७६ श्रीलंकाली लिएर फर्कियो श्रीलंकाको ध्वजावाहक विमान 

नागरिक उड्डयन प्राधिकरणका अनुसार, श्रीलंकनको एयरबस ३२० चार्टर जहाज शुक्रबार बिहान ११ः२३ बजे त्रिभुवन अन्तर्राष्ट्रिय विमानस्थलमा अवतरण भएको थियो । यो १२ः३० बजे कोलोम्बो फर्केको छ ।

यो विमानको काठमाडौंमा व्यवस्थापनको जिम्मा लिने जेनिथ ट्राभल्स प्रालिका प्रबन्ध निर्देशक जोय देवानका अनुसार ७६ जना श्रीलंकाली विद्यार्थी, पर्यटक कोलम्बो फर्किएका छन् । ‘९० जनाको सूची थियो, तर आज चार्टर उडानमा ७६ जनामात्रै फर्किए,’ देवानले कान्तिपुरसँग भने ।

काठमाडौंमा रहेको श्रीलंकन दूताबासको संयोजनमा यो चार्टर उडानलाई प्राधिकरणको एयर ट्रान्सपोर्ट डिभिजनले बिहीबार अनुमति दिएको थियो । प्राधिकरणले लकडाउनको अवधिमा कुनै पनि विदेशी चार्टर वायुसेवा कम्पनीलाई ७२ घन्टाको अवधि तोकेर अनुमति दिने गरेको छ । कोलम्बोबाट यो विमान बिनायात्रु काठमाडौं आइपुगेको थियो ।

लकडाउनयताकै यो ३३ औं अन्तर्राष्ट्रिय चार्टर उडान हो । प्राधिकरणका महानिर्देशक राजन पोखरेलका अनुसार यसअघि २३ वटा यात्रु र कार्गोतर्फ ९ वटा अन्तर्राष्ट्रिय उडान भएका छन् ।