पाल्पा–२ बाट प्रतिनिधिसभा सदस्यमा निर्वाचित भएका उनले जितपछि सबै पाल्पालीको आफू सांसद् भएको बताए । उनले परिवर्तनको एजेन्डा स्थापित गर्न आफू लागि पर्ने बताए ।
पाल्पा — रुपन्देहीको बुटवलमा होमियोप्याथी सेवामा समय बिताइरहेका डा. माधवबहादुर थापा ३ वर्षअघि पाल्पामा नेपाली कांग्रेसको महाधिवेशनमा जिल्ला समितिमा सदस्यमा विजयी भए । रुपन्देहीमा बसोबास भए पनि पाल्पाको रिब्दीकोट गाउँपालिका–७, पालुङमैनादी जन्म घर थियो । त्यसैले उनलाई पाल्पामै फराकिलो दायरा बनाएर पाल्पालीको सेवा गर्ने सोच बन्यो ।
त्यसैले उनले राजनीति रोजेको बताउँछन् । केही महिना अघि उज्यालो नेपाल पार्टीको सदस्यता लिए । उज्यालो राष्ट्रिय स्वतन्त्र पार्टी (रास्वपा) मा एकीकरण भएपछि उनले रास्वपा रोजे । यसैबाट उनी प्रतिनिधिसभा सदस्यको टिकट लिएर पाल्पा आएका हुन् । थापा पाल्पा–२ बाट प्रतिनिधिसभा सदस्यमा निर्वाचित भएका छन् । थापाले २६ हजार ७३६ मत प्राप्त गरेर निर्वाचित भए । थापाका निकटतम प्रतिस्पर्धी नेपाली कांग्रेसका हिमालदत्त श्रेष्ठले १२ हजार ९९२ मत प्राप्त गरेका छन् ।
त्यस्तै, नेकपा (एमाले)का ठाकुरप्रसाद गैरेले १० हजार ५०३, नेपाली कम्युनिस्ट पार्टी सोमप्रसाद पाण्डेयले ५ हजार २८८ र नेशनल रिपब्लिक नेपालका देवप्रसाद श्रेष्ठले ६९३ मत प्राप्त गरे । पाल्पा क्षेत्र नम्बर-२ मा २०७४ सालमा नेकपाले फराकिलो मतान्तरसहित जितेको थियो । २०७० को संविधानसभा सदस्य निर्वाचनमा भने कांग्रेसका हरिप्रसाद नेपालले जितेको क्षेत्र हो ।
२०६४ को पहिलो संविधानसभा सदस्य निर्वाचनमा भने एमालेबाट कुलप्रसाद नेपालले जितेका थिए । २०५६ को प्रतिनिधिसभा सदस्य निर्वाचनमा एमालेबाटै यादवबहादुर रायमाझी, २०५१ मा विष्णुप्रसाद पौडेलले जितेको क्षेत्र हो । ०४८ सालको निर्वाचनमा कांग्रेसकै नेपालले जितेका थिए ।
यस पटकको निर्वाचनमा निर्वाचित थापाले जितपछि सबै पाल्पालीको आफू सांसद् भएको बताए । उनले परिवर्तनको एजेन्डा स्थापित गर्न आफू लागि पर्ने बताए । ‘निर्वाचनको अभियानका क्रममा हामीले केही प्रतिबद्धता र एजेन्डा आमजन समुदाय तथा मतदातामाझ प्रस्तुत गरेका छौं,’ उनले भने, ‘ती विषयहरूमा मैले संसद् भएपछि सिंगो पाल्पाको विकासका लागि काम गर्ने र महत्त्वपूर्ण भूमिका खेल्नेछु ।’
उनले सबै जनताको पक्षमा आफूले काम गर्ने र यस क्षेत्रको विकासका लागि सदैव खटिने बताए । यसअघि पाल्पा–२ मा एमालेका गैरे विजयी भएका थिए । थापाले विगतमा हुन नसकेका कामलाई पूरा गर्ने र युवाको काँधमा जिम्मेवारी दिनुपर्ने बताउँदै मत माग्दै हिँडेको र त्यसलाई पूरा गर्ने मागेका छन् । ‘मैले आफ्नो क्षेत्रमा जनताले झेल्दै आएको समस्या बुझेको छु,’ उनले भने, ‘कर्मथलो जिल्ला बाहिर भए पनि म आफ्नो क्षेत्रमा परिचित र लोकप्रिय छु ।’ क्षेत्र-२ को शिक्षा, स्वास्थ्य, रोजगारी, सडकजस्ता पूर्वाधार विकासमा काम गर्ने थापाको भनाइ छ । ‘नव युवामा युवा नेतृत्वलाई अघि ल्याउनुपर्छ भन्ने माग देखेको छु,’ उनले भने ।
को हुन् थापा ?
वि.सं. २०३७ साल कात्तिकमा पाल्पाको रिब्दीकोट–७, पालुङमैनादीमा जन्मिएका थापा सामान्य किसान परिवारको पृष्ठभूमिका हुन् । सहर र समाज बुझेका, बस्ती र परिस्थितिलाई बुझेका थापा स्वास्थ्य क्षेत्रका चिकित्सकका रूपमा परिचित छन् । होमियोप्याथिक चिकित्सामा विज्ञता हासिल गरेका थापाले माध्यमिक शिक्षा पाल्पामै सकेका हुन् । चिकित्सा अध्ययन भारतमा पूरा गरेका उनी देश फर्किएर सेवा प्रारम्भ गरेका थिए । बुटवलमा सञ्चालन भइरहेको होमियोप्याथिक अस्पतालमार्फत बिरामीको जीवनमा आशा जगाएका छन् ।
थापाले कोभिड–१९ महामारीको कठिन समयमा निःशुल्क औषधि वितरण गरेको बताए । उनले मुलुकमा अपारदर्शिता बढ्दै गएको, जनतामा निराशा बढेकाले यस्ता विषय बदल्न आफू यस पटक चुनाव लडेको बताए । युवाको आशा, जनताको भरोसा, र परिवर्तनको प्रतीक बन्ने उनले बताए । ‘मैले अहिलेको पुस्ताको भावना बुझेरै काम गर्नेछु,’ उनले भने, ‘मलाई माया गर्ने देश तथा विदेशमा रहेका सबैको भावनालाई बुझ्नेछु ।’
