक थप ठोस कुराकानी नभएपछि बैठकको सन्देश लिएर ओली पक्षका नेताहरू बालुवाटार पुगेर ब्रिफिङ गरेका छन् । बालुवाटारको छलफलमा उनीहरूले अहिलेसम्मका छलफल निरर्थक बनेको निष्कर्ष निकालेको एक नेताले बताए ।

दुई पक्षीय छलफलमा ओली पक्षबाट सचिवालय सदस्य ईश्वर पोखरेल, महासचिव विष्णु पौडेल, स्थायी कमिटी सदस्यहरू शंकर पोखरेल र प्रदीप ज्ञवाली सहभागी थिए भने अर्काे पक्षबाट स्वयं वरिष्ठ नेता नेपालसहित भीम रावल, सुरेन्द्र पाण्डे र रघुजी पन्त उपस्थित थिए ।

वरिष्ठ नेता नेपाललाई ओली पक्षीय नेताहरूले पूर्वएमाले समूहको गठजोड बलियो बनाउन प्रस्ताव गरेको यो पहिलो घटना भने होइन । सभामुखका लागि सचिवालयका बहुमत सदस्य एकातिर भएर आफ्नो इच्छाविपरीत अग्नि सापकोटामा निर्णय गरेकै बेला ओलीले पार्टीमा आफू कमजोर भइरहेको महसुस गरेका हुन् । अझ माघ १९ गते सम्पन्न केन्द्रीय कमिटीमा ओली पक्षको मत स्पष्ट रूपमा क्षीण भएपछि वरिष्ठ नेता नेपाललाई ओलीको समूहमा ल्याउने भरमग्दुर कसरत भइरहेको थियो । त्यसको अगुवाइ तत्कालीन सञ्चारमन्त्री गोकुल बाँस्कोटाले गरेका थिए भने ईश्वर पोखरेल, शंकर पोखरेल, भानुभक्त ढकाललगायत नेताहरू पनि पूर्वएमाले पक्ष बलियो बनाउनुपर्छ भनेर बारम्बार नेपाल निवास कोटेश्वर गइरहन्थे । त्यसपछि एमसीसी प्रकरण, राष्ट्रिय सभामा वामदेव गौतम या युवराज खतिवडा भन्नेलगायतका विषयमा पनि नेपाल ओलीको पक्षमा नदेखिएपछि ओली समूह नेपाललाई फकाउने दौडमा द्रुत गतिले लागिरहेको थियो ।

तर नेपाल शक्ति सन्तुलनमा ओलीबाट स्पष्ट प्रस्ताव खोजिरहेका थिए, जुन उनलाई प्राप्त भइसकेको थिएन । त्यतिखेरैको छलफलका सन्दर्भमा नेपालले कान्तिपुरसँग ‘उधारो सहमति गरेर धेरैपटक धोका पाएकाले जे–जे हुन्छ, हातहातै हुन्छ’ भनेका थिए ।

यसपालि ‘हातहातै’ सहमतिको कुरा ओलीले नेपालसँग आफ्नो र विभिन्न सूत्रमार्फतको छलफलमा गरेका छन् तर ओली–नेपाल पक्षीय नेताहरूको भेलामा यसखाले कुनै प्रस्ताव नआएकाले नेपालले विश्वास गरिहालेका छैनन् । ‘त्यसकारण पनि हामीले यस्ता छलफल औपचारिक फोरममै होऊन् भनेका हौं,’ नेपालनिकट एक नेताले कान्तिपुरसँग भने ।

दाहाल एक कदम अगाडि

नेपाल आफ्नो पक्षमा हुँदा आफू कति बलियो हुन्छु भन्ने आकलन अर्का अध्यक्ष पुष्पकमल दाहालले पनि गरेका छन् । त्यसैले उनले आइतबार कोटेश्वरमा भएको नेपाल पक्षीय नेताहरूको भेलामा खुलेरै भने, ‘अबको प्रधानमन्त्री तपाईं हो, नाइँनास्ति गर्न पाउनु हुन्न ।’

उक्त भेलामा अरू नेताहरूले पनि ओलीबाट देश र पार्टी चल्न नसक्ने भन्दै ठोस प्रस्ताव ल्याउन दाहाल र नेपाललाई आग्रह गरेका थिए । जब कोटेश्वरको भेला सकेर दाहाल निजी निवास खुमलटार पुगे, उनले प्रधानमन्त्रीले नेपाललाई पार्टी अध्यक्षको प्रस्ताव फेरि गरेको र त्यसबारे नेपालले निकटस्थहरूसँग छलफल गरिरहेको थाहा पाए । लगत्तै दाहालले नेपाललाई पार्टी अध्यक्ष र प्रधानमन्त्रीमध्ये एउटा पद रोजेर लिन प्रस्ताव गरेको स्रोतहरूको दाबी छ । नेपालले यो विषयमा पनि आफ्ना निकटहरूसँग छलफल र परामर्श गरेका छन् । ‘जसरी ओलीको प्रस्तावमा आँखा चिम्लेर विश्वास गर्ने ठाउँ छैन, दाहालको प्रस्तावमा पनि विश्वस्त हुने आधार छैन,’ नेता नेपाललाई धैर्य हुन सुझाव दिएका एक स्थायी कमिटी सदस्यले भने, ‘केपीजीबाट जस्तै प्रचण्डजीबाट पनि हामीले यसअघि बारम्बार धोका पाएका छौं ।’

केपी कमरेडबाट देश र पार्टी दुवै चलेन : नेता पन्त

यसको पछाडिको कारण खोज्न गत साउनतिर फर्किनुपर्छ । त्यतिखेर प्रधानमन्त्री ओली पार्टी र सरकारको दुवै मोर्चामा एकलौटी तरिकाले हाबी भएको निष्कर्ष निकालेर नेपाल र दाहालमध्ये एक पार्टी अध्यक्ष र अर्काे प्रधानमन्त्री बन्ने लिखित सहमति नै भएको थियो । त्यो बेला दाहालसँग नेपालसहित झलनाथ खनाल र वामदेव गौतमसँग गरेको छुट्टाछुट्टै सहमतिपत्र थिए । तर दाहाल यसरी बदलिए कि उनले नेपालसँगको सहमति चटक्कै छाडेर ओलीसँग मित्रता गाँसे । त्यही बेला नै हो, खनालको वरीयता मिलेको र वामदेव गौतमलाई पार्टी उपाध्यक्ष बनाउन प्रस्ताव गरिएको ।

त्यो बेला दाहाललाई भने ओलीले पार्टीको कार्यकारी अध्यक्ष बनाउने वचन राष्ट्रपति विद्यादेवी भण्डारीलाई साक्षी राखेर दिएका थिए । त्यसकारण अहिले विषयवस्तुका हिसाबले नेपाल दाहालतिर ढल्किएजस्तो देखिए पनि उनलाई नै पूरापूर विश्वास गर्ने ठाउँमा छैनन् । किनभने ओली पक्षका नेताहरूले जसरी नेपाललाई फकाइरहेका छन्, दाहालसँग पनि समानान्तर रूपमा छलफल अघि बढाएका छन् । ‘पुराना नजिरका आधारमा अहिले हामी ओली र दाहाल दुवैलाई विश्वास र शंकाका हिसाबले नै हेरिरहेका छौं,’ नेपालनिकट स्थायी कमिटी सदस्यले भने, ‘किनभने हिजोसम्म आआफ्नो गुटमा केन्द्रित रहेको छलफल आजदेखि त्रिपक्षीय रूपमा अघि बढेको छ ।’

त्रिपक्षीय छलफल

छलफलमा सहभागी नेताहरूका अनुसार ओली–दाहाल–नेपाल पक्षीय नेताहरूले सोमबारदेखि क्रस छलफल गरेका छन् । ‘हामी इस्युका हिसाबले कोसँग मिल्न सकिन्छ, त्यता जाने हो,’ दाहालनिकट नेताले कान्तिपुरसँग भने, ‘अहिलेसम्मको छलफललाई हेर्दा माधवजीसँग नजिक छौं ।’

एकलौटी अघि बढ्ने प्रधानमन्त्रीको निर्णयले सीमा नाघेको छ : नेता शर्मा

ती नेताका अनुसार ओली पक्षबाट ईश्वर पोखरेल र शंकर पोखरेलसँग अध्यक्ष दाहाल र दोस्रो तहका नेताहरूसँग निरन्तर छलफल भइरहेको छ । ती छलफलमा उनीहरूले कमीकमजोरी सच्याएर दाहाललाई पार्टीमा झन् बलियो बनाउने र ओलीले पार्टीकै सहमतिमा सरकार चलाउने प्रस्ताव गरेका छन् । ‘तर अध्यक्ष प्रचण्डको भनाइ प्रधानमन्त्रीले निकास दिनुपर्छ भन्ने नै छ,’ ती नेताले भने । निकास भनेको राजीनामा हो ? कान्तिपुरको प्रश्नमा ती नेताले भने, ‘मीठो भाषामा भन्दा त्यही नै हो तर हामीले ओलीजीलाई पार्टी र सरकार दुवैमा बाइपास गर्न सक्दैनौं, पार्टी पनि नटुक्रिने उहाँ पनि सुध्रिने हिसाबले कसरी अघि बढ्न सकिन्छ, त्यहीअनुसार छलफल गर्दै छौं ।’

उनका अनुसार स–साना गुटका भेलामा दाहाल सहभागी भएको भन्दै ओलीले असन्तुष्टि जनाइरहेका छन् । उसो त नेपाल र ओली पक्षको भेट हुने थाहा पाएपछि सोमबार गौतम र खनालले पनि खुमलटार पुगेर यस्ता अनौपचारिक छलफलभन्दा जतिसक्दो छिटो पार्टी बैठक नै डाक्न अध्यक्ष दाहाललाई दबाब दिए ।

यी सबै छलफलपछि नेकपाले मंगलबार सचिवालय बैठक बोलाएको छ तर राजनीतिक हरहिसाबमा फेरि पनि नेपाल कोसँग निकट हुन्छन्, उसकै पल्लाभारी हुने गणित छ । ‘पार्टीलाई विधि र पद्धतिबाट अघि बढाउन ठोस निर्णय गर्ने बेला छ,’ नेपालको भनाइ उद्धृत गर्दै उनीनिकट नेताले भने, ‘अहिले म सबैको मन बुझिरहेको छु ।’

प्रकाशित : वैशाख १६, २०७७ ०६:३५
पूरा पढ्नुहोस्
प्रतिक्रिया
पठाउनुहोस्
×