सुनसरी — फुटबलको मैदानमा विपक्षी स्ट्राइकर, मिडफिल्डर र गोलकिपरलाई छक्याउँदै गोल हान्ने व्यक्ति हुन्- किशोर राई । जो यसपटक स्थानीय तहको चुनावी मैदानमा उत्रेर राजनीतिक गोल गर्ने दाउमा छन् । कांग्रेसको तर्फबाट धरान उपमहानगरपालिकाको मेयरको चुनावी मैदानमा उत्रेका राईसँग प्रतिस्पर्धामा उत्रिएकी छन् एमालेकी मञ्जु भण्डारी ।

नेपाली फुटबलको सर्वोच्च संस्था अखिल नेपाल फुटबल संघ (एन्फा) का केन्द्रीय उपाध्यक्ष गोल प्रोजेक्टका एन्फा संयोजक, प्रदेश १ का एन्फा अध्यक्षसमेत रहिसकेका नेपाली कांग्रेस धरान उपमहानगर समितिका पूर्व सभापति राई फुटबल जस्तै दाउपेच राजनीतिमा प्रयोग गरेर कुर्सी हत्याउने प्रयासमा छन् । २०२४ साल चैत्र १७ गते मोरङको बोराबाधमा जन्मेका राईले धरानबाटै फुटबल र राजनीतिक जीवन सुरु गरेर आफ्नो इतिहास बनाएका छन् ।

उनले भने, ‘अब स्थानीय तहको विकास निर्माणका काम हिजो जस्तो गरेर हुँदैन । म त फुटबल खेलमैदानबाट उदाएको खेलाडी पनि भएकाले मैदानमा प्रवेश गरेपछि विपक्षीको पोस्टमा गोल गर्नै पर्छ भन्ने मान्यतालाई बिर्सेको छैन । अहिले राजनीतिको मैदानमा हामी एमालेसँग प्रतिस्पर्धा गरिरहेका छौं । बल डी एरियामा पुगिरहेकाले विपक्षीलाई छक्याएर कुन कोणबाट गोल हान्ने भनेर हेरिरहेको छु ।’

उनले धरान बनाउने योजना आफूसँग रहेको दाबी गर्दै  धरानको विकासको मोडल परिवर्तन गर्ने बताए । धरानको खानेपानी समस्या समाधान गर्ने, करको दर घटाउने, प्रत्येक वर्ष पाँच हजार जनालाई रोजगारी दिने, धरानलाई व्यापारिक केन्द्र बनाउने र सुकुम्बासी समस्या समाधान गर्न आफू प्रतिबद्ध भएको बताए । 

धरानको चुनावी मैदान ०१५ सालदेखि यता वामपन्थी उम्मेदवारका लागि उर्वर मानिँदै आएको छ भने कांग्रेसको लागि उबडखाबड । यो उबडखाबडकाबीच कांग्रेसले ०७६ को उप-निर्वाचनमा भने इतिहासमै पहिलो पटक मेयरको कुर्सी आफ्नो पोल्टामा पारेको थियो । तर यो चुनाव जितेको दुई वर्ष मात्र भएकाले यसपटक भने पाँच वर्षसम्मकै लागि ट्रफी जित्ने गरी राई एमालेको पोष्टमा गोल गर्ने रणनीति अपनाइरहेका छन् ।

चुनावी मैदानमा धरानमा  एमालेका तर्फबाट केन्द्रीय सदस्य र महिला सशक्तिकरण अभियानकी नेता ३८ वर्षीया मन्जु भण्डारी पनि काउन्टर एट्याक गर्दै कांग्रेसको पोष्टमा गोल गरेर ०७६ मंसिरको चुनावमा भोगेको  पराजयको बदला लिने दाउमा छिन् । 

हुन त गएको चुनावमा कांग्रेसका तिलक राईले नेकपाका प्रकाश राईलाई करिब २७ सय मतले हराएका थिए । त्यसबेला माओवादी केन्द्र र एमाले एउटै भएर चुनावी मैदानमा उत्रेपनि एक पटक धरानमा कांग्रेसलाई जिताएर धनीपूर्जा पाइन्छ कि भन्ने आसैआशमा तीन दशक बिताएका सुकुम्बासी मतदाताहरुले साथ दिएका थिए ।

विद्यार्थी राजनीतिबाट उदाएर जिल्ला हुँदै केन्द्रीय सदस्य बनेकी भण्डारीसँग उपमेयरसँगै डेढवर्ष कार्यवाहक मेयर भएर धरान उपमहानगरपालिका हाँकेको अनुभव पनि छ । 

फुटबलको मैदानमा गोल गर्न खप्पिस राईलाई उनी राजनीतिक मैदानमा हराउने ध्येकासाथ मैदानमा उत्रेकी छन् । भण्डारी ०५३ साल ताका १४ वर्षको किशोरी उमेरमै सुनसरीको इटहरीस्थित जनता मावि कक्षा ८ अध्ययन गर्दागर्दै अनेरास्ववियूको प्रारम्भिक कमिटी सदस्य बनेपछि कम्युनिष्ट राजनीतिमा प्रवेश गरेकी थिइन् । ०७४ को स्थानीय निर्वाचनमा २१ हजार २५६ मत ल्याएर कांग्रेसकी श्यामा रेग्मीलाई ६ हजार ३३९ को मत अन्तरले हराउँदै विजयी भएकी थिइन् ।

०३९ साउन २ गते जन्मेकी भण्डारी भन्छिन्, ‘मैले पनि आफ्नो रुचीअनुसार कम्युनिष्ट राजनीतिको सिद्धान्त मन पराएर विद्यार्थी जीवनमा सक्रिय भएँ । उपप्रमुखको पाँच वर्षे कार्यकाल सफलतापूर्वक सम्पन्न गरेँ । पाँचवर्षको अवधिमा मैले आफ्नो पदीय दायित्व, जिम्मेवारीलाई इमान्दारीकासाथ पूरा गरेँ । यो अवधिमा एकवर्ष पूरा नहुँदै नगरप्रमुख तारा सुब्बाको निधन भयो । नगरपालिका अभिभावकविहीन भएको अवस्थामा मेरो जिम्मेवारी स्वाभाविकरुपमा चुनौतीका साथ थपियो । मैले सिंगो नगरलाई अभिभावकविहीन भएको महशुस हुन नदिइ कार्यवाहक मेयरको रुपमा अभिभावकत्व प्रदान गरेँ ।’

उनकाअनुसार यो अवधि उनको जीवनमा चुनौतीमात्र होइन जिम्मेवारी बहनको अनुभव आर्जन र क्षमता विकासका दृष्टिकोणबाट कोशेढुंगा हुन पुग्यो । उनले यही अवधिमा धरानलाई थप बुझ्ने, राज्य सञ्चालन प्रक्रियाका सन्दर्भमा गहिरो अध्ययन गर्ने, जनताको सबैखाले समस्यालाई सम्बोधन गर्ने प्रक्रियामा आफूलाई समर्पित गरेको बताइन् ।

भण्डारी अनेरास्ववियूूको मावि प्रारम्भिक सदस्य, कोषाध्यक्ष, अध्यक्ष हुँदै एसएलसी गरेपछि उच्च शिक्षा आर्जन गर्न जनता क्याम्पस इटहरीमा भर्ना भएसँगै कम्युनिष्ट राजनीतिमा पनि सक्रिय भइन् ।०५६ सालमा  सुुनसरी २ नम्बर क्षेत्रीय कमिटी सचिव, ०५७ मा सुुनसरी जिल्ला कमिटि सदस्य, सोही वर्ष जिल्ला कमिटी कोषाध्यक्ष, जिल्ला कमिटी सचिव, अनेरास्ववियूू कोसीअञ्चल महिला विभाग सदस्य हुँदै अनेरास्ववियूू कोसीअञ्चल कमिटी अध्यक्षको बनिन् । उपमेयर भएकै समयमा नगरपालिका संघ नेपालको सचिवालय सदस्य समेत हुन पुगिन् । 

महिला हिंसा विरुद्ध पैरवीकर्ता भण्डारी आफैँपनि सामाजिक तथा विकास अभियानकर्ता हुन् । मानवअधिकार रेडियो श्रोताक्लवको जिल्ला अभियन्तादेखि मानवअधिकार तथा द्वन्द्व रुपान्तरणका लागि अभियान, द्वन्द्व व्यवस्थापनका लागि सञ्चालित बारुदी सुुरुङ प्रतिबन्ध अभियानको जिल्ला संयोजक, लैंगिक मैत्री योजना निर्माण र कार्यान्वयनको संयोजनकर्ता, रणनीतिक योजना तथा संस्थागत विकासका काममा उनी प्रत्यक्ष संलग्न छिन् । 

उनले भनिन्, ‘धरान उपमहानगरको मेयर पदमा एमालेले एउटा महिलालाई उठाएकाले मेरो उम्मेदवारीले महिला समुदायमा उत्साह बढाएको छ । धरानको समग्र विकाससँगै महिलाको पक्षमा केही हुन्छ भन्ने आशा पलाएको छ । योसँगै ०७६ मा भत्केको एमालेको विरासत फर्काएर धरानको खानेपानीको प्राविधिक समस्या, निर्माणाधीन बसपार्क तोकिएको समयमा पूरा गर्न र सुकुम्बासी समस्या समाधान गर्ने सन्दर्भमा इमान्दारिताकासाथ पूरा गर्न प्रतिबद्ध रहेको छु ।’