कपिलवस्तु — शुद्धोधन गाउँपालिका–१ को वडाध्यक्ष पदको उपनिर्वाचनको मतगणनाका सबै तयारी पूरा भएको छ । जिल्ला निर्वाचन कार्यालयका अनुसार, आइतबार राति ८ बजेबाट मतगणना प्रक्रिया सुरु हुने छ ।
सोहसास्थित पतरिया स्वास्थ्य चौकीको माथिल्लो सभाकक्षमा मतगणनाको व्यवस्था मिलाइएको मुख्य निर्वाचन अधिकृत प्रकाशचन्द्र अधिकारीले बताए । सुरक्षाको सबै प्रबन्ध गरेर तार जाली लगाई ५ वटा सीसी क्यामरा लगाइएको छ । मतगणनास्थलमा १४ जना कर्मचारी र उम्मेदवार वा उनका प्रतिनिधिलाई मात्र प्रवेश दिने बताइएको छ । राति १ बजेसम्म नतिजा आइसक्ने बताइएको छ ।
आइतबार साँझ ६ बजे उम्मेदवारसँग छलफल गरेर मतगणना प्रक्रिया सुरु गरिने छ । निर्वाचनमा १० जना दलका र ४ स्वतन्त्र उम्मेदवार चुनावी प्रतिस्पर्धामा छन् ।
उपनिर्वाचनमा ६९ प्रतिशत मतदान
शुद्धोधन–१ को वडाध्यक्ष पदको उपनिर्वाचनमा ६९ दशमलव ४१ प्रतिशत मत खसेको छ । ४ हजार ८ सय ६८ मतदाता रहेकामा १ हजार ६ सय ६६ पुरुष र १ हजार ७ सय १३ महिला गरी ३ हजार ३ सय ७९ जनाले मतदान गरेका थिए ।
