परासी — पश्चिम नवलपरासी क्षेत्र नम्बर–१ बाट विजयी विक्रम खनाल समाजसेवासँगै विद्यार्थी राजनीतिमा सक्रिय व्यक्ति हुन् । लामो समय नेपाली कांग्रेसको राजनीति गरेका खनालले २०८२ को निर्वाचनमा अन्तिम समयमा रास्ट्रिय स्वतन्त्र पार्टीबाट टिकट ल्याएर चुनावमा होमिएका थिए । विद्यार्थी राजनीतिबाट सुरु भएको लामो राजनीतिक यात्रामार्फत स्थापित नेताका रूपमा चिनिन्छन् उनी ।

५५ वर्षका खनालले स्नातक तहसम्मको शिक्षा हासिल गरेका छन् ।१४ वर्षको उमेरमै विद्यार्थी राजनीतिमा प्रवेश गर्दै आफ्नो राजनीतिक यात्रा सुरु गरेका थिए । उनले नेपाल विद्यार्थी संघ (नेविसंघ) मार्फत सक्रिय राजनीति थालेका हुन् । २०५० मा नेविसंघ नवलपरासीका जिल्ला सभापति बनेका थिए ।

त्यसपछि खनाल नेपाली कांग्रेसको संगठन निर्माण र पार्टी गतिविधिमा निरन्तर सक्रिय रहँदै आएका थिए । २०७० सालमा संविधान सभा सदस्यको निर्वाचन जितेका खनाल २०७४ को प्रदेश सभा निर्वाचनमा उपविजेता बनेका थिए ।