जुम्ला — वैशाख ३० गते हुने स्थानीय तहको निर्वाचनमा उम्मेदवार बन्नेको होडबाजी नै छ । वडामा न्यूनतम ६ देखि ३५ जनासम्म र गाउँपालिकामा ६ देखि १५ जनासम्म आकांक्षी देखिएका छन् । आकांक्षी धेरै भएपछि कांग्रेस, एमाले, माओवादी केन्द्र, एकीकृत समाजवादीलगायत दलहरूलाई उम्मेदवारको टुंगो लगाउन सकस भइरहेको छ ।

दलहरूले अहिलेसम्म उम्मेदवार छनोटको कुनै मापदण्ड बनाएका छैनन् । राम्रो सेवासुविधा र गठबन्धनका कारण आकांक्षी बढिरहेको नेकपा माओवादी केन्द्रका कर्णाली प्रदेश समिति सदस्य पूर्णप्रसाद धितालले बताए । ‘पहिलो कार्यकालमा निर्वाचित जनप्रतिनिधिको सुखसयल देखेर पनि आकांक्षी बढेका छन्,’ उनले भने, ‘यसअघिका जनप्रतिनिधिले निजी स्वार्थ पूरा गर्ने, व्यक्तिगत आर्थिक उन्नति गर्ने र शासन सोमत देखाउने गरेकाले पनि आकांक्षीको संख्या धेरै देखिएको छ ।’ 

सबै कुरा जनप्रतिनिधि भएपछि पूरा गर्न सकिन्छ भन्ने मानसिकता हाबी भएका कारण पनि धेरैले दाबी गरिरहेको धितालले बताए । ‘कसैले अंकुश लगाउन नसक्ने भएकोले पनि उम्मेदवार बन्नेको आकांक्षा धेरै देखियो,’ उनले भने, ‘योजना बनाउने, बनेको योजनालाई पास गर्ने, पास गरेको योजना कार्यान्वयन गर्ने र अनुगमन गरेर रकम भुक्तानी पनि जनप्रतिनिधिले नै गर्न पाउने भएकाले सबैको ध्यान जनप्रतिनिधि हुनुपर्छ भन्नेतिर गएको छ ।’