माधव नेपालको गृहनगरमा नेकपा एसलाई अग्रता- स्थानीय तह निर्वाचन २०७९ - कान्तिपुर समाचार

माधव नेपालको गृहनगरमा नेकपा एसलाई अग्रता

कान्तिपुर संवाददाता

काठमाडौँ — रौतहटको गौर नगरपालिकाको मेयर/उपमेयरमा नेकपा एकीकृत समाजवादी अग्रस्थानमा रहेको छ । सुरुवाति मतपरिणामअनुसार मेयरमा नेकपा एकीकृत समाजवादीका शम्भु साह २७२ मतसहित अग्रस्थानमा रहेका छन् ।

उनलाई लोकतान्त्रिक समाजवादी पार्टीका अजयकुमार गुप्ताले ६५ मतसहित पछ्याइरहेका छन् । त्यस्तै कांग्रेसका मोहनकुमार यादव ४१ मतसहित तेस्रो स्थानमा रहेका छन् ।

त्यस्तै उपमेयरमा नेकपा एकीकृत समाजवादीकै शैलकुमारी साह २०१ मत ल्याएकी छिन् । त्यस्तै उपमेयरमा कांग्रेसकी शाहजान खातुनले ७६ मतसहित पछ्याएकी छिन् ।

गौर नेकपा एकीकृत समाजवादीका अध्यक्ष तथा पूर्वप्रधानमन्त्री माधवकुमार नेपालको गृहनगरसमेत हो ।

प्रकाशित : वैशाख ३१, २०७९ १३:४५
प्रतिक्रिया
पठाउनुहोस्

मकवानपुरको गढीमा विवादपछि मतगणना स्थगित

सुवास विडारी

मकवानपुर — मकवानपुर गढी गाउँपालिकामा मतगणनाको क्रममा विवाद भएपछि तत्कालका लागि मतगणना स्थगित गरिएको छ । 

सर्वदलीय बैठकको क्रममा मतगणना सुरु हुनुअघि गाउँपालिकाका कर्मचारी जिन्सी शाखा प्रमुख युवराज पौडेललाई मतगणनामा सहभागी नगराइने सहमति भए पनि उनलाई पछि जाँच नगरी भित्र पठाएको भन्दै विरोध भएपछि विवाद भएको हो ।

तत्कालका लागि मतगणना रोकिएको छ । गणना स्थगित हुनुअघिसम्म गाउँपालिका–१ र ८ वडाको मतगणनामा सत्ता गठबन्धन अगाडि देखिएको थियो । एमालेका उम्मेदवार दोस्रोमा थिए ।

वडा नम्बर १ को एक सय र वडा नम्बर ८ को २ सय मत गणना हुँदा गाउँपालिका अध्यक्षको गठबन्धनबाट नेपाली कांग्रेसका दोर्जे लामा स्याङतानले १ सय ७४ मत प्राप्त गरेका छन् ।

एमालेका विदुर हुमागाइँले ९० मत प्राप्त गरेका छन् । गाउँपालिका उपाध्यक्षमा गठबन्धनबाट माओवादी केन्द्रकी मानकुमारी पाख्रिन नेपालीले १ सय ५१ मत प्राप्त गरेकी छन्। उनलाई पछ्याउँदै एमालेकी सन्तु थिङले ८९ मत प्राप्त गरेकी छन् । दुवै वडाहरुमा पनि कांग्रेसका उम्मेदवार अगाडि रहेका छन् ।

प्रकाशित : वैशाख ३१, २०७९ १३:४५
पूरा पढ्नुहोस्
प्रतिक्रिया
पठाउनुहोस्
×